Éxodo 21
21
Mandariletic yu'un mosohetic
1Ha'ic ini te mandariletic te yac awa'beyique:
2Teme yac aman jtuhl hebreo-winic scuenta awa'bat, waqueb ha'bil ya x'a'tej, ta shuquebal ha'bil ya me xcol ta libre, mayuc bin ya stoj. 3Teme stuquel tal, stuquel ya xloc' bahel. Teme ay yihnam a tal, soc yihnam ya xloc' bahel. 4Teme ha a'bot yihnam yu'un te yajwal, teme ya x'ayin queremetic o ach'ixetic yu'un, te ants soc te yalatac ya xhilic ta stojol te yajwal, stuquel ya xloc' bahel te winique. 5Yan teme ya yal te a'bat: C'ux ta co'tan te cajwal, te quihnam soc te jnich'nab, ma jc'an ya xloc'on ta libre, teme xchihe, 6ha yu'un te yajwal ya yic' bahel ta stojol te juecetic,#21.6 O: ta stojol Dios soc ya ya'be stehc'an sba ta ti'nahil o ta smarcohil, ya shotbe schiquin ta shotojbil; hich stalel ya xhil ta a'bat yu'un.
7Teme ay mach'a ya schon te yantsil-nich'an scuenta criada, ma ba ya xloc' bahel ta libre hich te bin ut'il te a'bat-winiquetique. 8Teme ma ba ya xmulanot yu'un te yajwal, te sc'oblal ya yic' yihnamin, ya me yac' te ya yich' manel loq'uel ta libre. Ma xhu' ya schombe jyanlumetic, yu'un ma ba toj bin la spasbe. 9Yan teme ya ya'be yihnamin te snich'ane, hich me ya spasbe te bin ut'il mero yantsil-nich'an. 10Teme ya yic' xan yan ants, ma me spehc'ambe swe'el, sc'u' spac', soc te ya xway soque. 11Teme ma ba ya spasbe ta yoxebal bin chapal ini, hich nax ya xloc' bahel ta libre, mayuc bin ya stoj.
Mandariletic yu'un mach'atic ya yuts'in sbahic
12Te mach'a ya yehchentes yan, teme ya xcham yu'un, ya me yich' milel. 13Yan teme ma ba snopoj ta yo'tan a te ya yehchentes, teme Dios nix a'bot ta sc'ab yu'une, ya ca'bat ana' banti ya sc'an ya xbaht ta ahnel. 14Pero teme ay mach'a ya yilintay te spat-xuhc soc teme hich yo'tan ya smile, ya me aloq'ues bahel ta stojol te scajtajib ta chiq'uel mahtanil cu'un, ya me yich' milel.
15Te mach'a ya smaj stat o snan, ya me yich' milel.
16Te mach'a ya yelc'an loq'uel yan, teme ya schon o teme ay to ta sc'ab a ya xtahote, ya me yich' milel.
17Te mach'a ya yixta'c'optay stat o snan, ya me yich' milel.
18Teme ay winiquetic te ya stsac sbahic ta majtamba, teme jtuhl ya yehchentes ta ton o ta sc'ab te yane, teme ma ba cham yu'un pero puch'em ta swayib, 19teme ya xhahch soc ya xbehen ta fuera soc snahbate', mayuc smul ya xc'oht te mach'a ya x'ehchenteswan; pero ya me stoj te jayeb c'ahc'al ma ba a'tej soc ya me yac' ta poxtayel.
20Teme ay mach'a ya smaj ta te' te ya'bat o scriada, teme cham yu'un, ya me yich' a'beyel castigo yu'un; 21yan teme cuxul ya xhil jun chebuc c'ahc'al, ma ba ya yich' a'beyel castigo, como ha mero yu'un stuquel.
22Teme ay winiquetic te stsacoj sbahic ta majtamba a te ya yehchentesic jtuhl ants te swoloj yal, teme ya xc'ax yal yu'un pero mayuc yan swocol c'oht, te mach'a la sta smul ya me yac' multa chican jayeb ya sc'an te smamalal te ants soc te bin ya snop te juecetique. 23Pero teme cham yu'un, ya me atojbe ta acuxlejal nix te scuxlejale; 24teme ta sit, ta sit nix; teme ta sbaquel ye, ta sbaquel ye nix; teme ta sc'ab, ta sc'ab nix; teme ta yoc, ta yoc nix; 25teme chic'ot, ya me yich' chiq'uel; teme ehchentesot, ya me yich' ehchentesel; teme majot, ya me yich' majel.
Mandariletic yu'un yajwal a'batetic soc bintic ay yu'un
26Teme ay mach'a ya smajbe sit ya'bat o sit scriada, teme jihn yu'un, ya me yac' loq'uel ta libre yu'un te site. 27Teme ya sc'oc'be loq'uel jp'ij sbaquel ye te ya'bat o jp'ij sbaquel ye scriada, ya me yac' ta libre ta scaj te wac'bot te yehe.
28Teme ay wacax ya scuj winic o ants, teme cham yu'une, ya me yich' milel ta ch'ojel ta ton te wacax, soc ma ba ya yich' ti'beyel te sbaq'uetale. Mayuc smul ya xc'oht te yajwal wacaxe. 29Pero teme ay ya'iyejix cujaw te wacax, soc teme halbotix te yajwal pero ma ba la scanantay, teme ya smil winic o ants, ya me yich' milel ta ch'ojel ta ton te wacax soc ya me yich' milel te yajwale. 30Yan teme ya xc'ambot multa, ya me yac' te jayeb ya xc'ambot scuenta sjelol te scuxlejale. 31Teme ya scuj querem o ach'ix, ha nix hich ya yich' chahpanel. 32Teme ya scuj jtuhl a'bat o criada, te yajwal ya me stoj lajuneb scha'winic (30) ta sehp plata, soc ya xlaj ta ch'ojel ta ton te wacaxe.
33Teme ay mach'a jamal ya yihquitay hilel sti'il te pozo, o teme ya shot yawil ha' ta lum, teme ma ba ya smacbe sti'il, teme ay ya xch'ay cohel wacax o burro tey a, 34te yajwal te yawil ha' ya me stojbe te yajwal te chambahlam, soc ha yu'un ya xc'oht te chamen chambahlame.
35Teme ay mach'a ay swacax te ya scujbe swacax te yane, teme cham yu'un, ya me yich' chonel te wacax te cuxul, j'ohlil ya yich' jujutuhl te stojole, soc j'ohlil ya yich' jujutuhl te chamen wacaxe. 36Pero teme na'bil te stalel ya xcujawan te wacax, pero ma ba cantantaybil yu'un te yajwale, ya me sjeltay te wacax te cham, ha yu'un ya xhil te chamen wacaxe.
Currently Selected:
Éxodo 21: TZH
Highlight
Copy
Compare
Share
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
