2 Timutiyu 1

Pablu Longan at Famasigad at Rirukan

1Tuy fag rirukan siginan angku, Pablu. Aw wan at sadi tam Diyus nafili laman nanfadasug at fagalongunun sa sangay taw. Ay kanya fag fagalongunun, sa baliwa tam Fun Isus. Tam Diyus iglong te, nus nga sinu tagafanud sas Isus, umke leleg wa long fiya at yud katabu. Katanya tam Diyus fatuyanan sa antam.

2Ku fagfadasugan tuy fag rirukan, sa ku sama Timutiyu. Sama, kata wo ku baguwama. Kesug aktuwa dawdaw emu.

Igdarangin aw sa tam Tama sis banwa, ay anggan sa tam Fun Isus, tam Fagsegan. Igdarangin aw te, laman kanya falag tuwa nu kafanyu emu, ay tarabang tuwa emu gina o gatakan, ay fanabayan yangay emu.

Pablu at Fagusegananun sas Timutiyu Baliwa

3-5Sama, kayu menit ay kayu yabi, igdarangin aktuwa gugat emu. Ay guseganan aw sa tam Diyus, teway gamatang aktuwa te, gurunganan tuwo gafanud sa tam Diyus, ay intuyan aw te, fatunglus tuwo gafanud. Igfaning o am fufuyna Luyda ay am mina Yuniki tagurunganan gafanud sas Diyus. Katanya ku nalag si emu. Ay anggan aw, igfaning kyangay tam Diyus, kata ku ngay fufuwama ebi. Ay dewa aw masungsungan katsi, gsaful kway te, dakdi e nafagbulun mauri.

Sama, namatang aw te, gina ta bagu gsaruwayan ebi, nauyway o dawdaw. Ay katsi gyalagun aw dawdaw emu, teway gamatangan aw te, katsi ban nu lumag aktuwa emu, guseganan kwa long ro dawdaw.

Fatunglusi nu Gfoyung O Tam Diyus Foyungan

6Sama, ebi, namatang yay ro o te, nadarangin aw emu, ay nafatayuk aw ku daluwap sam alfuyu. Ay kaduge aw gdarangin emu, Diyus nafon emu sik fagmafabulun.

Ay gurunganan tuwo ay gafanud sa tam Isus, katsi faugati tuwa at fon emu am fagmafabulun. 7Teway nu tam Diyus tuwa tagfaamatanganan antam, tam amatanganan matvngvd tuwa. Di tam kalimu. Ay kesug tuwa tam tam iba. Ay mafafatawad tuwa tam antam mandi.

8Nu katanya, dangay o gfangaplaun nu gfoyung o sa tam Fun Isus baliwa. Ay dangay kapla te masungsungan aw, teway ku faginsungsungun, nafagbulun aktuwa tam Fun fagbulun. Lag kapla. Ani tuwa barisi. Dewa e gfauri emu, kalimata nu gfoyung o Masine fag Barita, barisi tuwa kata nu gbaris aw. Ay tam Diyus wan tagfatvngvd am amatanganan.

9Tam Diyus nafalangfe wa antam. Ay nafili wa antam laman mafonan tuwa tam sa anya. Fakatanyaun at nafagbulun, bunwa te, e nafagbulun tam at masine. Antuwa te, tam Diyus tuwa at ke fasadan, te nangafanyu tuwa antam.

Ebi taguna, tam Diyus ye naawat. Ay dewa katanya, tam Diyus kafanyu wa antam, ay e fasadan wan, laman nanfaste swa daga tam Fun Isus. 10Ay katsi, tam Diyus nafagurungan wan at fasadan. Nafastiye wa fiya tam Fun Isus, laman nanfalangfe antam. Ay tam Fun Isus gina ste swa daga, nababo tuwa fakateun, ay nafadasug tuwa sa antam at Masine fag Barita. Ay nu gafanud tuwa tam at Masine fag Barita, umke leleg tuwa tam at yud katabu.

11Ebi, tam Fun Isus nasugu angku, te, “Foyungi at Masine fag Barita. Ay farapyagi sa sangay taw.” Ay nafaning kwa fiya. 12Ku faginsungsungun ngani, teway nafoyung aw sa sangay taw at Masine fag Barita. Ay dewa katanya, dewa aw masungsungan, dakdi kapla, te sik masungsungan kway, teway gafanud aw sa tam Isus, ay igsaful kway te, kanya di gfabayan angku.

Ay gafanud kyangay te, tunglus tuwa ban Masine fag Barita nu karapyag, yap ngay indasug ste swa daga tam Fun Isus. Teway tam Fun Isus wan at nasugu angku ebi te famoyungi, ay kanya yangay ban takawat at ngay faran laman at Masine fag Barita igtunglus tuwa nu kadasug sa sangay taw.

13Sama, lag kalyam at matuyan fag foyungan, kata ebi ku foyungan emu. Ay matvngvdi tuwa nu gafanud o sa tam Isus, ay anggan nu kesug o am iba, teway tam Fun Isus wan tagfaamatanganan emu. 14Ay am iba nu gafabaliun tam Diyus at foyungan, salagi tuwa, teway kanya wan tam Diyus at fon emu am fagbulun. Ay nu gfagbulun o katanya, Masine fag Falad wan tagtarabang emu, teway kanya si tuwa antam.

Pablu Fagusegananun sa sik Taw at Yud Fabayan

15Sama, gsaful wo te, katsi ku fagwes siginans talun Asia nafabayan way angku. Dewa ku fagwes Figilus ay Irmuginis, naubun wa angku. 16-18Ay roro, ku fagwes Unisifuru nansibo tuwa gugat angku ay nanfabitsug tuwa gugat ku amatanganan. Teway kanya di kapla nu masungsungan aw. Ebi, gina bagu ndasug stes fulan Ruma, kanya wa natungul angku. Ay dewa katanya, igsarap yay gugat gugat, anggan wa te natungul angku.

Ay gdarangin aw sa tam Fun te, tarabangi tuwa nangus tam Unisifuru anggan at ngay kalongan. Ay bandi ban gina tam Fun Isus indasug, foni anya sik ngay famanyun.

Ay sama, nasaful o te, ta usama Unisifuru natarabang tuwa gugat gugat angku, siginan ngay fulan Efesu.

Currently Selected:

2 Timutiyu 1: TAWEAST

Highlight

Copy

Compare