Galasya 6

Tarabangani tuwa Ayuwayu

1Ku ngay fadugsay, galay si ayu e taw, nalabawan at mauri ay nafagbulun at yud masine, am tagfaning at Masine fag Falad tagfafoli anya sat masine fag ugali. Ay nu an am igfafoli anya, ani tuwa magupi sa anya. Ay dewa katanya, matagakani tuwa, teway manalabawan yangay am ay ngay fakaumsigun at mauri.

2Ay nu glag am ay iba nu gatarabangan wan, ani tuwa nantarabangi. Teway katanya tuwa tam Fun at suguwan. 3Lag glong te, “Aw kwa nantarabang ayu, teway iglabi aktuwa ayu nu masafulan aw.” Teway labon yaya, wo glabi am iba. Anway o galukan am amatanganan mandi. 4At masine, fagayu tam amatangani te, “Go igtungul tuwa si angku ku ngay fagbulun?” Ay nu intuyan tam te, “Kin, igtungul wa fiya,” useganani way. Lag faladlabian tibak taw. 5Teway itam fagayu, tam fagfoyungun ban sa tam Diyus, antam way mandi tam nafagbulun. Bunwa tam iba nafagbulun.

6Ku ngay fadugsay, galay sik taw igfoyung ayu Diyus fanlongan, foni tuwa at ngay nayudanan.

7Ku ngay fadugsay, tam Diyus saful wadi, sik taw nu kamaninganan way. Nu katanya, lag gamatangan te, sik taw mafafalukanan way Diyus, teway nus nga setaw sik taw at natanum, katanya yangay at nabul ban. 8Sik taw fagfaningun nu sa way at ngay fakaumsigun at mauri, at fakadasugan ban, sas fakateun wadi. Ay roro sik taw at fagfaningun nu at Masine fag Falad tuwa, at fakadasugan ban, sa tuwas leleg at yud katabu.

9Ay dangay tam gananadan nu antam igfagbulun at masine. Teway nu gdi tam gananadan, gina ban tam indasug sas banwa, Diyus e fon antam sik ngay famanyun ayuwayu. 10Nu katanya, kaduge tam e lungud, fagbuluni tuwa at masine sa tam iba. Kaugat wan nu sa tam ngay fadugsay tagafanud sa tam Isus, nu antam igfagbulun masine.

At Fakatabuwan fag Longan

11Ku ngay fadugsay, glag wa ro am te, ste sirut fag afud, katsi, igbiya ayu daw nu marirukan. Fakatanyaun, aw wa fiya fiya Pablu at nariruk, iste fag afud sirut.#6:11 Pablu ugali nu kawat rirukan, kanya gelongan way sit dayu, ay at usama griruk at nalong. Ay roro nu katabu wa at rirukan, Pablu nanriruk yay sik fulan longan, te laman at taw nu tumap, tumoglag at rirukan, ay gafanud te siginan wa fiyas Pablu ka fag rirukan.

12Ay glong aw ayu te, lag dungugan, sanya fag ngay takamoyung taglong te “Fatulii, laman Diyus kaumsig tuwa glag ayu.” Roro fakatanyaun at foyungan, katanya fag ngay takamoyung, igfadiyuganan way sas taw Udyu fakaumsigun fag ngay foyungan, laman ro taw Udyu di kalimata anya, ay di gfatakan anya. Teway kanya fag ngay takamoyung, kauri way nanfoyung, te, tam Fun Isus inkate laman falangfe antam. Teway gamatangan way te, nu gfoyung way ro katanya, anway ro e kalimata anya.

13Ay kanya fag ngay taw dewa nafatuli, kanya sigon wa nafafaning fagayu Diyus suguwan sa sangay taw Udyu. Ay dewa katanya, kaumsig yay nantaban ayu sa anya baliwa, laman ban igfandaragang te, “Tuy yay tiba tagfaning emi.” Katanya way at fakaumsigun.

14Ay roro ngap aw, dakdi kadaragang te, e gfaning angku. Ku nadaragangan antuwa te, kata kwa inkate gasfuwan tam Fun Isus sis salibagan kayu. Nu katanya, ste swa daga fag ngay nalabianan, we masuwad sa angku. Ay ste swa daga fag ngay taw, inlimata wa angku. 15Ay intuyan kyangay te, kanya sigon fag longan te, “Fatulii,” we masuwad. Dewa sik taw nafatuli ay dewa yud nafatuli, we masuwad. At ke masuwad antuwa te, itam wa fiya at sadi tam Diyus at naawat bagu fag taw. Kanya tuwa at ke masuwad.

16Katsi, igdarangin aw fagayu taw tagfaning ku ngay foyungan iste fag rirukan. Igdarangin aw te, tam Diyus fanabayani nangus kanya fag ngay taw, ay falagi te kafanyu o anya. Teway kanya wan tam Diyus at filian fag ngay taw.

17Ku ngay fadugsay, kaduge aw igfagbulun ebi ginan, igfaning tam Isus at fakaumsigun, ngayu wan ku nadalan fag mataka. Ngayu wa ngani ku fangtat sa ku ngaba bilug. Ay nu katanya, lag famut ku fagatakanun.

18Ku ngay fadugsay, tam Fun Isus wan tagtarabang ayu. Kin, kanya wa fiya tagtarabang ayu. Ste way kabat ku rirukan.

Currently Selected:

Galasya 6: TAWEAST

Highlight

Copy

Compare