Kulusas 4

1Ngay fun, masinei ay matuyani ay fagbulun sa ay ngay fanuguwan. Nasaful wam te, anggan am, e Fun yangay am sas banwa.

Lag Kalyam nu Gdarangin Am Emi

2Fatunglusi nu mafandarangin am. Ay ginanya, amatangani ay fagdaranginun ay useganani sa tam Diyus. 3Ay darangini emi sa tam Diyus te, laman umke lungud ami gfoyung at longan ay gfarapyag at masuksukan fag foyungan sa tam Fun Isus baliwa. Katanya ku faginsungsungun at masuwad. 4Darangini yangay te, laman mayamag tuwa nu gfoyung aw sa sangay taw, anway katanya tuwa at masine.

5Ay mamatanganani tuwa ay ngay ugali sa at yud gafanud. Ay lag gfangulan ay lungud. 6Malukmei tuwa nu gelongan am, laman ay longan kata sik fakonun at mayayum. Ay laman gsaful tuwam gbalus at matuyan nus nga sinu taginto ayu.

Pablu at Fakatabuwan fag Longan

7Tikiku tagfamansulit ayu sa baliwa ku banwanan ste. Kanya tam fakesugun tam fadugsay, ay matuyan fag fanuguwan ay tagfagbulun sa tam Fun at fagbulun. 8Ku fagnasuguun anya sa ayu laman sumaful am te, go tain ami ste. Ay kanya at tagfatvngvd ay amatanganan. 9Tikiku ufud Unisimu, at matuyan tam fakesugun tam fadugsay. Duwama ban tagfoyung ayu fagayu at kin-gurungan ste.

10Aristarku, ku ufud ste sad sungsungan, ay Markus, Bernabe at lagbe, ginto te, “Go tain am sanya?” Kata ku suguwan ayu, nu nasanya ban Markus, fasakboi tuwa anya. 11Ay anggan Isus, at sadi at ngayan Ustus, ginto yangay te, “Go tain am sanya?” Kanya way tulu ku ufud taw Udyu ste tagtarabang angku gfoyung sa baliwa tam Diyus at fagmagurangan taw. Kanya wan tagfatvngvd ku amatanganan.

12Ay Epafras ginto yangay te, “Go tain am sanya?” Kanya tagsiginan ay fulan, tam Fun Isus at fanuguwan at sadi. Kanya faggugat gdarangin ayu te, laman sik matuyan tuwam fiya fiya sa tam Diyus at fakaumsigun. 13Gfatuyan aw sa ayu te, kanya maseganama tuwa nu gtarabang ayu, ay anggan sa tam ngay fadugsay sis fulan Laudisiya ay fulan Ierapulis.

14Lukas, tam fakesugun fag duktur, ay anggan Demetrius ginto te, “Go tain am sanya?”

15Ay asafuli yangay sa tam ngay fadugsay sis fulan Laudisiya, ay anggan Nimfa ay sa sangay tagafanud at maful sit bale te, “Go tain am sanya?”

16Ay nu ntabu wan nu gtap am tuy fag rirukan, fatapi yangay sa sangay tagafanud sis fulan Laudisiya. Ay tapi yangay ku rirukan ku nafadasug sas fulan Laudisiya. 17Ay longi ban sas Arkipu te, “Maseganamai tuwa nu gfagbulun o sa tam Fun at nafon emu fag fagbulun.”

18Aw Pablu at nariruk tuy fag rirukan. Lag kalyam angku te, masungsungan aw.

Tam Diyus at mamanyun nangus ayu.

Currently Selected:

Kulusas 4: TAWEAST

Highlight

Copy

Compare