Éxodo 24
24
Moisés soc te mamaletic ta Wits Sinaí
1Te Jehová hich la yalbe te Moisés: Mohan tal ta stojol Jehová soc te Aarón, Nadab, Abiú, soc lajuneb schanwinic (70) mamaletic yu'un Israel; soc namal to ayex a yac ach'uhuntayic. 2Ha nax te Moisés ya xnohpoj tal ta stojol Jehová; te yantic ma me xnohpojic tal stuquelic soc ma me sjoquinic mohel tal te pueblo, xchi.
3Te Moisés tal yalbe te pueblo spisil te bin la yal te Jehová soc spisil te mandariletic. Ta spisil te pueblo junax la sjaq'uic: Ya jpascotic spisil te bin yalojix te Jehová, xchihic.
4Te Moisés la sts'ihbay spisil te bin la yal te Jehová. C'alal hahch ta sab, la spas scajtajib smahtan Dios ta ye'tal wits soc la stehc'an lahchayeb bahlal tonetic hich te bin ut'il te lahchaychahp sts'umbal Israel. 5La sticon bahel jcolel-winiquetic yu'un te snich'nab Israel te la yaq'uic scohtol chic'bil mahtaniletic soc la yaq'uic jcolel torohetic scuenta mahtaniletic yu'un lamal q'uinal ta stojol Jehová. 6Te Moisés la yac' j'ohlil te sch'ich'el ta muc'ul tazahetic, j'ohlil la stsihtsin ta scajtajib ta chiq'uel mahtanil. 7Patil la stsac te libro yu'un te chapbil-c'op, la yilbe ya'iy te pueblo; hich la yalic yu'un: Ya jpascotic spisil te bin yalojix te Jehová, ya jch'uhuncotic spasel, xchihic.
8Ha yu'un te Moisés la stsac te ch'ich', la stsihtsin a te pueblo, hich la yal: Ha ini ha te ch'ich' yu'un te chapbil-c'op te la spasbeyex Jehová scuenta spisil te c'opetic ini, xchi.
9Hich te Moisés mo bahel soc Aarón, Nadab, Abiú soc lajuneb schanwinic (70) ta tuhl mamaletic yu'un Israel; 10la yilic te Dios yu'un Israel. Ta ye'tal yoc sjel ta limbil zafiro-ton, hich yilel te bin ut'il ch'ulchan c'alal buen q'uepel. 11Pero ma ba la shach sc'ab ta scontrahinel te príncipaletic yu'un te snich'nab Israel; la yilic te Diose, soc we' uch'ic.
12Te Jehová hich la yalbe te Moisés: Mohan tal ta jtojol ta wits, tey yac amahliy a, ya ca'bat pehchel tonetic te banti ts'ihbabil cu'un te ley soc te mandariletic scuenta sp'ijubteselic, xchi.
13Hich hahch bahel te Moisés soc Josué te ya'bat; te Moisés mo bahel ta wits yu'un Dios. 14Hich la yalbe te mamaletic: Mahliyawotcotic li'i ha to teme suhtotcotic talel. Ha ya sjoquinex te Aarón soc Hur; teme ay mach'a ay c'op yu'un, ac'a bahtuc ta stojolic, xchi.
15Hich mo bahel ta wits te Moisés; potsot ta tocal te wits, 16soc te yutsilal te Jehová hul ta sba te wits Sinaí, waqueb c'ahc'al potsol ta tocal te witse. Ta shuquebal c'ahc'al Dios la sc'opon te Moisés ta yohlil te tocale. 17Te yutsilal Jehová hich yilel la yilic te snich'nab Israel te bin ut'il jlajinwanej c'ahc' ta ba wits. 18Te Moisés och bahel ta yohlil te tocal soc mo xan bahel ta wits. Tey halaj a te Moisés cha'winic (40) c'ahc'al soc cha'winic ahc'abal.
Currently Selected:
Éxodo 24: TZH
Highlight
Copy
Compare
Share
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
