2 Kurintu 5

Tam Fagbanwanan sas Banwa

1Nasaful watam te, tam bilug ste swa daga kata way sik bale takarasras. Ay dewa katanya, e sik bale yay ban tam sas banwa, sa tam Diyus naawat at yud e fakatabuwan. Ay bunwa taw at naawat. 2Ay katsi tam bilug ste swa daga gatakan way gugat anway kaumsig watam nansulun tagsas banwa fag bilug. 3Anway nu nasulun tuwa tam, di tam kata sik taw at yud e lanbung. 4Kaduge tam gleleg ste fag bilug, kabalu way tam teway gatakan tam. Bunwa te, kaumsig wa tam kate, tam fakaumsigun antuwa te, umke bilug tam bagu, laman umtubus wan tam bilug takate sat yud kate fag bilug. 5Diyus wan at nafamasadan laman mul tam at bagu fag bilug. Ay katsi nafatsi wa antam at Masine fag Falad, at famatuyanan sa antam.

6Ay nu katanya, manabayan tuwa em amatanganan, dewa ami nasaful te, kaduge tam e bilug ste swa daga, ya tam maasakbo sa tam Fun at nafamasadan fag fagbanwanan sas banwa. 7Anway gugalian tuwa tam e fagafanudun sa anya, ay bundi sa tam nalag nus nge wain tagste swa daga. 8Mafamasadan wami gubun tagsi emi katsi fag bilug, laman nanbanwan sa tam Fun at fagbanwanan. 9Ay dewa tuy fag bilug ay dewa tam naubun tuy tam bilug, tam fasadan te, laman gfauseganan tam tam Fun. 10Anway fagayu ban tam nansalubang yay tam sa tam Fun Isus at daga salubangan. Mul ban tam at famalus nus nga setaw tam nafagbulun katsi kaduge ste fag bilug, masine ay yud.

Em Foyungan at Nafasadi at ngay Taw sas Diyus

11Kalimu wami sa tam Fun, nu katanya, gugatan ami gfoyung sa sangay taw laman gafanud ban sa anya. Diyus nasaful wan em ugali. Ay ku ayupan, anggan am, nasaful tuwam em ugali. 12Dewa ami nafoyung ayu em fagbulun at masine, at masuwad bunwa te, segi emi. Em fagnafoyungun at masuwad antuwa te, laman guseganan tuwa ban am sa emi, ay laman e famalus tuwam sa sangay taw taguseganan nus nge wain ste swa daga, ay bunwa tagsi at amatanganan fiya fiya. 13Ay fagalay ami kata yud e amatanganan, kanya sa ways Diyus. Ay roro nu masine tuwa em amatanganan, at masuwad te, laman e fanambagun ban am. 14Tam Fun Isus at fakafanyuun tagmagurang emi. Ay nasaful ami te, sadi wadi at kinkate laman sas fagayu taw. Ay nu katanya, fagayu taw kata yangay nu nkate. 15Tam Fun Isus at faginkateun laman fagayu taw e leleg tuwa, ay bundi sa anya mandi, antuwa sa tam Fun Isus at kinkate ay indog gleleg laman sa sangay taw.

16Ay nu katanya, katsi ami, wami gamatangan sik taw at ugali kata at yud gafanud nu gamatangan. Ebi katanya nu gamatangan ami sa tam Fun Isus. Ay roro katsi wami gamatangan takatanya. 17Anway nus nga sinu at kinsadi sa tam Fun Isus, kanya sik bagu wa fag taw. Naubun wan at dan fag ugali. Ay bagu wan at ugali. 18Kanya fag ngay fagbulun siginan was Diyus, at nafasadi antam sa anya, siginan tam Fun Isus at fagbulun. Ay kanya at nasugu emi laman nanfoyung sa sangay taw laman umsadi yangay sa anya. 19Katatuy em foyungan te, Diyus nafasadi fagayu taw sa anya siginan tam Fun Isus, ay di gtap ka fag ngay taw at ngay asalanan. Ay ami wan at nasugu laman nanfoyung ka fag barita. 20Fakatanyaun, ami wan tam Fun Isus at nasugu. Ay Diyus gyafalongun ayu te, asadii wa sa anya. 21Tam Fun Isus di batang e asalanan, ay roro anway sa antam, Diyus natap anya kata at ke asalanan, laman siginan anya, Diyus tumap antam yud e asalanan.

Currently Selected:

2 Kurintu 5: TAWEAST

Highlight

Copy

Compare