Efesu 4

Fasadii Ay Amatanganan

1Dewa aw sik masungsungan fag taw anway gfaning aktuwa tam Fun, get aw dawdaw sa ayu te, ugaliani sat masine kata Diyus at nafili fag ngay taw. 2Ay fababauni tuwa ay malukmei, ay barisi, ay fadfanabayani, ay edkesugani.

3Ay fatsii tuwa gugat ayu fagmasadiun siginan at Masine fag Falad, anway sa ay fagmanabayanun. 4Anway itam ngay tagafanud sadik bilug ay sadik Falad way. Ay tam fagsegun ban sadi tuwa, anway gsud way tam gfanya at fatuyanan gina tam Diyus nafili antam. 5Ay sadi tuwa tam Fun, ay sadi tuwa tam fagafanudun, ay sadi tuwa tam fakasurungun. 6Ay sadi tuwa tam Diyus, fagayu tam, kanya wan tam Tama. Ay kanya tagmagurang antam fagayu, ay gfagbulun si antam, ay gbanwan tuwa si antam.

7Tam Fun Isus nafon wa sa sadi sadik taw at fasad si anya fag famanyun, kata at fasad fagafonun. 8Marirukan sis Diyus at longan te,

“Kanya gina nkabat sas banwa, nataban sik ngay masungsungan fag taw.

Ay kanya nafon at ngay famanyun sa sangay taw.”#4:8 Danyu 68:18.

9Taw at masuwad at longan te, “Kanya nkabat?” At masuwad, kanya ebi ndaga ste swa daga. 10Sadi wayk taw at kindaga ay at kinkabat sa tiba tungud fag langkub banwa, laman fagayu at ngay naawat umke fagmasineun. 11Ay tam Fun Isus nafili tiba at Nasugu fag ngay taw, ay tiba at taglong, ay tiba at takamoyung at Masine fag Barita, ay tiba at tagtanud sat ngay tagafanud, ay tiba takamoyung. 12At fagnafiliun, laman Diyus at taw fagayu mafamasadan tuwa nanfagbulun sa at fagbulun. At masuwad te, laman umkugat ay umtvngvd tuwa tam Fun Isus at bilug. 13Fakatanyaun, laman fagayu tam gdiyuganan tuwa tam gafanud sas Diyus at Baguwama. Ay gurungan wa ban tam fiya masine kata tam Fun Isus. 14Ay nu katanya tuwa, di tam kata sa sik ngay sisiyan sirut at mafali nu kaalo sa nus nge wain fag foyungan. Ay di ban tam galukan ka fag ngay taw tagfasadanan nanfoyung at yud matuyan fag foyungan. 15Nu katanya, fatsii tuwa gugat antam fagmatuyanun ay fakafanyuun, anway fagayu tagafanud kata tuwa sadik bilug, ay tam Fun Isus at alfuyu. 16Ay tam Fun Isus nafasugfun fagayu afud sa sik bilug laman sadik bilug. Ay nu masine wa gfagbulun fagayu afud bilug, kanya umdaul tuwa ay umbitsug, anway fagayu afud kadkafanyuwan tuwa sa tibak afud.

Tam Bagu fag Ugali anway Gafanud Tam sa Tam Fun Isus

17Nu katanya, glong aw ay gfatuyan siginan tam Fun te, lag am gugalian kata at yud Udyu fag ngay taw at ugali, at yud e fanambagun fag ngay amatanganan. 18Takatanya fag ngay taw, wa gtogdungug, kata way marum at ngay amatanganan. Ay kanya wa ban mul Diyus at fagafonun fag leleg ay wa nasaful Diyus at ugali, anway wa kaumsig ganandunguganun faggugat. 19Ay nafanuguwanan wa fagmauriun, ay nus di sirut we naplan, ay we fagbulun tiba nu bunway sas fagmauriun.

20Ay roro di katanya ay nasaful sa baliwa tam Fun Isus. 21Ay nu matuyan tuwa ay nadungug sa baliwa tam Fun Isus ay nafoyung ayu at matuyan fag longan, 22ubuni wan ay dan fag ugali ay fagfaningun ebi ginan ay anggan ay dan fag taw takafauri sat mafanluk fag fakaumsigun. 23Ay katsi fabalii wan ay amatanganan ay ay ugali. 24Ay faningi sat bagu fag ugali. Diyus nafabagu wan ay ugali kata at ugali, laman ban masine tuwa ay fagbulun, ay matuyan tuwam tagfaning ay Diyus.

25Ay nu katanya, lag am kamuwagan. Ay fagayu ay longan sa ay iba anyakman at matuyan, anway fagayu tam sik ngay afud bilug tam. 26Dewa am kalimata, dangay gasalanan. Ay lag gsak fafalyu at menit nu kadotama am. 27Ay lag gfe lungud si ayu Satanas. 28Ebi dewa am kamul, katsi dangay kamul. Nanfagbuluni tuwa sa ay fagbulun mandi at masine, laman e fanfon tuwam sa tagayudan.

29Ay lag am glong nus nge wain at mauri fag longan, at matuyan yakman tagfatvngvd ayu, laman e fanambagun tuwa sa sangay tagdungugan. 30Ay dangay am gfabaluwanan Diyus at Masine fag Falad, anway Diyus nafatsa wa ayu at Masine fag Falad at fanfatuyanan te, am wan at taw. Ay gfalangfe wa ban fiya ayu, gina ban umdasug ka fag menit. 31Lag wa gfatsi ay amatanganan at mauri sa ay iba baliwa, ay lag kalimata, ay lag gfabarangyan, ay lag glong mauri sa ay iba, ay anggan fagayu at mauri. 32Ay adkafanyuwani tuwa ay iba, ay madmalukmeani tuwa, ay adkalyamani tuwa ay iba at asalanan, kata Diyus nu nafalyam ay asalanan anway sa tam Fun Isus at fagbulun.

Currently Selected:

Efesu 4: TAWEAST

Highlight

Copy

Compare