2 Kurintu 3

Sik Fatuyanan at Bagu

1Go nu gfasad am, gseg ami em fagsafulun mandi? Wami kata tibak taw gayudan sik rirukan siginan tibak taw laman gfasaful sa ayu te, masine em fagbulun. Ay wami yangay gayudan sik rirukan siginan ayu laman gfasaful sa tibak taw te, masine em fagbulun. 2Yaya. Sa em amatanganan, am fagayu kata wam sik rirukan tagfoyung te, masine em fagbulun. Anway ay leleganan kata wa sik ngay rirukan, ngay taw at nalag at natap. 3Mayamag wa te, kata wam sik rirukan siginan tam Fun Isus. Ay ami wan tagfatvngvdun ka fag rirukan. Ay ka fag rirukan at fanriruk bunwa ste swa daga fag ngay fanriruk, siginan was Diyus tagleleg at Masine fag Falad. Ay wa nariruk sa sangay batu madalafi; at fagrirukan sa was taw at ngay amatanganan.

4Em fagmafalongun katanya, anway sa tam Fun Isus at ngay nafagbulun sa emi, teway gafanud ami sa tam Diyus. 5Ay nu gseg way ro ami em kabitsugan mandi, wami mafafagbulun katanya. Fagayu em fagmafabulun siginan tuwas Diyus. 6Kanya wan at nafon emi em fagmafabulun, laman ami at fanuguwan sat bagu fag fatuyanan. Kanya fag fatuyanan wa siginans Muisis at Suguwan, siginan tuwa at Masine fag Falad. Anway Muisis at Suguwan at fungfung sa ways fakateun. Ay roro at Masine fag Falad, kanya wan tagfon leleg.

7Ay gina nafon sas Muisis at nariruk sis batu madalafi, taw Israel wa mafalinggat sas Muisis at mata at kamasuloan. Ay roro dewa masulo, kanya garimanan way kalyam. Ay katsi, Diyus nu nafalag at fagmadaragangun sa takate fag Suguwan, 8glabi yay at Masine fag Falad nu gfalag at madaragang fag fagbulun. 9Dewa te, ka fag fatuyanan ebi tagfate taw, kanya e fagmasineun tuwa, ay glabi yay dawdaw katsi at bagu fag fatuyanan at fagmasineun anway nafasadi at taw sas Diyus. 10Anway katanya, nalyam wan ebi fag suguwan at fagmasineun, teway natubus wan at taglabi fag fagmasineun. 11Ebi at kinlangfe nu e fagmasineun tuwa, kaugat wa ro at yud kalyam faggugat nu e fagmasineun.

12Nu katanya tuwa em fagsegun, di ami kapla gfagbulun. 13Di ami kata Muisis tagtabun at mata laman taw Israel wa glag at masulo tagarimanan kalyam. 14Ay at matuyan, taw Israel ya ntuyan at masuwad, teway anggan katsi kata yay gugat nu e fantabun kaduge gtap Muisis at rirukan. Ka fag fantabun malyam wan nu si tuwas tam Fun Isus. 15Ay anggan katsi, kata yay e fantabun at amatanganan galay gtap Muisis at ngay rirukan. 16Ay roro sik tagfaning sa tam Fun, tagtabun sat amatanganan malyam wan. 17Tam Fun ay at Masine fag Falad sadi way. Ay nus nga sinu fag taw tam Fun at Masine fag Falad nut si tuwa anya, kanya kata wa nu malfasan. 18Anway katsi, fagayu we fantabun wan at mata. Ay glag wa tam tam Fun at fagmasineun, ay ka fag fagmasineun siginan wa tam Fun at Masine fag Falad tagfasaman tam ugali, laman tam ugali kata yangay tam Fun at ugali. Ay umkugat tam fagmasineun.

Currently Selected:

2 Kurintu 3: TAWEAST

Highlight

Copy

Compare