1 Tesalunika 4

Tam Diyus at Fakaumsigun fag ngay Ugali

1Em ngay fadugsay, ebi nafoyung wami ayu tam Diyus fakaumsigun fag ngay ugali. Ay nafaning wam fiya katanya. Ay katsi, em fagetun fiya fiya sa ayu, get ami ayu te, faugati tuwa nu an am gfaning em foyungan ayu. Mafalong tuwami katanya, teway itam fagayu tam Fun Isus tam at taw. 2Nu katanya, faugati tuwa nu gfaning am, teway igsaful wam te, kanya tam Fun Isus wa at ngay foyungan.

3Diyus fakaumsigun, ay fagbulun, at maumsigi tuwa sa anya. Nu katanya, nu bunway am sik daduwa, lag kalong kalong nantedtedan. 4Am fagayu, lag faning ay ngay fakaumsigun at mauri. Ay fagbulun, at maumsigi tuwa sa tam Diyus, ay at yud mapla sas taw. 5At yud saful Diyus fag ngay taw igfaning way gugat gugat at fagalabianun sas mangena, ate ro sas mangama. Ay am, lag faning katanya.

6Itam fag ngay tagafanud sas Isus, lag e fagbulun nu bunway am fagagbilugun. Teway nu nafagbulun way o sam iba at faduwan, ate ro sat unga, ka fag fagbulun malimata dawdaw sam iba. Ay tam Fun Diyus fauri wa fiya emu. Katanya ebi nalong wami ayu, gina ami sanya. 7Faningi tuwa kata em nalong, teway tam Diyus fagnafiliun antam, bundi te, laman faning tam ayuwayu tam ngay fakaumsigun at mauri. At fagnafiliun antam, antuwa te, laman tam fagbulun at maumsig tuwa sa anya. 8Ay sik taw nu kamabo way kanya fag foyungan, at fakamaboun bunwa taw at ke longan. Tam Diyus wa elongan at fakamaboun. Ay glong ami ayu te, dangay katanya, teway tam Diyus nafon wa ayu at Masine fag Falad.

9Ay katsi e fagalongun ami sa baliwa nu an am kadkafanyuwan. Dewa katanya, gamatangan wami te, deyud wan em nalong sa ayu, teway nasaful wami te, tam Diyus wan at nafoyung ayu nu kadkafanyuwan am. 10Madyay kafanyu tuwam fagayu tagafanud sa tam Isus sanyas fagdaul talun Masidunya. Ay dewa ami nasaful katanya, get ami ayu te, faugati tuwa nu an am kafanyu ay iba tagafanud sa tam Isus.

11Ay glong yangay ami ayu te, saruyi tuwa nu gananfaaringanganun am ay iba. Ay lag fasalag ay iba nu gfagbulun. Ani tuwa ebuluni. Katanya fag ngay suguwan, ebi nalong wami. 12Ay faningi tuwa, laman di am igsefu ay iba, ay laman at ngay taw si ay ngaba dayu lumag, te, ay leleganan masine tuwa.

Tam Isus ban nu Kafoli

13Em ngay fadugsay, e fagafoyungun yay ami ayu. Nanfoyung wami ayu sa baliwa at ngay tagafanud sa tam Isus at kinkate, laman dewa e naguna ayu, di am dawdaw kabalu katvngvd at yud gafanud fag ngay taw nu kabalu at kinkate. At ngay yud gafanud sa tam Isus, mason dawdaw nu kabalu at kinkate, teway ka fag ngay taw we fagsegun te, umleleg yay. 14Ay roro itam, gafanud tuwa tam te, tam Isus ebi dewa inkate, inleleg yay fiya. Nu katanya, itam fag ngay tagafanud sa tam Isus, gafanud yangay tam te, dewa tam inkate, tam Diyus igfaleleg yangay antam laman umful tuwa tam sa tam Isus.

15-16Katatuy tam Fun Isus at foyungan antam at kumgurungan ban: Tam Fun umdaga ban siginans banwa. Ay kadugenya, kanya guro dawdaw. Igsugu. Ay tam Diyus fanuguwan fag falad at tiba tungud, kanya muro yangay dawdaw. Ay ginanya, e guyup yangay dawdaw si tam Diyus fagbudyungan.

Ay tam Fun Isus nu ndaga wa ban, itam fag ngay tagafanud at yud inkate, wa tam gumuna at ngay kinkate nu kaful sa tam Isus. Bagu tam umful, taguna umleleg yay at kinkate fag ngay tagafanud. 17Ay nu katanya wan, itam fagayu gasfuwan watam umkurug sas ke linyabu. Ay itam ay tam Fun, nangablangan watam sanya, sad kiwang. Ay siginan ban ginanya, maful wa long ban tam gugat gugat sa tam Fun.

18Katanya tam Fun Isus foyungan sa antam. Nu katanya, fodfoyungani wa fiya ka fag foyungan, laman fabitsug tuwam ay sadi amatanganan.

Currently Selected:

1 Tesalunika 4: TAWEAST

Highlight

Copy

Compare