2 Kurintu 4

Sik Takamoyung kata sik Bisu Daga

1Anway sas Diyus at fakafanyuun, kanya nafili emi laman nanfoyung at bagu fag ngay balyavtan sa baliwa nu gfalyam taw at asalanan. Nu katanya, di kalukme em ngay amatanganan. 2Ay naubun wami at mapla ay at masuksukan fag ugali. Ay di ami gfanluk ay di ami gfasaman Diyus at longan. Ay em foyungan matuyan tuwa fagayu. Ay masine tuwa em amatanganan sas taw at daga salubangan.

3Ay sa em foyungan at Masine fag Barita nu dyay e nyamag, kanya takafauri way fag ngay taw. 4Ka fag ngay taw wa gafanud sa at Masine fag Barita anway Satanas gmagurang at ngay amatanganan, laman kanya wa sumaful at Masine fag Barita sa baliwa tam Fun Isus at fagmasineun. Tam Fun Isus wan Diyus at aninu.

5Ay duwami nafoyung sa baliwa em ugali. Em foyungan antuwa te, tam Fun Isus, kanya wan Diyus at nafili fag Fun. Ay ami, at fanuguwan way ami laman Isus e fanambagun. 6Ebi Diyus nalong te, “Asurei fagmayamagun siginan sad marum.” Ay anggan katsi kanya yangay at nafayamag tam amatanganan, laman sumaful tam Diyus at fagmasineun siginan tam Fun Isus.

7Em bilug kata way sik bisu daga at yud matvngvd. Ay em foyungan Diyus at longan kata sik mesug fag nanuranan nu masuwadan sanya, laman tibak taw sumaful te, em foyungan bundi siginan em amatanganan mandi, siginan tuwas Diyus at fagmadaragangun. 8Dewa nus ngandaginan baliwa tagfatakan emi, di ami nalabawan. Ay tibaginan dewa ami gabukngan, e fagsegun tuwami gugat. 9Ngayu tagfatakan emi, ay dewa katanya Diyus di nafabayan emi. Ngayu ginan nu gfafulid emi, ay dewa katanya di nafate emi.

10Si wami gugat gugat sfagatakanun, kata Isus nu gatakan gina gakateun, laman siginan em leleg kalag yangay Isus leleg. 11Anway kaduge ami gleleg, faggugat gakateun wami anway sas Isus. Laman siginan em leleg takate, fagayu taw sumaful Isus at leleg. 12Nu katanya, labon umkate wami anway sa em foyungan, ay roro kanya wan at masine laman umke leleg am at yud e fakatabuwan.

13Marirukan sis Diyus at longan te, “Anway gafanud aktuwa, gfoyung aktuwa.”#4:13 Danyu 116:10. Ay katanya yangay ami: Gfoyung ami, teway gafanud ami. 14Anway nasaful wami te, Diyus wan at nafaleleg tam Fun Isus, ay kanya yangay ban tagfaleleg emi kata anya, ay nantaban ban antam sat day tigyangan. 15Ay fagayu em fagatakanun, gfe fanambagun ayu, laman Diyus at fagmasineun umdasug tuwa sa sangay taw, ay ngayu tuwa ban taguseganan ay tagseg sa anya.

Tain Tam Amatanganan nu Gafanud Watam

16Nu katanya, di kalukme em amatanganan. Dewa em bilug garimanan kafanalo, kabitsug tuwa em amatanganan kayu menit kayu menit. 17Tam ngay fagatakanun katsi ya faggugat, ay ya fiya fiya mataka. Ay siginan em fagatakanun, kanya e famanyun at nafasaman laman sa emi at yud e glabi faggugat ban. 18Ay nu katanya, em fakaumsigun tagsa tuwas banwa tam fagyudun glag, bundi ste swa daga tam ngay nalag. Anway tam ngay nalag katsi wa glugo kalyam way. Ay tam fagyudun glag katsi at fagmasineun di ban e fakatabuwan.

Currently Selected:

2 Kurintu 4: TAWEAST

Highlight

Copy

Compare