2 Timutiyu 2

Sungatani tuwa Famoyungi Tam Fun Isus Longan

1Sama, fatvngvdi tuwa am amatanganan, teway tam Fun Isus nafon tuwa antam sik amatanganan at matvngvd, teway kafanyu tuwa antam. 2Ebi, nalag wo nu gfoyung aw sa sangay taw. Ay katsi, fatunglusi yangay famoyungi kanya fag ngay foyungan. Foyungi tuwa sa sik ngay taw at yud fangafoliun, laman ban kanya fag ngay taw tagfoyung yangay sa tibak taw.

3Dewa e gfauri emu, barisi tuwa kata nu gbaris aw, teway o wan tam Fun Isus at sundalu. 4Ay nu sik sundalu wo, lag kaalo at yud sundalu fagbulun. Teway sundalu fagbulun, igfauseganan tuwa at fun.

5Ay fagalay sik ngay taw iggudgunan igtarung, ay at sadi naguna, ay roro kanya fag taw at naguna, wa nafaning at suguwan sa baliwa nu gtarung. Nu katanya way ro, ka fag taw wa ro fabul at famanyun. 6Ay sik taw nu gimalu tuwa dawdaw at tanuman, ay indasug sas fanganiun, kanyai tuwa taguna tagbul at ngayu. 7Katanya ku longan, sa baliwa sangay taw tagafanud sas Isus. Ay katsi o, sama, amatangani dawdaw katanya fag ngay longan, teway tam Fun wan tagfasaful fiya fiya emu at ngay masuwad.

8Sama, fatunglusi tuwa nu gamatangan o sa tam Fun Isus baliwa. Amatangi tuwa gugat te, kanya wan Fun Dabid at fufu. Ay kanya dewa inkate, tam Diyus nafaleleg yay. Ay sanya baliwa ku foyungan sa sangay taw. Kanya wan Masine fag Barita. 9Ay katsi ku fagatakanun ay, teway nafoyung aw sa sangay taw at Masine fag Barita. Katanya ku faginsungsungun, kata at ke nafagbulun mauri.

Ay roro, deyud aw malfas iste ginan, tam Diyus fanlongan di kafatawad. 10Ay nu katanya, igbaris aw fagayu takadasug sa angku fag ngay mataka, laman ro tam Diyus at filian fag ngay taw sumaful tuwa tam Fun Isus, laman kanya fagayu umlangfe tuwa, ay umke leleg ban masine faggugat.

11Katsi, sama, igfoyung aw emu ku nadungug siginan ta iba. Ay tuy gurungan tuwa:

Ebi, gina inkate tam Fun Isus, kata yangay tam inkate gasfuwan anya.

Nu katanya, gdog yangay ban tam gleleg kata anya.

12Ay katsi nu gbaris tuwa tam at ngay mataka,

bandi sik ngay tagmagurang yangay tam, kata tam Fun Isus.

Ay roro sik taw nu glong way te, “Yaya, wa ku fun, kanya fag Isus,”

bandi tam Fun Isus lumong yangay te, “Yaya, kanya bunwa ku taw.”

13Ay roro, deyud tam nafafaningun tam Fun Isus,

kanya di gubun antam.

Teway kanya di ginbalian.

Maseganamai tuwa nu Gfagbulun O Tam Diyus at Fon Emu Am Fagbulun

14Sama, aro ginan ku longan sa emu, fatunglusi tuwa foyungi sa am iba.

Ay labon sanya si ayu, tibak taw garingangan ayuwayu. Ay roro garingangan way te, “Katatuy tuwa nu kafayamag tuy fag elongan.” Ay sama, emu am fagbulun, longi tuwa am iba te, lag katanya, teway katanya fag ngay aringangan wa masine sa tam Diyus, ay we fanambagun. Ay nus tuwa, sik taw nu nadungug yay tagaringangan, gaduwanun wan, te, “Labon wa matuyan tam Isus at ngay foyungan.”

15Sama, maseganamai tuwa nu gfagbulun o tam Diyus at ngay fagbulun, laman ro tam Diyus guseganan tuwa emu, ay laman ban di o umkapla tam Diyus. Ay nu gfoyung o sa sangay taw, fafoyunguni tuwa at mafanud fiya fiya.

16Tibak taw igsulitanan gugat gugat, ay roro at sulitanan we fanambagun. Sa way baliwa tam Diyus fakalimataun fag ngay longan. Ay nu katanya, dangay o gafaningan. Teway kanya fag ngay taw kaugat yay ban nu kamabo tam Diyus. 17Kata sik famaga takaayu sa sik taw at bilug, katanya yangay kanya fag ngay taw longan nu karapyag sa sangay taw.

At duwak tagfoyung at yud matuyan fag ngay foyungan, Imaneyu ay Filitu. 18Kanya fag duwama, inyayu wan siginan at matuyan fag foyungan. Ay gfoyung way sa tibak taw te, intabu wan tam Fun Isus nu gfaleleg at ngay taw. Ay nu nadungug katanya, tibak taw gaduwanun wan, sat fagafanudun baliwa.

19Ay tagafanud mandi sa tam Diyus, kanya igfatunglus tuwa gafanud sas Isus. Ay tam Fun Diyus glong te, “Igsaful aktuwa, sik taw nu ku unga wa fiya.” Ay tam Fun Diyus iglong yangay te, “Fagayu am taglong te am wan ku taw, ubuni wan ay ngay ugali at mauri.”

20Itam, kata tam sik ngay fagsuwadan fagnuwan sa sik bale daul. Tiba at ngay fagsuwadan masine way ngap. At fangawat, gintu ay pilak. Ay sanya wa long tagbilug nu gsuwad at ngay naumsigan. Ay roro sanya fag bale e fagsuwadan yangay at yud masine. At fangawat, daga ay kayu. Ay sanya nu gsuwad at ngay nagfuratan. 21Ay nu si antam wan, nu naubun tuwa tam at mafurat fag ngay ugali, kata watam at masine fag fagsuwadan. Mafonan watam fiya fiya sa tam Fun Isus. Ay tam Fun Isus igfon antam sik ngay fagbulun, teway mafafagbulun tuwa tam nus nga setaw at masine fag ngay fagbulun.

22Sama, saful wata te, nu anyay sik baguwama, ate sik baguyna, e fagafagbulunun way at yud masine. Ay lag kalong kalong fagbulun katanya. Am fagbulun, antuwa at masine fagayu. Afanudi sa tam Fun Isus, esugi am iba, ay faygaluwani tuwa masine am iba. Ay bundi o nangus sesadi tagfagbulun katanya. Anggan tuwa fagayu tagurunganan gafanud sa tam Fun Isus.

23Ay galay am iba igfaladlabian at ngay amatanganan, ay roro at ngay amatanganan mafanlamang way, we masuwad bangan, o lag sanya. Teway nasaful wata te, galay katanya at fagbulun, rodi garingangan wan. 24Ay itam, di tam faaringangan tam iba, teway itam wan ay tam Fun at ngay fanuguwan. Ay nu tam Fun watam at fanuguwan, igfagbulun tuwa tam masine sas fagayu taw. Ay igsaful tuwa tam igfoyung tam Diyus longan. Ay di tam igfangalimata.

25Ay nu gfoyung o tam Diyus fanlongan sa sangay taw, fagalay sik taw gafayudun am ngay foyungan, malukmei tuwa nu gbalus o anya. Teway labon tam Diyus igfaamatang yay anya te, igsalan way anya at amatanganan. Ay nu katanya tuwa, ka fag taw sumaful wan at matuyan fag foyungan. 26Ay nu sumaful tuwa, umyamag wa long at amatanganan, ay wa long mafafanluk anya Satanas. Teway fakatanyaun, Satanas ebi nafanluk way kanya fag taw, ay ka fag taw igfaning way anya.

Currently Selected:

2 Timutiyu 2: TAWEAST

Highlight

Copy

Compare