1 Tesalunika 3
3
1Em ngay fadugsay, kaduge ami gyud glag ayu, kaayu wan em amatanganan, te setain am manga katsi sanya. Ay nu katanya, wami maabaris. Nasulitanan ami te, ami at duwa, maubunan way ami stes fulan Atenas, 2ay at sadi, tam usama Timutiyu, kanya taglo laman nangadasug sanya sa ayu. Ay kanya Timutiyu, kata yangay emi, anyangay gtarabang Diyus nu gfadasug at fagalongunun sa sangay taw. Igfoyung yangay sa sangay taw at Masine fag Barita sa baliwa tam Fun Isus. Nu katanya, nasugu ami tam usama sa ayu laman kanya fatvngvd yay ay amatanganan, laman kaugat tuwa baliwa nu gafanud am sa tam Isus. 3-4Nu katanya tuwa, dewa tibak taw igfauri ayu sanya si ay fulan, di kasirut nu gafanud am sa tam Isus. Ebi, kaduge ami sanya si ayu, iglayun wan nu glong ami ayu te, nu gafanud watam sa tam Isus, tibak taw kalimata way antam, ay igfauri wa antam. Nasaful wam katanya. Ay katsi, e gfauri wa fiya antam, dewa sanya si ayu ay ste si emi.
5Ay roro kaduge aw gugat gugat gamatangan te, e gfauri wa dawdaw ayu, aw Pablu, kaayu wa dawdaw ku amatanganan, te go tain manga am sanya katsi. Tiba ku amatanganan, gamatangan aw te, labon Satanas nafataban wa ayu sat mauri. Ay gamatangan aw te, nu katanya way ro, kanya ebi em naloan sa ayu, wa ban umke masuwad. Nu katanya, kata ku longan aro, kwa nbaris. Gyasafulun aw dawdaw te go matvngvd tuwa nu gafanud am sa tam Isus. Katanya ku fagnasuguun tam usama Timutiyu laman nanlag ayu sanya sa ay fulan.
6Ay tam usama Timutiyu ebi nananlag wa fiya ayu, ay ebi daw tv, infoli wa stiye sa emi. Ay nafamansulit wemi, te, katanya nu an am mabanwan sanya sis fulan Tesalunika. Ay nu nadungug ami tam usama at nafamansulit, guseganan ami dawdaw, teway nadungug ami te, anggan katsi mangaro matvngvd tuwa nu an am gafanud sa tam Isus, ay igtunglus tuwa nu an am kadkafanyuwan. Ay tam usama nafoyung yangay emi, te, yam nalyaman ebi tam naudgufudan sanya si ay fulan. Guseganan yay am kanya tam naudgufudan. Ay nasaful ami te, anggan am mangaro, kata yangay am emi, te, kasulup yangay am dawdaw emi.
7-8Ay nu katanya, igbiya em fagusegananun. Dewa tibak taw igfatakan gugat gugat emi, em amatanganan, guseganan tuwami dawdaw, teway nasaful ami te, anggan katsi matvngvd tuwa nu an am gafanud sa tam Diyus. Ay katanya em nasaful, kanya wan tagfauseganan dawdaw emi ay tagfatvngvd em amatanganan. 9Ay katsi mason wan nu guseganan ami sa tam Diyus. We mangaugat ya, nu guseganan ami ayu.
10Ay katsi, igfatunglus tuwami gdarangin ayu. Dewas wa menit, ay dewa sad yabi, igdarangin wami, laman lumadlagan yay tam nangus, katsi ban. Teway nu lumadlagan di tam, mafafoyung yay ami ayu ay fagyudun saful sa tam fagafanudun baliwa.
11Katanya em darangin sa ayu baliwa. Igdarangin ami te, laman tam Tama sis banwa ay tam Fun Isus tumarabang emi laman maafoli tuwami sanya sa ayu. 12Ay at sadi em darangin, igdarangin ami te, laman ban kaugat yadi nu an am kadkafanyuwan. Ay laman kaugat yangay nu kafanyu am dewas nga sinu fag taw. Em fagsegun, ginkugatan tuwa nu an am kafanyu ay iba, kata nu ginkugatan nu kafanyu ami ayu.
13Ay igdarangin ami te, tam Fun fatvngvdi nangus ay ngay amatanganan. Fakatanyaun em darangin, laman ban tam Fun Isus guseganan dawdaw ayu, gina ban kafoli stiye tam Fun Isus anggan at ngay ufud siginans banwa. Ginanya ban, tam Tama sis banwa di lumong te e asalanan way am. Kanya nu glag ayu, mafonan wam fiya fiya sa anya.
Currently Selected:
1 Tesalunika 3: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
