Efesu 1

1Tuy fag rirukan siginan angku, Pablu. Aw, tam Fun Isus at Nasugu at sadi, anway Diyus nafili angku.

Griruk aw sa ayu, Diyus at ngay taw sas fulan Efesu, at tagafanud sa tam Fun Isus. 2Igdarangin aw sa tam Diyus tam Tama ay sa tam Fun Isus te, famanyuni ay fanabayani ayu.

Diyus At Nafamanyun Antam anway Insadi Watam sa Tam Fun Isus

3Segi tuwa tam Diyus, tam Fun Isus at Tama, anway kanya nafamanyun antam fagayu at ngay fagmasineun sa tam fagafanudun, kata at fagmasineun sis banwa, anway insadi watam sa tam Fun Isus. 4Siginan ngay yud e daga, Diyus dan nafili antam, laman umsadi watam sa tam Fun Isus. Ay Diyus nu glag antam, masine tuwa ay di tam e mauri. 5Tam Diyus at faginfanyuun antam, at fasadan ebi laman at ngay unga ban tam, anway sa tam Fun Isus at nafagbulun. Katanya tuwa Diyus at fakaumsigun. 6Segi tuwa tam Diyus, anway masine dawdaw at nafamanyun sa antam. Ay at nafon antam at yud e fansali anway sat fakesugun fag Baguwama.

7Tam Fun Isus at taguk at nafalangfe antam, ay at nafalyam tam ngay asalanan. Katvngvdan Diyus nu kamanyun antam, 8kanya nafon antam tam fagsafulun ay tam fantogdungug, 9laman sumaful tam at masuksukan fag foyungan sa baliwa anya. At fakaumsigun, nanfagurungan ka fag foyungan siginan tam Fun Isus, 10gina ban umdasug at filian fag menit. Tam Diyus at fasadan, gfaful ban sa tam Fun Isus fagayu at awatan tagsis banwa ay daga.

Diyus wan at ke Fasadan siginan ngay ebi

11Anway sa tam Fun Isus, nafili wa antam laman anya wan, at nafasadanan siginan ngay ebi. At fakaumsigun nanfagbulun sas fagayu nus nge wain kata at naamatangan at fakaumsigun, 12laman itam at naguna at ke fagsegun sa tam Fun Isus sumeg tam anya sat kasinean. 13Ay anggan am, at nadungug at matuyan fag longan, siginan at Masine fag Barita at nafalangfe ayu, tagafanud sa anya. Nu katanya, nafatsi ayu at Masine fag Falad sik fagsafulan te, kanya wan tagagbilug ayu. 14Ka fag Masine fag Falad sik famatuyan wa fiya te, mul wa ban tam at nafatuyanan sa antam at ngay unga, at masuwad, umlangfe wa ban tam fiya fiya. Nu katanya, segi anya.

Pablu at Fagdaranginan sa sangay Tagafanud sas Efesu

15Ay nu nadungug aw ay fagafanudun sa tam Fun Isus, ay ay fakafanyuun sa tam Diyus at ngay unga fagayu, 16guseganan aw dawdaw sa tam Diyus anway gafanud tuwam. Ay gdarangin aw gugat ayu. 17Tam Diyus, kanya tam Fun Isus at Tama at madaragang. Gdarangin aw sa anya te, at Masine fag Falad gfon ayu ay fagsafulun ay gfayamag sa ayu at masuksukan fag foyungan at masuwad, laman sumaful tuwam fiya fiya tam Fun Isus. 18Gdarangin kyangay te, tam Diyus at tagfayamag sa ayu, laman sumaful am te, tain ay fage fagsegun, Diyus at fagnafiliun ayu. Ay laman sumaful yangay am te, setvngvd Diyus at fagafonun fag masine sa at ngay taw. 19Ay laman sumaful yangay am te, setvngvd Diyus at fagmadaragangun nut si antam tagafanud. 20Diyus at fagmadaragangun si wa antam katvngvd yangay at fagmadaragangun nu gfaleleg tam Fun Isus siginan at fagmateanan ay nu gfalunggung anya sa at siyun fag tigyangan sis banwa. 21Ay tam Fun Isus glabi nu e fagmadaragangun sas fagayu tagfangguna, ay sas fagayu fagmagurangan, ay sas fagayu fagmadaragangun. At ngayan glabi katsi ay anggan wa ban sat kumdasug fag ngay lungud. 22Diyus nafat sas daga tam Fun Isus at fagmadaragangun fagayu. Ay nafili yangay anya tagmagurang sas fagayu, laman at ngay tagafanud e fanambagun tuwa. 23Ka fag ngay tagafanud, kanya wan tam Fun Isus at bilug, at tagfasine sas fagayu fagayu.

Currently Selected:

Efesu 1: TAWEAST

Highlight

Copy

Compare