1 Kurintu 16
16
At Nafon sa sangay Tagafanud sas Talun Udiya
1Ay katsi, sa ayu baliwa ay fanarabangun sas Diyus at ngay taw sas talun Udiya, faningi tuwa kata ebi ku longan sa sangay tagafanud sas talun Galasya. 2Kayu ginan sik buknga linggu fagayu am at sadi, fasamani wan sik afud ay nafabul, ay fainfaluwani kayu ay nafabul. Ay fafuli laman gina aw kadasug, bunwa ginanya nu gfaful am. 3Ay nu ndasug kban sanya, gfalo akwa sas Erusalem ay nafili fag ngay taw, laman nanguba ay nanfon sat ngay tagafanud sanya. Ay rumiruk aw laman gfasaful te, kanya wan ay nasugu fag ngay taw. 4Ay nu at fakaumsigun nu aw tuwa sigon taglo sas Erusalem, gtaban kwa ban.
Pablu at Fasadan
5Ay gina ban aw siginans Masidunya, ku fasadan, dumalan akban sanya sas Kurintu. 6Ay nu ndain lumugo aktuwa ban sirut nut sanya aw. Gfalangfean kwa ban at matis fag lungud, laman gina aw ban glo e fanarabangun tuwam sa ku ngay nayudanan. 7Dakwa kaumsig nu gdalan kway sirut sa ayu. Ku fakaumsigun, glugo aktuwa nut sanya aw maful ayu, tam Fun nu kaumsig tuwa ban. 8Ay katsi ste akyay sis fulan Efesu yap ngay indasug fagmafulun at ngayan Pentekustes. 9Anway iste e matvngvd yangay ku fagbulun, ay ngayu yay ktaw takaumsig gdungugan ku foyungan, dewa ngayu tagsalag.
10Ay Timutiyu nu ndasug ban sanya, fatvngvduni tuwa anya laman di kapla gina maful sa ayu, anway kanya gfagbulun yangay sa tam Fun, kata angku. 11Dangay am gfalingun anya. Ay kanya nu glo wan, tarabangi tuwa anya laman umfoli tuwa stiye sa angku. Ay aw, igfanya akway anya nu kadasug gfasfuwan tiba tam ngay fadugsay.
12Ay nu sa baliwa tam fadugsay Apulus, nalong aw te, nansiboi ayu sanya gfasfuwan tiba tam ngay fadugsay. Ay roro mangaro, ya mafafanansibo ayu sanya. Nu sumanya gina yay ban inke lungud.
Pablu at Fakatabuwan fag Longan
13Matagakani ay fatvngvdi ay fagafanudun. Maseganamai ay matvngvdi. 14Nus nga setaw ay fagbulun, falagi te, kafanyu tuwam.
15Ku ngay fadugsay, nasaful wam te, Estefanas fag talanan taguna tagafanud sas talun Akaya. Ay ka fag ngay taw nafon at bitsug sa nu gfagbulun sas Diyus at ngay taw. 16Nu katanya, matvngvd nu glong aw sa ayu te, faningi takatanya fag ngay taw ay sas fagayu tagfagbulun sa tam Fun.
17Ay guseganan aw sas tuluk ama nu kadasug, Estefanas, ay Furtunatu, ay Akaiku. Anway dewa gyud am ste, kanya gungbus tuwa ayu, ay kanya gfagbulun ay fagyudun mafafagbulun. 18Kanya tagfabitsug ku amatanganan ay anggan ay amatanganan. Fauseganani tuwa takatanya fag ngay taw.
19At ngay tagafanud sas talun Asia ginto te, “Go manabayan tuwam?” Akila ay Prisila anggan at ngay tagafanud at maful si at bale ginto fiya fiya te, “Go manabayan tuwam?” anway insadi tuwam sa tam Fun. 20Ay anggan fagayu tam fadugsay ste ginto yangay te, “Go manabayan tuwam?” Ay gina am nafablang ay iba, famatuwani tuwa e fakafanyuun.
21Anggan aw Pablu, ginto kyangay ayu, “Go manabayan tuwam?” Aw wa long at nariruk tuy.
22Nus nga sinu fag taw nu dway kesug tam Fun, umke faurianan ban dawdaw nangus sa anya.
Em Fun, adasugi wan!
23Igdarangin aw sa tam Fun Isus te, famanyuni ayu. 24Kesug aw ayu fagayu, ku ngay fadugsay sa tam Fun Isus.
Kin, katanyai tuwa.
Currently Selected:
1 Kurintu 16: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
