Efesu 5

Tagafanud at Ugali anway si wa sad Mayamag

1Faningi tuwa Diyus at ugali, anway am wan at fakesugun at unga. 2Ay faggugat afanyui ay iba kata tam Fun Isus nu kafanyu antam. Kanya nafon at leleg sa antam laman sik bebanglu fag anyun sas Diyus.

3Anway Diyus wam at taw, wa masine kadungug te, kamayun am, ay gfagbulun am tibak malimata fag ngay fagbulun, ay galabian am nus nge wain fag ngay nanuranan, 4ay gsulitanan am nus nga setaw fag mauri ay ate at yud e fanambagun, ay anggan at yud masine fag famangkasean. Fangkabat, useganani tuwa sas Diyus. 5Anway nasaful wam te, sik taw nu kamayun yay, ay sik taw nu gfagbulun tibak malimata fag ngay fagbulun, ay sik taw nu kamalabo yay, kanya fag taw wa ban umful sa tam Fun Isus ay sas Diyus at fagmagurangan taw. At fakamalaboun at masuwad te, ka fag taw igseg yay sa sangay fagsegan.

6Ay lag galukan sa sangay tagfanluk at longan at yud e masuwad, teway takatanya fag ngay fagbulun Diyus kadotama way. 7Nu katanya, lag am kaful sa tagfagbulun takatanya fag ngay taw. 8Ebi dewa am sisad marum, katsi si wam sad mayamag, anway si wam tam Fun. Ay nu katanya, ugaliani kata tagsisad mayamag fag ngay taw. 9Anway katatuy nu maugalian tagsisad mayamag fag taw: at ugali fagayu masine tuwa ay matuyan ay mafanud. 10Ay asafuli tuwa fiya fiya te, tain fag ugali tagfauseganan tam Fun.

11Ay lag am kaful sa sangay taw tagsisad marum at fagbulun. Fangkabat, foyungi ka fag ngay taw te, mauri way at fagbulun. 12Anway kapla way glong nus nga setaw at fagyudun gfasaful fag ngay fagbulun. 13Ay roro fagayu nus nge wain fag fagbulun nu madamlagan tuwa, sumaful wa fiya at matuyan. 14Katanya at masuwad at fagnalongun te,

“Afuloi wan, o, tagtiyug.

Ay alindugi siginan at ngay fagmateanan,

anway tam Fun Isus wan at dumamlag emu.”

15Ay nu katanya, amatangani tuwa te, go setain ban nu maugalian am masine, laman di am kata at yud e fagsafulun fag ngay taw, kata tuwam at ke fagsafulun fag ngay taw. 16Lag gfangulan ay lungud nu gfagbulun am at masine, anway mauri wan katsi tam ngay menit. 17Ay anway katanya, dangay am kata at yud e fagsafulun. Asafuli tuwa te, setain Diyus at fakaumsigun sa ayu.

18Ay lag ginum fangaranug, anway kanya gfafurat way ayu. At masine, ugatani tuwa faningi at Masine fag Falad. 19Ay fodfoyungani tuwa sa ay iba Diyus at ngay danyu ay tiba yak danyu tagfauseganan Diyus. Ay danyui sas fagdaul ay baga gina am gseg Diyus. 20Fagayu nus nge wain fauseganani tuwa gugat sa tam Fun Isus ay sas Diyus tam Tama.

Sik Longan sa sik Daduwa baliwa

21Ay adkafanyuwani tuwa, sik famasaful te, galang tuwam tam Fun Isus.

22Ngay mangena, faningi tuwa ay mangama kata nu gfaning am tam Fun. 23Anway ay mangama wan tagmagurang ayu kata tam Fun Isus nu gmagurang ngay tagafanud. Tam Fun Isus wan tagfalangfe at ngay tagafanud, ay at ngay tagafanud kata wa at bilug. 24Nus nga setaw at ngay tagafanud nu gfaning tam Fun Isus, katanyai yangay sik mangena nu gfaning at mangama at longan fagayu.

25Ngay mangama, esugi tuwa ay mangena kata tam Fun Isus nu kesug at ngay tagafanud. Tam Fun Isus nafon at leleg sa sangay tagafanud, 26laman umlayun sat masine ay umsine tuwa siginan at naasurungan sasad safa ay siginans Diyus at longan. 27Ay at fagnafagbulunun katanya, laman at ngay tagafanud maasalubang tuwa sa anya masine, di gladlayungun, ay di gidgitutun, antuwa malayun sat masine ay matuyan.

28Ngay mangama, esugi tuwa ay mangena kata nu kesug am ay balyu. Anway sik mangama nu kesug tuwa at mangena, kesug yangay ro anggan at balyu. 29At matuyan, we taw kalimata at balyu. Fagayu taw gfatvngvdun at balyu. Katanya yangay tam Fun Isus at fagbulun sa sangay tagafanud. 30Anway fagayu tam, kata watam tam Fun Isus at bilug. 31Marirukan sis Diyus at longan te,

“Sik mangama nu ndaduwa wan, insaman wa at tama ay at tina, ay nangalo wa sat mangena. Ay kanya fag duwa nsadi wan.”#5:31 Fagsigadan 2:24.

32Tuy fag longan at masuwad wa kasaful. Ay dewa katanya, gfoyung aw ka fag fafaskudanan at masuwad sa baliwa tam Fun Isus ay at ngay tagafanud. 33Nu katanya, ngay mangama, esugi tuwa ay mangena kata nu kesug am ay balyu. Ay am fag ngay mangena, faningi tuwa ay mangama.

Currently Selected:

Efesu 5: TAWEAST

Highlight

Copy

Compare