2 Timutiyu 3

Sik Famatagak sa Baliwas Mauri fag ngay Taw

1Sama, e fagalongun aw emu, sa baliwas taguyan fag ngay menit. Siginan ngay katsi, tagaki wan. Teway bandi ban, at ngay taw, mason ban dawdaw nu gatakan. 2Teway ginanya ban at ngay taw, igfaning way at ngay fakaumsigun mandi. Gyafaayuun way at singku. Ay igfandaragang, ay gafaabatun anya mandi. Ay malimata way nu gelongan sat iba. Ay at ngay sisiyan wa gfaning at ngay magurang. Ay at ngay taw, wa gsaful guseganan sat iba. Ay wa gdungugan tam Diyus. 3Ay wa kesug at iba. Ay tiba nu e nasalan way sa anya, wa kalyaman. Ay igfangelongan way sat iba baliwa. Ay wa gsaful gfatawad at amatanganan mandi. Ay at ugali wan nu gfabarangyan tiba. Ay kayu at nalag at masine, kanya kalimata way. 4Ay at ngay taw dewa igfafagwesanan at iba, roro sit amatanganan e fasadan way mauri. Ay nus nga setaw at namatangan at yud masine, igfagbulun wan. Ay kadaragang dawdaw at fagsafulun mandi. Wa kaumsig kasadi sa tam Diyus. Fangkabat igfagbulun way at naumsigan mandi. 5Tiba ginan, at fagbulun, kata yay igfaning tam Diyus. Ay roro, wa kaumsig tam Diyus nu gfaamatanganan anya. Ay o, lag long faygaluwan kanya fag ngay taw.

6Takatanya fag ngay taw, igfafagwesanan dawdaw sik ngay talanan. Ay roro at fasadan fiya fiya, igsarap way tagfangataban dawdaw fag ngay mangena, laman at fagfamoyungan. Katanya fag ngay mangena dan wa gabiyatan sit amatanganan, te ngayu wan at asalanan. Ay igfaning dawdaw at ngay fakaumsigun ayuwayu at mauri. Ay at mauri fag ngay takamoyung nu gfoyung wan, at fagfamoyungan fag ngay mangena kaalo wan. 7Teway katanya fag ngay mangena dewa gdungugan gugat gugat tiba foyungan, wa gsaful igfili at matuyan fag foyungan.

8Ebi, gina Muisis fag fulan taw, e sik duwama, at ngayan Yanis ay Yamris. Ay kanya fag duwama, nafayud way dawdaw Muisis foyungan. Ay anggan si antam katsi, e taw yangay kata kanya fag duwama. Tagfayud yangay at matuyan fag foyungan. Ay kanya fag ngay taw at amatanganan mauri way. Wa kalong gafanud sa tam Fun Isus.

9Ay katsi, katanya fag ngay taw mafafanluk way tiba. Ay bandi ban yaya, teway at ngay taw sumaful wa ban te, kanya ngaro wa fiya fiya masafulan. Katanya at kin-gurungan sis duwama. Ay katanya yangay ban at kumgurungan sas fagayu fag taw tagfaning duwama fagbulun.

Fatunglusi nu Gafanud O sat Matuyan

10Ay roro sama, igsaful kway te, di o kata kanya fag ngay taw. Teway igfaning tuwo ku ngay foyungan. Ay igfaning yangay o ku ngay fagbulun. Ay kaumsig tuwo dawdaw igfaning tam Fun Isus, kata nu kaumsig aw. Ay igfaning yangay o ku amatanganan nu gafanud aw sa tam Isus, ay nu kesug nu tam iba. Ay igfaning yangay o ku ugali, te dakdi igfangalimata, ay dakdi igfangafoliun. 11Ay igsaful yangay o te, ebi, e nafatakan dawdaw angku sis fulan Antiukia, anggan sis fulan Ikunyu ay sis fulan Listra, teway sanya at ngay taw kalimata way nu gfoyung aw sa tam Fun Isus baliwa. Ay dewa katanya nabaris aktuwa. Ay tam Fun di nafabayan angku, sanya fag ngay fagatakanun ayuwayu. Natarabang tuwa angku.

12Roro ngap, fagalay tam kaumsig igfaning tam Diyus, tibak taw igfatakan wa fiya antam, teway kalimata nu gafanud tam sa tam Fun Isus. 13Ay kanya fag ngay taw tagfagbulun at mauri ay tagfanluk tiba, kanya kaugat way ban nu mauri. Ay dewa igfanluk at iba, roro kanya fag taw galukan yangay tibak taw.

14Ay o, dangay gafaningan takatanya fag ngay taw. Ani tuwa gugat fatunglusi sit matuyan. Teway ebi nasaful wo at matuyan, ay nafanud tuwo. Ay igsaful wo te, matuyan wa fiya am naafanudan, teway fagayu ami at nafoyung emu, di ami igfanlamangan.

15Ay siginan ngay o alay, gadal wo gugat tam Diyus fanlongan. Ay kaduge o gadal tam Diyus fanlongan, inke fagsafulun o. Nasaful wo gafanud sa tam Fun Isus. Ay siginan o gafanud sa anya, inlangfe wo.

16Fagayu at marirukan si tam Diyus fanlongan, siginan tuwa anya. Ay kanya fagayu at marirukan, e fanambagun tuwa. At sadi at fanambagun, igfoyung tuwa antam tam Diyus fagalongun. Ay at sadi, fagalay tam e nasalan, tam Diyus fanlongan igfaamatang antam, te igsalan way tam, ay igfatungul tuwa sat masine. Ay at sadi, tam Diyus fanlongan igfoyung antam nu gugalian at masine. Katanya, tam Diyus fanlongan at fanambagun sa antam. 17Ay nu katanya, itam tam Diyus at ngay taw, mafafagbulun wa long tam fiya fiya fagayu nus nge wain at masine.

Currently Selected:

2 Timutiyu 3: TAWEAST

Highlight

Copy

Compare