2 Kurintu 2

1Nu katanya, naamatanganan aw te, kya nansibo ayu, laman di am e fakabaluun siginan angku. 2Anway nu gfabaluwanan kway ban ayu, sinu yay ban tagfauseganan angku? Yaya wan! 3Katanya ku fagnarirukun sa ayu ebi laman nu nansibo kban sanya sa ayu, di am kabalu angku, teway am wa nangus tagfauseganan angku. Ay intuyan kwa te, nu guseganan aktuwa, anggan am, guseganan yangay am. 4Ay gina aw griruk sa ayu, kabalu aw dawdaw, ay guyway aw. Ku fagnarirukun, dakwa nanfabaluwanan ayu, antuwa te, laman gfasaful aw ayu te, kesug aktuwa dawdaw ayu.

Falyami at ke Asalanan

5Ay galay e nafalimatan sa tibak taw, bundi aw at nafalimatan, anggan am fagayu. Dewa aw nalong katanya, dakwa gfalabi. 6Nu katvngvd anya at asalanan, balikam ay faurianan sa anya. 7Nu katanya, falyami tuwa at asalanan ay fabitsugi at amatanganan, laman kanya di dawdaw gamatangan ay di kalukme at amatanganan. 8Matvngvd nu glong aw ayu te, falagani tuwa anya te, kesug tuwam anya.

9Katatuy at sadi ku fagnarirukun sa ayu ebi, laman sumaful aw te, go gfaning tuwam ku longan fagayu sa ayu. 10Nu nafalyam tuwam sik taw at asalanan, anggan aw gfalyam kwan. Ay nu nafalyam kwan, tam Fun Isus wan tagfatuyan te, nafalyam kwan ka fag taw at asalanan laman e fanambagun tuwa ban am, 11laman di tam galukan Satanas at ngay fagbulun. Anway gsaful watam at ngay fasadan.

Pablu at Fagafanawaun ay at Fagusegananun

12Gina aw indasug sas fulan Truas laman nanfoyung at Masine fag Barita sa baliwa tam Fun Isus sanya, tam Fun Diyus nafon angku sik lungud laman magbulun aw takatanya. 13Dewa katanya, dakwa ganabayan, anway dakwa nalag tam fadugsay Titu sanya. Ay nu katanya, nalo akwan sanya ginan ay natunglus akwa sas talun Masidunya.

14Guseganan tam sas Diyus, anway e fanbabo watam sa tam naasadian sa tam Fun Isus. Siginan em foyungan, Diyus nafasaful sas fagayu talun at ngay taw Isus at ugali. Ay ka fag fagsafulun katvngvd sik bebanglu nu kaayuk sas fagayu talun. 15Ay kata wa tam sik mabebanglu fag anyun sas Diyus. Ay ka fag bebanglu ndasug sas kinlangfe fag ngay taw ay manga sat takafaurianan fag ngay taw. 16Sa sangay takafaurianan fag ngay taw, kata ami sik bayuk at mafangkate. Ay roro sat kinlangfe fag ngay taw, kata tuwami sik bebanglu tagfon leleg. Sinu ro at mafafagbulun katvngvd anya? 17Wami kata tibak taw tagfabili Diyus at longan laman umke singku. Ay roro Diyus gsaful way em ngay fagbulun, ay kanya wan at nasugu emi ay gafanud wami sa tam Fun Isus.

Currently Selected:

2 Kurintu 2: TAWEAST

Highlight

Copy

Compare