1 Tesalunika 5

1Em ngay fadugsay, wami nanriruk sa ayu te go ginain tam Fun Isus nu kadasug. Gamatangan ami te, deyud wan katanya em nariruk. 2Fakatanyaun, nasaful wam te, roro we gsaful. We gsaful te ginanya tam Fun Isus nu kadasug. Kata yangay sik tagbilug bale, wa gsaful te, sik takamul umdasug ro. Ay roro tagfangkamul nasakbo wa gugat sat bale. 3Katanya yangay ban at ngay taw sa sangaba daga. Ginanya fag lungud, at ngay taw gsulitanan way ayuwayu te, “Katsi long, manabayan wa long tam. Wa tam e nalimuwan.” Ay roro ginanya tam Fun Isus umdasug way sigad. Ay nu katanya, kanya fag ngay taw umfauri way sigad.

Kanya fag faurianan nu kadasug, kata yangay sik mangena tagfafiyon, nu bagu gamatang, igfasalug at ngenge. Aro taw ka fag mangena wa gtagak, te ginanya wan at menit. Ay katanya yangay fiya fiya at ngay taw at yud matagakan. Ay nu katanya way, tam Fun Isus gina mdasug, kanya fag ngay taw wa mlagyu ka fag faurianan.

4Ay roro am, em ngay fadugsay, di am katanya. Bundi am sik ngay taw tagbanwan sad marum. Antuwam sik ngay taw tagbanwan sad mayamag. At masuwad, Diyus wam at taw. Ay nu katanya tuwa, di ban am kalipsik dewa tam Fun Isus kadasug. Dewa kata sik takamul, gsakbo sat usama bale, we nafatagak, dewa katanya, gina ban tam Fun Isus kadasug, di ban am kalipsik.

5Teway itam fagayu tam fagyudun ban kalipsik, igbanwan watam swa menit, sad mayamag. At masuwad, itam wan Diyus at taw. Bundi tam kata at ngay taw tagbanwan sad yabi, tagfaning way sas mauri baliwa. 6Nu katanya, glong ami te, maamatanganani tuwa nu gleleganan tam. Dangay gafaningan at ngay taw tagbanwan sad marum. Kanya fag ngay taw kata way fiya fiya igtiyug sad yabi. We fagamatanganun sas Diyus baliwa. Ay roro itam, matagakani tuwa gugat, ay faamatanganuni tuwa tam ngay fagbulun.

7Sad yabi, at ngay taw wa mayamag nu gamatangan. Teway sad yabi, at ngay taw fagbulun, anway gtiyug. Ay tibak taw ginum way fangaranug. Nu katanya, at ngay taw, wa mayamag at amatanganan si sad yabi. 8Gina tuwas wa menit at ngay taw nu gfaamatanganun at ngay fagbulun. Go nafabul wam katanya em longan at masuwad? At masuwad, nu gbanwan tuwa tam sad mayamag, faamatanganuni tuwa tam ngay fagbulun.

Itam fag ngay tagafanud, katai tuwa sik sundalu nu masulunan at ngay fanbalabag si at ngaba bilug. At ngay sundalu ste si tam ngay talun, antuwa e gbiya daw fag fanbalabag sit alfuyu, laman tiba famate wa karuk. Ay e fanbalabag yangay sit dubdub. Ay nu gfasa watam antam, kanya fag fanbalabag si tam alfuyu, kanya roro sik amatanganan tagfanseg sa tam Fun Isus, te kanya tumaban ban antam sas banwa. Ay kanya fag fanbalabag si tam dubdub, duwa at masuwad. At sadi, nu gafanud tam sa tam Isus. Ay at sadi, nu kafanyu tam tibak taw.

9-10Ayu ay amatanganan, fakatai tuwa em nalong. Fakatanyaun, teway tam Diyus wa nafili antam laman at fagnanfauriun. Antuwa ban at fagnanfalangfeun. Kanya wan ebi tam Fun Isus faginkateun. Kanya inkate laman ban umful tam sa anya. Ay dewa ban tam matean ay dewa tam gleleg gina tam Fun Isus kadasug, umful yay ban tam sa anya. Ay gbanwan wa ban tam maful anya. 11Nu katanya, fatunglusi tuwa nu an am fadfatvngvdan ay iba amatanganan.

Sik ngay Fangatulun sa sangay Tagafanud sa Tam Isus

12-13Em ngay fadugsay, at sadi ya mangaro em fagalongun sa ayu, masinei tuwa ay ngay amatanganan sa ay ngay tagmagurang sas Diyus baliwa. Dangay e amatanganan igfalingun anya. Fangkabat esugi tuwa anya. Teway kanya fag ngay taw gugatan tuwa nu gfatvngvdun ayu ay nu gfatungul ayu sat matuyan. Ay glong yangay ami ayu te, dangay ayuwayu garingangan.

14Em ngay fadugsay, sik taw sanya si ayu galay igfamomuyun, ani tuwa foyungi anya, te, “Lag katanya. Fagbulunani tuwa.” Sik taw sanya si ayu galay kafanalo at amatanganan, ani tuwa fabitsugi. Ay sik taw sanya si ayu galay galabawan sanyat sanya at mauri, ani foyungi anya laman sumaful tuwa igbabo. Ay glong yangay ami ayu, te, dangay igfangalimata, dewas nganday fag taw.

15Ay dewa sik taw e nafagbulun mauri sa ay usama, lag fabayan ay usama nu nanfagbulun mauri sanya fag taw. Ayu ay fagbulun, at masinei tuwa. Am fag ngay tagafanud sa tam Isus, masinei tuwa ay fagbulun sa ay iba. Ay dewa nus nganday fag taw, masinei tuwa ay fagbulun sa anya.

16Nu itam wan tam Fun Isus at ngay taw, tam Diyus e fakaumsigun iglag si antam sik ngay ugali. Useganani tuwa faggugat. 17Faladlayunani tuwa nu gdarangin am. 18Ay dewas nga setaw nu mabanwan am, useganani tuwa sa tam Diyus. Katanya tuwa fag ngay ugali tam Diyus at fakaumsigun iglag si antam, nu itam wan tam Fun Isus at ngay taw.

19Em ngay fadugsay, at sadi em fagalongunun ayu, sa baliwa at Masine fag Falad. Glong ami te, dangay igsalag at Masine fag Falad nu gfagbulun. 20Galay Masine fag Falad e nalong sa sik taw, ay kanya fag taw igfoyung ayu, kanya dungugani wa fiya. 21Ay kabayan, lag sigad gafanud sa sangay taw taglong te, “Tuy ku longan siginan at Masine fag Falad.” Asafuli tuwa filii, te go sanya ginan wa fiya. Ay glong ami ayu te, ay fagfaningun, fagayu way at masine. 22Lag faning dewas nga setaw fag mauri.

At Fakatabuwan fag Longan

23Em ngay fadugsay, katsi igdarangin ami sa tam Diyus, sat tagfanabayan antam. Igdarangin ami te, tam Diyus nangus tunglusanan tuwa nu gfasine ayu, laman ay fagbulun fagayu, umkata tuwa at fakaumsigun. Tam Diyus nangus, fatunglusi fasinei ay amatanganan fagayu, ay ay ugali fagayu, anggan kabat tam Fun Isus umdasug. Ay gina long ban tam Fun Isus umdasug, ginanya long ban masadi wam fiya fiya sas Diyus. Katanya em darangin. 24Em ngay fadugsay, kanya em darangin nasaful ami te, umgurungan wa fiya. Teway tam Diyus wan at nafili ayu. Ay nus nga setaw at nalong, kanya fagurungan tuwa.

25Ay katsi get ami ayu te, anggan am, darangini yangay emi.

26Foyungi sa tam ngay fadugsay sanya te gamatang yay ami ayu fagayu, ay kesug tuwami ayu.

27Ay aw Pablu, iglong aw ayu te, fadungugi tuwa tuy ku nafauba fag rirukan sas fagayu tagafanud sa tam Isus sanya si ay fulan. Tam Fun wan tagsaful te, e suguwan aw ayu katanya, nu katanya faningi wa fiya.

28Tam Fun Isus, kanya tumarabang nangus ayu. Ste way kabat em rirukan.

Currently Selected:

1 Tesalunika 5: TAWEAST

Highlight

Copy

Compare