Kulusas 3

1Diyus nafaleleg wa ayu gasfuwan tam Fun Isus, nu katanya, faggugat amatangani tagsas banwa fag ngay ugali, anway tam Fun Isus malunggung sas Diyus at siyun baliwa fag day tigyangan. 2Ay fagamatanganun faggugat tagsai tuwas banwa fag ngay ugali, dangay tagste swa daga fag ngay taw at ugali, 3anway inkate wam gasfuwan tam Fun Isus. Ay katsi ay leleg masuksukan sa tam Fun Isus, sas Diyus at fagbanwanan. 4Tam Fun Isus wan ay leleg, ay kanya nu msure wa ban, umsure yangay ban am gasfuwan anya sat fagmasineun.

Tagafanud at Bagu fag Ugali

5Ubuni fiya fiya fagayu tagste swa daga at mauri fag ugali: nu kamayun am, ay nu galabian am, ay nu mason am kaumsig sat mauri, ay nu gamatangan am sat mauri, ay nu gfangesug am. Ay sik taw nu gfangesug yay, kata yangay nu gseg sa sangay tawtawan. 6Anway takatanya fag ngay ugali, Diyus gfadasug at fandotama sas fagayu tagyud gfaning anya. 7Katanya ebi ay fagbulun kaduge am gfaning ste swa daga at mauri fag ugali. 8Ay katsi, ubuni wan kayu tuy: nu kadotama am, ay nu gamatangan am mauri sa ay iba, ay nu gfalingun am ay iba, ay nu gelongan nus nge wain at mauri fag longan. 9Ay lag am kadkamuwagan, anway naubun wam ay dan fag taw ay at ngay ugali. 10Ay katsi sik bagu wam fag taw. Ay nafabagu wan ay fagsafulun, laman kata yangay ban am ay Diyus at naawat ayu. 11Ay nu katanya, katsi we fagsamanun taw Gresiya ay taw Udyu. Ay at matulian ay at yud matulian, ay sik betaw ay dewa sik takamate fag taw, ay dewa sik fanuguwan ay yud fanuguwan. Anway at mafanud fiya fiya tam Fun Isus tuwa tagsi antam fagayu.

12Am wan Diyus at nafili fag ngay taw. Kanya kafanyu ayu ay nafasaman ayu laman sa anya. Nu katanya, kadkafanyuwan tuwam, ay gtadtarabangan tuwam, ay gfababaun tuwam, ay malukme tuwam, ay mafanyan tuwam. 13Ay tanani fadfalyamani, ay alyami tuwa nu e limata am. Kata tam Fun nu nafalyam ay asalanan, katanyai yangay ay fagbulun. 14Ay at tiba tungud ay fagbulun, tanani tuwa edkesugani, anway fakesugun wan fagayu tagfasadi. 15Ay fabayani wa tam Fun Isus nu nanfanabayan ayu. Tam Diyus at fagnafiliun ayu laman fagayu am kata tuwam sadik bilug nu gbanwan. Ay useganani tuwa gugat sa tam Diyus.

16Ay tam Fun Isus at longan fatsii tuwa gugat ay amatanganan. Ay fodfoyungani ay fatagaki tuwa ay iba siginan ay nasaful Diyus at longan. Danyui Diyus at ngay danyu ay tiba yak danyu tagfauseganan anya. Ay danyui sas fagdaul ay baga gina am gseg anya. 17Ay nus nga setaw ay e longan ay ay fagbulun, fagbuluni sa tam Fun Isus at ngayan, ay siginan anya, fauseganani tam Diyus tam Tama.

Diyus At Longan sa sik Talanan

18Ngay mangena, faningi tuwa ay mangama, anway katanya tuwa tam Fun at naumsigan.

19Ngay mangama, esugi tuwa ay mangena ay lag gfauri anya.

20Ngay sisiyan, faningi tuwa ay magurang at longan at matuyan fagayu. Anway nu katanya tuwa gfauseganan tuwam tam Fun.

21Ngay mama, lag gfaunatan ay ngay sisiyan, laman kanya di mabaluwanan.

22Ngay fanuguwan, faningi tuwa ay fun ste swa daga at longan fagayu, dewa e glag ay yud. Nu gfagbulun am dangai te, laman e mkumsig ay nafagbulun, antuwa te, sik matuyan am fag taw ay e fakalimuun sa tam Fun. 23Nus nga setaw ay fagbulun, fasineuni tuwa, kata ay fagbulun nut sa tam Fun, ay di sas taw. 24Anway nasaful wam te, tam Fun Isus gfon wa ban fiya ayu at fagafonun, faningi tuwa anya. 25Fagayu taw at mauri at fagbulun, mauri yangay ban at kumfoli sa anya, anway Diyus we filian taw.

Currently Selected:

Kulusas 3: TAWEAST

Highlight

Copy

Compare