Éxodo 19
19
Israel ta Sinaí
1Ta yoxebal u sloq'uelic bahel ta sq'uinal Egipto a te snich'nab Israel, ta sc'ahc'alel nix, c'ohtic ta jochol taquin q'uinal Sinaí. 2C'alal loq'uic bahel ta Refidim c'ohtic ta jochol taquin q'uinal Sinaí banti la spas scampamentohic; tey la spas scampamento a te Israel ta stojol te wits. 3Te Moisés mo bahel ta stojol Dios; te Jehová la sc'opon c'alal ta wits, hich la yal: Hich me xawalbe te sna Jacob, te bin yac awalbe te snich'nab Israel: 4Ha'ex awilojic te bin la jpasbe te egipciohetic, soc te bin ut'il la jcajanex tal ta sba xic' muc'ul jxic soc la jquiq'uex tal ta jtojol. 5Ha yu'un teme yac awa'iybonic jc'op soc teme yac ac'ohtesic ta pasel te chapbil-c'op cu'une, ha'ex me tsahbil c'ulejalil cu'un ya c'ohex ta yohlil spisil te pueblohetic; como ho'on cu'un spisil te bahlumilale. 6Soc ha'ex pueblo yu'un sacerdotehetic soc ch'ul nación ya xc'ohex cu'un. Ha me te c'op ini te yac awalbe te snich'nab Israel, xchi.
7Ha yu'un suht cohel te Moisés, la yic' tal te mamaletic yu'un te pueblo soc la ya'be sna'ic spisil te c'op ini te pasot ta mandar yu'un te Jehová. 8Spisil te pueblo pajal la sjaq'uic: Ya jpascotic spisil te bin yaloj te Jehová, xchihic. Hich te Moisés la yich'be bahel ta stojol Jehová te bin la yal te pueblo.
9Hich halbot yu'un Jehová: Ya xtalon ta atojol ta pimil tocal scuenta yu'un ya ya'iy te pueblo te c'alal ya jc'oponat, hich me ya sch'uhunat spisil ora a, xchi.
Te Moisés la yalbe te Jehová bin la yal te pueblo, 10hich halbot yu'un te Jehová: Bahan ta stojol te pueblo, ch'ultesa yo'tic soc pajel; soc ac'a sac' sc'u'-spaq'uic 11scuenta yu'un chapalic a te cha'beje; yu'un cha'bej ya me yilic te pueblo te ya xco tal ta wits Sinaí te Jehová. 12Ya me awa'be seña ta sjoyobal ta ban c'alal ya xc'oht te pueblo, soc hich me xawalbe: Tsahtaya me abahic, ma me xmohex bahel ta wits soc ma me xatsacbeyic te sti'ile; mach'ayuc a te ya spic te wits ya me xlaj. 13Ya yich' ch'ojel ta ton o ya x'a'bot t'ihmalte', ma ba ya xpicot ta c'abal; teme winic o chambahlam, ma ba ya xcuxaj. C'alal hal ya x'oc' te xulubil ya xhu' ya xnohpojic tal ta wits, xchi.
14Ha yu'un te Moisés co tal ta wits ta stojol te pueblo, la sch'ultes te pueblo soc la saq'uic sc'u'-spaq'uic. 15Hich la yalbe te pueblo: Chapaluquex me te cha'beje; ma me xata abahic soc ants, xchi.
16Ta sacubel q'uinal ta yoxebal c'ahc'al chicnaj tal chahwuc soc tsantsehwal, soc potsot ta pimil tocal te wits soc ay mero tulan yoq'uel xulubil. Nihquic yu'un spisil te mach'atic ayic ta campamento. 17Te Moisés la yic' loq'uel ta campamento te pueblo yu'un ya stahic te Diose; c'oht stehc'an sbahic ta ye'tal te witse. 18Potsot ta ch'ahil spisil te wits Sinaí, yu'un co tal ta yohlil c'ahc' tey a te Jehová. Te ch'ahil xtomet yac ta mohel hich te bin ut'il sch'ahilel horno, soc spisil te wits mero tulan yac ta nihquel. 19Te yoq'uel te xulubil behbe yich'bel yip. Yac ta c'op te Moisés, soc yac sjac'bel ta chahwuc te Diose.
20Te Jehová co tal ta sba te wits Sinaí soc la yic' mohel te Moisés ta sba te witse. Hich mo bahel te Moisés. 21Te Jehová hich la yalbe te Moisés: Cohan bahel, halbeya te pueblo te ma me xc'axic tal ta seña sti'il ta yilel te Jehová, yu'un tsobol me ya xlajic yu'un. 22Soc ac'a sch'ultes sbahic te sacerdotehetic te ya xnohpojic tal ta stojol te Jehová scuenta yu'un ma ba ya xlajinotic yu'un, xchi.
23Te Moisés la yalbe te Jehová: Ma xhu' ya xmohic tal ta wits Sinaí te pueblo, como ha'at hich la apasotcotic ta mandar: A'beya seña sti'il te wits soc ch'ultesa, xchi.
24Pero hich halbot yu'un Jehová: Bahan, cohan bahel, ya me xtalat soc Aarón; yan te sacerdotehetic soc te pueblo ma me xc'axic ta seña sti'il yu'un ya xmohic tal ta stojol Jehová, scuenta yu'un ma ba ya xlajinot yu'un, xchi.
25Ha yu'un co bahel te Moisés, hich hul yalbe te pueblo.
Currently Selected:
Éxodo 19: TZH
Highlight
Copy
Compare
Share
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
