2 Kurintu 1

Tagriruk ay at ngay Tagtap

1Aw, Pablu. Tam Diyus nafili wa angku laman tam Fun Isus at Nasugu at sadi. Ami duwa tam fadugsay, Timutiyu, griruk ami sa ayu, Diyus at ngay taw sis fulan Kurintu, ay anggan sas Diyus at ngay taw sis talun Akaya.

2Igdarangin aw sa tam Diyus tam Tama ay sa tam Fun Isus te, famanyuni ay fanabayani ayu.

Pablu Guseganan sas Diyus

3Gseg watam sa tam Diyus, tam Fun Isus at Tama. Kanya tam Tama tagfangafanyu, ay tam Diyus at tagfabitsug tam amatanganan. 4Ay kaduge tam gdalan ngay mataka, kanya gfabitsug tam amatanganan, laman siginan at nafabitsugan tam amatanganan anggan itam mafafabitsug tuwa tam tam iba at ke natakan. 5Ay nus nga setaw tam fagdalanun mataka anway sa tam Fun Isus, kayu ginan yangay anya nu gfabitsug tam amatanganan. 6Ay dewa ami gatakan, kanya gfabitsug ay amatanganan, ay laman umlangfe yangay am. Ay Diyus nu nafabitsug tuwa em amatanganan, kanya gfabitsug yangay ban ay amatanganan. Nu katanya tuwa, maasungatan tuwam kata em ngay nadalan fag ngay mataka. 7Ay matvngvd em fagsegun sa ayu, teway nasaful wami te, galay am gatakan kata emi, gfabitsug yangay ban ay amatanganan kata nu gfabitsug em amatanganan.

8Kaumsig ami nu sumaful am em ngay nadalan mataka sas talun Asia. Mason way ngap em nadalan fag ngay mataka. Katvngvdan nu gatakan ami, wami bangan e fagsegun gleleg. 9Nu gayup ami, ginanya waro ami. Fakatanyaun mangaro laman sumaful ami te, lag gseg em fagmabitsugun mandi, afanudi tuwa sas Diyus at tagfaleleg sat ngay kinkate. 10Ay kanya nafalangfe tuwa emi siginan ka fag tagfauri tagafateun emi, ay taba wa gfalangfe emi. Ay gafanud ami te, gfalangfe yay ban gugat emi. 11Ay am wa ban tagtarabang emi anway gdarangin tuwam emi. Nu katanya, ngayu ban taguseganan sas Diyus, anway sa at fagbulun sa emi, ay sa at famalus sa ay ngay darangin.

Inbali yay Pablu Fasadanan nu Gananlagun sas Taw Kurintu

12Wami kapla glong te, matuyan tuwa ami sa sangay taw, ay kaugat wan sa ayu. Kanya em fagsafulun bundi siginan swa daga fag fagsafulun, siginan tuwas Diyus. 13Griruk ami sa ayu, laman mafatap tuwam ay sumaful tuwam at masuwad. Ay ku fakaumsigun deyud am fiya gsaful emi, e fagsegun aw te, bandi ban sumaful yay am fiya fiya emi, 14laman di ban am e fakaplaun emi, ay di ami e fakaplaun ayu gina mdasug tam Fun Isus at menit.

15Anway sa ku fagafanudun, inkumsig aw nanlinggat ayu ebi, laman ban kaugat yay nu an am mafantarabang. 16Ku fasadan dumalan aw sanya gina aw glo sas talun Masidunya. Ay nu kafoli kwa ban gdalan kyangay sanya laman gina kban glo sas talun Udiya gtarabang yay am angku. 17Katanya satu ebi ku fasadan. Ay katsi anway sa ku nafasadanan takatanya, go gamatangan am te, gfainbalian kway? Ay go nu gamatangan aw kata way ste swa daga fag ngay taw, nu nalong te, “Kin” at masuwad “Yaya” mangaro? 18Igdi, nus nga setain tam Diyus nu matuyan, katanya yangay em longan sa ayu, matuyan tuwa. Wami nalong te, kin, nu dway katanya.

19Ami tulu, aw ay Silas ay anggan Timutiyu, nafoyung ami sa ayu sa baliwas Diyus at Baguwama, kanya tam Fun Isus. Ay tam Fun galay nalong te, kin, kanya wa gfainfolian at longan, gurungan wa fiya. Ay kanya gfagurungan wa fiya at ngay nafatuyanan. 20Tam Fun wan tagfagurungan fagayu Diyus at nafatuyanan. Katanya tam fagmafalongun gina tam gseg sas Diyus te, kin, katanyai tuwa, ay takatanya gfauseganan tam anya. 21Diyus wan tagfatvngvd antam, nu nsadi tuwa tam sat nafili fag Fun. Ay kanya wan at nafili antam. 22Ay kanya yangay at nafatsi antam sik fagsafulan te, Diyus wa tam at ngay taw. Ay kanya yangay at nafatsi antam at Masine fag Falad, sik fagsafulan te, gfagurungan wa ban fiya fagayu at nafatuyanan sa antam.

23Diyus wan at nasaful te, matuyan ro ku longan sa ayu. Ebi ku fagyudun natunglus sanya sa ayu sas fulan Kurintu, laman di am kabalu siginan ku nalongan. 24Wami dawdaw e suguwan matvngvd sa ayu sa ay fagafanudun baliwa, anway matvngvd wan ay fagafanudun. Em fakaumsigun gtarabangan tuwa tam laman guseganan tuwam.

Currently Selected:

2 Kurintu 1: TAWEAST

Highlight

Copy

Compare