Éxodo 23
23
1Ma xawal te bin scuenta lehaw ta c'op. Ma junuc xawac' aba soc te mach'a chopol yo'tan ta yalel te bin ma meleluque.
2Ma xat'un te tsobol mach'atic ya spasic te bin chopol, soc ma xawal lotil testigo te jun yac awac' aba soc, yu'un hich ya xjihn a te chahpanele. 3Soc ma me muc'uc sc'oblal ya xc'oht awu'un te pobre te c'alal ya yich' chahpanele.
4Teme yac atahbe te j'a'tel-wacax o burro yu'un acontra te ch'ayem yu'un, ic'beya suhtel ta stojol. 5Teme yac awil te pacalix ta lum soc yihcats te sburro te mach'a ya yilintayat, ma xawihquitay hilel, ya me acoltay hachel.
6Ma xawac' te ma ba toj ya yich' chahpanel te c'op yu'un te pobre.
7Namaluc me ya xhil awu'un te lotil c'op, soc ma me xawac' ta milel te mach'a mayuc smul soc te mach'a toj yo'tan, como ma ba ya cal te mayuc smul te mach'a chopole.
8Ma xatsac mahtanil scuenta schahpanel c'op, yu'un ha ya sc'atp'ujtes ta ts'o'sit te mach'atic ya yilic q'uinal soc ya showitesbe sc'op te mach'atic toj yo'tanique.
9Ma xawuts'in te jyanlum, como ha'ex ana'ojic bin ut'il ay yo'tan te jyanlum, yu'un ha nix hich jyanlumex c'axex ta sq'uinal Egipto.
Sc'oblal cux-o'tan
10Waqueb ha'bil yac awa'iy awal ta aq'uinal soc yac awa'iy c'ajoj, 11yan ta shuquebal ha'bil ya me awa'be scux yo'tan, mayuc bin ya yich' awel tey a, scuenta yu'un ha ya swe'ic te pobrehetic te ay ta alumal, soc te bin ya xhil yu'unic ha ya swe' te ha'mal chambahlametique. Ha nix hich xapas soc ats'usubil soc te olivo awu'une.
12Waqueb c'ahc'al ya x'a'tejat, pero ta shuquebal c'ahc'al ya me acux awo'tan, scuenta yu'un ya scux yo'tanic te j'a'tel-wacax soc te burro awu'un, soc yu'un ya xjelon xan yip a te yal acriada soc te jyanlume.
13Ich'a ta cuenta spisil te bintic la jcalbeyexe. Ma me xawalbeyic sbihil yantic diosetic, ma me xloc' ta awe'ic.
Te oxeb q'uinetic yu'un jujun ha'bil
14Ya me apasbonic q'uin oxeb buelta ta jujun ha'bil.
15Ya me apas te Q'uin yu'un Pan te ma ba yich'oj levadura. Hich te bin ut'il la jcalbat, huqueb c'ahc'al yac awe' pan te ma ba yich'oj levadura, ta yorahil te u yu'un Abib, como ha yorahil te loq'uex tal ta Egipto. Ma me ayuc mach'a jochol sc'ab ya xtal ta jtojol.
16Soc ya me apas te Q'uin yu'un C'ajoj, ha te sba sit awa'tel, te bin la ats'un ta aq'uinal. Soc ya me apas te Q'uin yu'un Tsobel ta slajel te ha'bil te c'alal yac atsob te sit awa'tele.
17Oxeb buelta ta jujun ha'bil spisil winiquetic ya me stehc'an sbahic ta stojol Jehová te Ajwalil.
18Ma me xawac' soc pan yich'oj levadura te sch'ich'el milbil jmahtane; soc ma me xhil yu'un pajel te sjuhp'ele.
19Te banti mero lec te sba sit ya yac' te aq'uinal ya me awich' tal ta sna Jehová te Dios awu'une.
Ma me xapay alal tentsun ta ya'lel schu' te sme'e.
Ch'ul a'bat yu'un Jehová ticombil ta yiq'uel bahel Israel
20Ilawil, ya jticombat ch'ul a'bat cu'un ta atojol yu'un ya scanantayat ta be soc ya yic'at bahel tey ta lugar te ho'on jchahpanej. 21Ich'a ta cuenta soc a'iybeya te sc'ope; ma me xatoy aba ta stojol, yu'un ma ba ya spasbeyex perdón yu'un atoybahilic, como yich'oj te jbihile. 22Yan teme smelelil yac awa'iybe sc'op soc teme yac apas spisil te bin ya calbate, ha jcontra ya xc'oht te acontratac soc ya ca'be swocol te mach'atic ya ya'bat awocole. 23Te ch'ul a'bat cu'un ya xnahilij bahel awu'un soc ya yiq'uex bahel ta sq'uinal te amorreo, heteo, ferezeo, cananeo, heveo soc te jebuseo; ha'ic te jc'axel ya jlajinlan. 24Ma xaquejan aba ta stojol te diosetic yu'unic, ma xawac' aba ta a'batinel yu'unic, ma xapas te bin ya spasic, jc'axel me xalajinlan soc jc'axel me xawuyticlan te bahlal tonetic tec'ajtic yu'unique. 25Ya me awac' abahic ta stojol Jehová te Dios awu'unic, ha ya ya'be bendición te awe'el soc awa'al. Ya jloq'ues chamel ta awohlil, 26soc ta aq'uinal mayuc ants te tojol nax ya xc'ax yal soc mayuc mach'a ma ba ya x'alaj. Ya cac' te ya sts'acay te jayeb c'ahc'al ya xcuxajat.
27Ya me jnahiltes bahel awu'un te xiwtesel cu'un soc ya cac' xhowiy sjolic spisil te nacionetic banti ya xc'ohat, soc ya cac' te ya xloq'uic ta ahnel ta atojol te acontrataque. 28Ya jnahiltes bahel xux ta atojolic te ya stenic loq'uel ta atojol te heveo, te cananeo soc te heteo. 29Ma ba ya jtenticlan loq'uel ta atojolic ta junax ha'bil scuenta yu'un ma ba jochol ya xhil te q'uinal soc ma ba ya xp'ohl a te ha'mal chambahlametic te ya yuts'inate. 30C'unc'un ya jtenticlan loq'uel ta atojol, ha to c'alal ya xp'ohlat soc yac awu'untay te q'uinale. 31Ha sti'il aq'uinal ya xc'oht cu'un te Mar Rojo c'alal ta mar yu'un filisteohetic, soc ta jochol taquin q'uinal c'alal ta muc'ul-ha' Éufrates, yu'un ya ca'bat ta ac'ab te mach'atic nahinemic tey ta q'uinal, soc ha'at yac atenticlan loq'uel ta atojol.
32Ma xachap ac'opic soc, o soc te diosetic yu'unique. 33Ma xawac' nahinicuc ta aq'uinal, teme repente ya ya'bat ale amul ta jtojol ta sch'uhunel te diosetic yu'unic, te ha ayacolic ya xc'oht, xchi te Jehová.
Currently Selected:
Éxodo 23: TZH
Highlight
Copy
Compare
Share
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
