Éxodo 22
22
Mandariletic yu'un suhtesbeyel sjelol
1Teme ay mach'a ya yelc'an j'a'tel-wacax o tuminchij, teme ya smil o ya schon, ho'coht j'a'tel-wacax ya suht scuenta sjelol te wacaxe, soc chancoht tuminchij ya suht scuenta sjelol te tuminchije.
2Teme tahot j'elec' te yac ta ochel ta na a, teme ehchentesot soc teme cham, te mach'a ehchenteswan ma ba ya smulin teme chame. 3Yan teme ta c'ahc'alel, te mach'a milawan ya me smulin teme chame.
Te j'elec' ts'acal me ya stoj te bin yelc'anej. Teme mayuc bin ay yu'un, ya me yich' chonel yu'un te yeleq'ue.
4Teme tahot te cuxul to a te yeleq'ue, teme wacax, burro, o tuminchij, ya me stoj cheb buelta.
5Teme ay mach'a ya ya'be sle swe'el schansbahlam ta aquiltic o ta ts'usubil, teme ya yac' ochel ta sts'usubil yan, ya me sjeltaybe te mero lec bin ya xloc' ta sc'al o ta ts'usubil yu'une.
6Teme ay ya shach c'ahc', teme ya stsac bahel c'ahc' te ch'ixileltic, teme ya schic' trigo te tomajtic o ay to ta yawil, o teme ya xlaj ta c'ahq'uel te bin ts'umbile, te mach'a la shach c'ahc' ya me stoj te bintic ya xlaj ta c'ahq'uel.
7Teme ay mach'a ya ya'be sq'uej taq'uin o yan sbiluc te spat-xuhc, teme och j'elec' ta sna te winic, teme tahot te j'elec', ya me stoj cheb buelta. 8Teme ma ba tahot te j'elec', te yajwal na ya me x'ic'ot bahel ta stojol juecetic#22.8 O: Dios scuenta yu'un ya xchicnaj teme ha nix la yich'be te sbiluc te spat-xuhque.
9Spisil te bin ya yich' ich'el scuenta lo'loywanej, teme wacax, burro, tuminchij, c'u'ul, o biluc a te ya xch'aye, teme ay mach'a ya yal: Ho'on cu'un, teme xchihe, schebalic ya x'ic'otic bahel ta stojol juecetic. Te mach'a ya xtahbot smul yu'un te juecetic, cheb buelta ya stojbe te spat-xuhque.
10Teme ay mach'a ya ya'be scanantay spat-xuhc te sburro, swacax, stuminchij, o biluc chambahlamil, teme ay ya xcham, o ehchenaj, o baht ta elc'anel te mayuc mach'a la yile, 11ya me yalic ta jamal ta stojol Jehová schebalic te ma ha'uc la yich'be te sbiluc te spat-xuhque; hich ya xc'oht ta yo'tan te yajwal, soc mayuc bin ya stoj te yane. 12Yan teme baht ta elc'anel, ya me stojbe te yajwale. 13Teme laj ta ti'el ta ti'awal chambahlam, ya me yac' ta ilel te bin hilem, ma ba ya stojbe te bin lajeme.
14Teme ay mach'a ya smajambe schansbahlam te spat-xuhc, teme ma ba tey ay a te yajwal te ya x'ehchenaj o te ya xchame, ya me stojbe. 15Yan teme tey ay a te yajwale, ma ba ya stojbe. Yan teme tojbil, ha nax ya stoj te bin ut'il smajanej.
Yantic mandariletic
16Teme ay mach'a ya slo'loy ach'ix te ma to macbiluc, teme ya sjoquin ta wayel, ya me yac' mahtanil te jayeb ya xc'ambot, soc ya me yic' yihnamin. 17Yan teme ma ba ya yac' te stat te ya xnuhpun soc, ya me yac' te jayeb taq'uin ya xc'ambot hich te bin ut'il stojol ach'ixetic.
18Te j'ac'-chamel-ants ma me xawac' cuxajuc.
19Mach'ayuc a te ya scuch sba soc chambahlam, ya me yich' milel.
20Te mach'a ya ya'be milbil smahtan yantic diosetic, teme ma ha'uc ya ya'be stuquel te Jehová, ya me yich' milel.
21Ma me xawuts'in jyanlum soc ma me xawa'be swocol, como jyanlumex ayinex ta sq'uinal Egipto.
22Ma me xawuts'inic me'ba' ants o me'ba' alal. 23Teme yac awuts'in, soc teme ya sc'oponon, ya me ca'iybe te sc'ope; 24ya me xtihl te quilimba, ya jmilex ta espada soc ya xhil ta me'ba' te awihnamic soc anich'nabique.
25Teme yac awa'be smajan ataq'uin jtuhl te ay ta yohlil te pueblo cu'un, ha te pobre sjoquinejat, ma me hichucat te bin ut'il mach'a ya sc'an sjol staq'uin, ma me xac'ambe sjol. 26Teme yac awich'be hilel scuenta prenda te sc'u'-spac' apat-axuhc, ya me asutbe ta xtibiltay, 27como ha nax te ya smuc sba a, ha sc'u' te ya smuc a te sbaq'uetale. ¿Bin ya smuquix sbaq'uetal ta wayel a? Te c'alal ya yawtayon ya me ca'iybe sc'op, como ho'on Jc'uxultaywanejon.
28Ma me xabohlc'optay te Dios#22.28 O: te juecetic soc ma me xabohlobtesbe sc'oblal te príncipal yu'un te alumale.
29Ma me patiluc yac awa'bon jmahtanin te sit ats'unub-awawal soc te ya'lel ats'usub.
Ya me awa'bon te ba-alal querem awu'une. 30Ha nix hich yac apas soc awacax soc atuminchij; huqueb c'ahc'al ya sjoquin sme', ta swaxaquebal c'ahc'al ya me awa'bon.
31Ch'ultesbil winiquetic cu'un ya xc'ohex. Ha yu'un ma me xati'ic chambahlam te laj ta ti'el yu'un ti'awal chambahlametic; ya me ach'ojbe bahel sti' te ts'i'etique.
Currently Selected:
Éxodo 22: TZH
Highlight
Copy
Compare
Share
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
