Éxodo 20
20
Te lajuneb mandariletic
1Dios la yal spisil te c'opetic ini:
2Ho'on Jehovahon, te Dioson awu'un, te la jloq'uesat tal ta sq'uinal Egipto ta banti nahinat ta mosohil.
3Ma me ayuc yantic diosetic awu'un ta jtojol.
4Ma me xapasbe sloc'ombahil o biluc a te pajal yilel soc te bintic ay ta ch'ulchan, ta bahlumilal o ta ha'etic ta ye'tal bahlumilal. 5Ma me xaquejan aba ta stojolic soc ma me xawich' ta muc', como ho'on Jehovahon te Dioson awu'un, xut'et co'tan, ya ca'be castigo yu'un smul sme'static te yal-snich'nabic ta yoxcajal soc ta schancajal te mach'atic ya yil-o'tantayonic, 6pero ya jc'uxultay bayel ta mil te mach'atic c'uxon ta yo'tanic soc te ya sch'uhunic spasel te mandariletic cu'une.
7Ma me xatojoltabe ta halel sbihil te Jehová te Dios awu'un, como te Jehová ma ba ya yal te mayuc smul te mach'a ya stojoltabe ta halel te sbihile.
8Na'a me te sc'ahc'alel cux-o'tan yu'un yac ach'ultes. 9Waqueb c'ahc'al ya x'a'tejat soc yac apas spisil awa'tel, 10yan te shuquebal c'ahc'al ha me cux-o'tan yu'un Jehová te Dios awu'une; ma me x'a'tejat a, ha'at, aquerem, awantsil-nich'an, awa'bat, acriada, achanabahlam, o te jyanlum te ay ta awohlil. 11Como ta waqueb c'ahc'al te Jehová la spas te ch'ulchan soc bahlumilal, te mar soc spisil te bintic ay tey a, soc la scux yo'tan ta shuquebal c'ahc'al; ha yu'un te Jehová la ya'be bendición te sc'ahc'alel cux-o'tan soc la sch'ultes.
12Ich'a ta muc' atat soc anan, scuenta yu'un naht ya xc'oht aworahil ta q'uinal te ya ya'bat te Jehová te Dios awu'une.
13Ma me xawa'iy milaw.
14Ma me xawa'iy antsiwej; ma me xawac' aba ta antsinel.
15Ma me xawa'iy elec'.
16Ma me xawal te bin ma meleluc ta stojol apat-axuhc.
17Ma me xbic'taj awo'tan yu'un te sna apat-axuhc: ma me xbic'taj awo'tan yu'un yihnam, ya'bat, scriada, j'a'tel-wacax, burro, o biluc ay yu'un te apat-axuhc, xchi.
Te xiwel yu'un te pueblo
18Spisil te pueblo yac ya'iybelic st'ohmel te chahwuc soc te tsantsehwaletic, te yoq'uel te xulubil soc te wits yac ta loq'uel sch'ahilel. C'alal hich la yilic nihquic yu'un soc namal la yac' sbahic.
19Ha yu'un hich la yalbeyic te Moisés: Ha'at yac ac'oponotcotic, ya me ca'iycotic; pero ma me ha'uc ya sc'oponotcotic te Diose, scuenta yu'un ma ba ya xlajotcotic a, xchihic.
20Te Moisés hich la yalbe te pueblo: Ma xiwex. Ha tal ya'iybeyex awo'tanic te Diose, scuenta yu'un ma sch'ay te xiwel yu'un ta atojolic soc te ma ba yac ale amulic a, xchi.
21Te pueblo namal la yac' sbahic, c'alal te Moisés nohpoj bahel ta yihc'al q'uinal banti ay te Diose.
22Te Jehová la yalbe te Moisés: Hich me xawalbe te snich'nab Israel: La awiliquix te la jc'oponex tal c'alal ta ch'ulchan. 23Ma me xapasic diosetic ta jtojol te pasticlambil ta oro o ta plata. 24Ya me apasbon ta puro lum te scajtajib ta chiq'uel mahtanil, tey yac awac' a te scohtol chic'bil mahtaniletic, te mahtaniletic scuenta lamal q'uinal, te tuminchijetic soc wacaxetic awu'unique. Ta spisil lugar banti ya cac' te sna'ojibal te jbihile, tey ya xtalon ta atojol soc tey ya ca'bat bendición a. 25Teme yac apasbon scajtajib ta chiq'uel mahtanil ta ton, ma me xapas ta walubil tonetic, yu'un teme yac awahluy soc a'tejibal, yac abohlobtesbe sc'oblal. 26Soc ma me xmohat ta cajalcaj ta scajtajib ta chiq'uel mahtanil cu'un, scuenta yu'un ma ba ya xchicnaj tey a te banti ma ba macal te abaq'uetale.
Currently Selected:
Éxodo 20: TZH
Highlight
Copy
Compare
Share
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
