Rimljanenđe 10
10
1Phraljalen, okova so taro sa o vilo mangava hem soi mli molitva e Devlese zako Izraelci adavai te oven spasime. 2Adalese so me svedočinava zako olenđe da taro sa o vilo mangena te služinen e Devlese, ali nane len o čačikano haljojba. 3I adalese so na pendžarde i pravednost savi avela e Devlestar, mangle te uspostavinen pumari, hem ađahar na pokorinde pe zaki pravednost savi avela e Devlestar. 4Adalese so o Hrist dovršinđa o Zakoni te šaj ovel opravdime svako kova verujini ano leste.
5Oti pravednost savi avela oto Zakoni, o Mojsije pisini: “Ko ićeri o naredbe e Zakonesere, ano lende ka arakhi dživdipe.” 6A oti pravednost savi avela oti vera phenela ađahar: “Ma phen ano to vilo: ‘Ko ka uštel ko nebo?’ – so značini: ‘Ko ka anel e Hriste taro Nebo ki phuv?’” 7Ili: “‘Ko ka huljel ano than e mulengoro’ – so značini: ‘Ko ka huljel te anel e Hriste taro mule?’ ” 8Nego, so phenela? “O lafi e Devlesoroi će paše, ano to muj hem ano to vilo.” Adavai o Lafi oti vera savi propovedinaja: 9te priznajineja te mujeja dai o Isus Gospod hem vileja verujineja da o Devel vazdinđa le taro mule, ka ove spasime. 10Adalese so, vileja verujini pe zako opravdanje, a mujeja priznajini pe zako spasenje. 11Adalese o Sveto lil vaćeri: “Ko god poverujini ano leste, naka ladžal.” 12Adalese so, nane razlika maškaro Jevrejco hem okova kova nane Jevrejco; adalese soi o Gospod jekh hem ovi isto zako sa o manuša; ov barvale blagoslovini sarijen kola vičinena lesoro anav. 13Adalese so, “Svako kova vičini o anav e Gospodesoro, ka ovel spasime.”
14Ali, sar te vičinen Okole ana kaste na verujinena? A sar te verujinen ano Okova kastar na šunde? Hem sar te šunen bizo propovedniko? 15A sar neko te propovedini e manušenđe te nane bičhaldo? Sar soi pisime ano Sveto lil: “Soi šuže o pre okolengere kola legarena o Šukar lafi.”
16Ali, na prihvatinde sare o Šukar lafi, adalese so o Isaija phenela: “Gospode, ko poverujinđa amare lafese?” 17I vera avela prekalo šuniba, a o šuniba prekalo propovediba e Hristestar. 18A me pučava: O manuša li na šunde? Oja, šunde! Adalese so:
“Lengoro glaso šundilo ki sa i phuv
hem lengere lafija resle đi ko kraj e svetosoro.”
19Hem pučava: O Izraelci li na halile? Oja, halile. Najangle o Devel prekalo Mojsije phenela:
“Ka ćerav tumen te oven ljubomorna
narodoja kova nane narodo,
ka holjanćerav tumen narodoja kova nane razumno.”
20E Devlese ano anav, o Isaija bizi dar phenela:
“Arakhle man okola kola na rodinde man.
Mothovđum man okolenđe kola na pučle maje.”
21A zako Izrael phenela:
“Celo dive pružinđum mle vasta premalo lende,
ali oni neposlušna hem šerale.”
Currently Selected:
Rimljanenđe 10: RAB
Highlight
Share
Copy
Want to have your highlights saved across all your devices? Sign up or sign in
