Efesu 2

Fagayu Tam ebi kata yay Tam sik Matean

1Ebi kata yay am sik matean, anway e asalanan way am ay kamabo yay am Diyus. 2Anway ebi katanya ay ugali kata sas fagdaul daga at ugali at mauri. Ay gfaning yangay am sa sangay mauri fag falad at fun, tagmagurang stes fagdaul daga. 3Ay fagayu tam, ebi gfagbulun yay tam mauri, kata tam bilug at fagalabianun. Ebi itam at nalimatan way tam fag ngay unga.

4Ay roro ngap, Diyus tagfangafanyu tuwa, ay matvngvd tuwa nu kesug antam. 5Ebi gina tam kata sik matean, anway e asalanan yay tam, Diyus nafaleleg tuwa antam gasfuwan tam Fun Isus. Nu katanya, tam faginlangfeun anway Diyus at nafamanyun antam. 6Teway masadi tuwa tam sa tam Fun Isus, tam Diyus nafaleleg antam gasfuwan tam Isus, laman nanmagurang tam gasfuwan tam Isus sis banwa. 7Diyus at fagnafagbulunun katanya, laman igfoyung sas fagayu taw sa ban bandi baliwa fag ngay menit te, katvngvd anya at katvngvdan nu kamanyun. Madyay kanya kafanyu tuwa antam anway sa tam Fun Isus.

8-9Ay katanya tuway, ay faginlangfeun anway Diyus nafamanyun ayu, teway gafanud am, ay bundi sa ay nafagbulun at masine. Kanya Diyus tuwa at nafamanyun ayu. Nu katanya, we taw gfandaragang sat nafagbulun. 10Itam wan at namasine fag awatan at nafasadi sa tam Fun Isus laman gfagbulun tam sat masine fag ngay fagbulun, at nafamasadan siginan ngay ebi laman kanya tam fagfaningan.

Fag Duwak Afud Taw Insadi wan katsi

11Nu katanya, amatangani ebi taguna te, siginan ngay am bagu kasalug, sik ngay taw wam yud Udyu. Ay taw Udyu nangayan ayu te, yud matulian, at masuwad, bunwa am Diyus at ngay taw. Ay nangayan yangay mandi anya te, “Ami, matulian tuwami.” Ay roro at fagnatuliun sit bilug way. 12Ginanya fag lungud ngayayu yay am sa tam Fun Isus. Ay manga wam e afud sas taw Israel. Diyus at ngay fatuyanan sas taw Israel wa si ayu. Ay wam e fagsegun ay wam e Diyus kaduge am gbanwan ste swa daga.

13Ay katsi am wan tam Fun Isus at taw. Ay ebi dewa am ngayayu sas Diyus, katsi e nafakbang tuwa ayu, anway sa tam Fun Isus at taguk. 14Kanya wan at nafanabayan ay at nafasadi antam, taw Udyu ay yud Udyu fag taw. Sa tam Fun Isus at naatean, nabul wan kata sik dingding si tam buknga, at masuwad, nafalyam wan tam aringangan. 15Ay kanya nafe yud e masuwad wan Muisis at Suguwan, laman ban ka fag duwak fulan taw umsadi wan sa sadik fulan. Nu katanya, nafanabayan tuwa anway insadi wan. 16Sa tam Fun Isus at naatean sas salibagan kayu at nafalyam ka fag duwak fulan taw at aringangan. Nafasadi ka fag duwak fulan taw, laman gdog yay nanfafoli sas Diyus. 17Tam Fun Isus at fagindasugun ste swa daga laman nanfoyung at Masine fag Barita te, e fagmanabayanun am, at yud Udyu fag ngay taw, ebi at ngayayu sas Diyus, ay anggan yangay sa emi, taw Udyu at makbang sas Diyus. 18Sa tam Fun Isus at fagbulun, fagayu tam maakbang tuwa tam sa tam Tama anway at Masine fag Falad natarabang antam. 19Nu katanya, katsi am, at yud Udyu fag ngay taw bundi am sik betaw ay ate tagsiginans tibak talun, antuwa te, inful wam sas Diyus at ngay taw; Diyus wam at ngay unga.

20Itam, at ngay tagafanud, kata tam sik bale. Diyus at ngay Nasugu ay at ngay taglong, kanya wan ka fag bale at ngay turuk. Ay tam Fun Isus wan at fagmatungkudan fag batu. 21Tam Fun Isus at nafatvngvd ay nafasadi fagayu afud bale laman umsik mafasamanan fag bale sa tam Fun. 22Teway insadi wam sa tam Fun Isus, insik afud wam sas Diyus at Masine fag Falad.

Currently Selected:

Efesu 2: TAWEAST

Highlight

Copy

Compare