Kulusas 2

1Kaumsig aw nu sumaful am te, setvngvd ku nasungatanan laman e fanambagun ban am, ay anggan ngay taw sas fulan Laudisiya, ay anggan sas fagayu taw at yud batang glag angku. 2Katanya ku fagbulun laman ban umtvngvd tuwa ay ngay amatanganan, ay umsadi sas fakedkesuganun. Ay laman umtvngvd yangay ay fagsafulun nu nangasaful Diyus at masuksukan at foyungan, at masuwad te, kanya tam Fun Isus. 3Anway si was tam Fun Isus fagayu Diyus at matvngvd fag fagsafulun ay at fagmamatanganun.

4Ku fagnafoyungun ayu katanya, laman di am malukan sa sik taw dewa malukme nu gelongan. 5Ku bilug dewa yud sanya, ku amatanganan si way ayu. Ay guseganan aw nu nadungug aw te, masine ay fagbulun ay matvngvd tuwa nu gafanud am sa tam Fun Isus.

Lag Gfaning ste swa Daga at Ugali

6Anway gafanud wam sa tam Fun Isus, fatunglusi ugaliani nu gfaning am sa anya. 7Kata sik kayu at ngabasad at lalid, fatvngvdi ay fagmasadiun sa tam Fun Isus. Ay fatvngvdi yangay ay fagafanudun sa anya, kata ebi at nafoyung ayu. Ay faggugat useganani sas Diyus.

8Tagaki laman di am kaalo sa sangay takamuwagan at foyungan at yud e masuwad. Anway kanya fag ngay foyungan gfadiyuganan ebi fag ngay taw at ugali, tagste fag daga at ngay fagfaningun, yud siginan tam Fun Isus. 9Si tuwa tam Fun Isus fagayu Diyus at ugali. 10Ay anway gafanud tuwam sa tam Fun Isus, ay insadi wam sa anya, e leleg tuwam faggugat. Kanya tagfun sas fagayu tagmagurang.

11Teway insadi wam sa tam Fun Isus, kata wam matulian. Ay roro saman way sas taw Udyu nu gtuli, antuwa te, tam Fun Isus nabul wan tam dan fag ugali. 12Gina am insurung, kata wam inlibing gasfuwan tam Fun Isus. Teway insadi wam sa tam Fun Isus, nafaleleg ayu gasfuwan anya. Fakatanyaun, teway gafanud wam sas Diyus at fagmadaragangun at nafaleleg Isus siginan at fagmateanan. 13Ay ebi kaduge am kata matean, anway sa ay asalanan, Diyus nafaleleg way ayu gasfuwan tam Fun Isus, gina nafalyam fagayu ay ngay asalanan. 14Ay kanya nararus wan fagayu at nariruk tam asalanan, ay anggan tiba yak suguwan tam yud nafaning. Ay kanya nafalyam wan fagayu, siginan at naatuktukan sas salibagan kayu. 15Anway tam Fun Isus at naatean sas salibagan kayu, kanya nababo fagayu tagmagurang. Kanya nafalag sa fagayu taw te, ka fag ngay taw nalabawan wan.

16Ay nu katanya, lag am kaalo sa nus nge wain fag suguwan sa baliwas fakonun ay fanginum, ay sa baliwa ngay fagmafulun, ay sa baliwa bagu magdanun ay ate Fakamatoun fag Menit. 17Anway takatanya sik fafaskudanan way sa at kumdasug ban. Ay roro tam Fun Isus wan at nafagurungan kanya fagayu.

Lag Gafanud Tagfaning Fagdaul Daga at Ugali

18Lag am kaalo sa sangay taw at yud matuyan gfababaun ay sa sangay taw tagseg ngay tagfabarita. Kanya fag ngay taw gamatangan sa nus nga setaw at nalag, ay roro at matuyan, kanya kamuwagan way, anway gfaning way fagdaul daga at ugali. 19Ay ka fag ngay taw wa gfadiyuganan sa tam Fun Isus, tam alfuyu, dewa kanya at ke fagmadaragangun sa at bilug. Ay kanya tagimalu ay tagfasine fagdaul bilug, kata Diyus fakaumsigun.

Ste swa Daga fag ngay Longan at Masuwad

20Inkate wam gasfuwan tam Fun Isus, ay nu katanya di am gfadiyuganan ebi fag ngay taw at ugali, tagste fag daga at ngay fagfaningun. Taw ro ay fagfaningun ebi fag ngay ugali te, 21“Lag gted, ay lag gfaskud, ay lag kon?” 22Takatanya fag ngay longan we masuwad, anway wa ban glugo nu mamin. Anway kanya ste way swa daga fag ugali. 23Ngay taw nu gfasad, ka fag longan siginan wa sik mamatanganan. Madyay nafoyung wa te, matvngvdi nu gseg am. Ay nu gfagbulun am, katai nu sik tagfababaun, ay anggan masine dewa am nafauri ay bilug. Roro mangaro ka fag longan we masuwad laman sak mafasalag sik taw at bilug at fagalabianun.

Currently Selected:

Kulusas 2: TAWEAST

Highlight

Copy

Compare