Rimljanenđe 9
9
E Devlesoro izbor
1Vaćerava o čačipe ano Hrist, na hovavava, svedokoi maje mli savest ano Sveto Duho: 2mli žalost bari hem beskrajno dukh isi man ano vilo. 3Adalese so, zako mle phralja, kolai mli familija palo telo, ka mangav ine me te ovav prokleto hem cidime oto Hrist, kad bi šaj ine adava te spasini len. 4Oni o Izraelci. Olen o Devel usvojinđa, te oven lesere čhave. Olenđe o Devel mothovđa pli slava, hem dinđa len o savezija, o Zakoni, o način sar te služinen lese hem o obećanja. 5Olengerei hem o pradada o Avraam, o Isaak hem o Jakov, a olendar, palo telo, avela hem o Hrist, kovai Devel upreder sa. Olese slava zauvek! Amen.
6Ali, adava na značini da o Devel na ićerđa plo obećanje. Adalese so nane sare kolai palo bijandipe Izraelci, prava Izraelci, 7niti e Avraamesere čačikane čhave sare kolai lesoro potomstvo, nego: “To potomstvo ka računini pe prekalo Isaak.” 8Adava značini da nane e Devlesere čhave sare kolai e Avraamesere potomci palo telo. Samoi o čhave oto obećanje e Devlesere čhave. 9A akavai o lafi oto obećanje: “Ka avav aver berš ko akava vreme, hem e Sara ka ovel čhavo.”
10Hem na samo oj. Ko isto način i Reveka akharđa blizanconen amare pradadestar e Isaakestar. 11A angleder so o čhave bijandile hem angleder so šaj ine te ćeren nešto šukar ili bišukar – sar te ačhol ko zoralipe e Devlesoro plan oto izabiriba, 12savo na zavisini oto delja, nego Okolestar kova dela o poziv – ine olaće phendo: “O phureder ka služini e tiknederese.” 13Sar soi pisime ano Sveto lil: “E Jakove zavolinđum, a e Isave zamrzinđum.”
14So onda te phena? Dai o Devel o nepravedno? Na, nisar! 15Adalese so, ov e Mojsijase phenđa: “Ka smilujinav man kase me mangava te smilujinav man hem ka mothovav milosrđe kase me mangava te mothovav milosrđe.” 16I adalese na zavisini ništa oti amari želja ili oto amaro trud, nego e Devlestar kova smilujini pe. 17Adalese so, o Devel ano Sveto lil phenela e faraonese: “Adalese čhivđum tut te ove vladari, sar te šaj mothovav mlo zoralipe prekala tute hem mlo anav te šunđol ki sa i phuv.” 18I adalese, smilujini pe kase ov mangela, hem steđini o vile okolengere kase ov mangela.
19Neko šaj ka pučel man: “Sose onda o Devel pana krivini amen? Ko šaj te suprotstavini pe zaki lesiri volja?” 20Ali, ko injan tu, manušeja, te raspravinen tut e Devleja? Šaj li okova soi stvorime te phenel ple stvoriteljese: “Sose ađahar ćerđan man?” 21Nane li pravo okole kova ćerela buti e glinaja oti isto glina te ćerel jekh čaro zaki čast, a aver zaki ladž?
22A so te o Devel, mangindoj te mothoj pli holi hem plo zoralipe, ani bari strpljivost trpinđa okolen upro kolende inele holjame hem kola inele pripremime zaki propast? 23Ov adava ćerđa sar te mothoj o barvalipe oti pli slava upro okolende kolenđe mothoj milosrđe, kolen angleder pripreminđa zaki slava. 24Adala injam amen, kolen o Devel vičinđa na samo e Jevrejendar, nego hem e manušendar taro avera nacije. 25Sar so o Devel phenela ano lil e prorokosoro e Osijasoro:
“E manušen kola nane mlo narodo ka proglasinav dai mlo narodo
hem okola koja nane volime, dai volime.”
26Hem:
“Ko adava than kaj ine lenđe phendo:
‘Tumen na injen mlo narodo’,
ka oven proglasime dai ‘čhave e dživde Devlesere.’”
27A o proroko o Isaija phenđa e Izraelestar:
“Iako isi Izraelci edobor, sar pošik ano more,
samo tikoro broj olendar ka spasini pe.
28Adalese so, o Gospod ka ćerel e phuvjaja okova so phenđa, hem sigate adava ka ćerel.”
29Hem sar so o Isaija prorokujinđa:
“Te na ačhaj amenđe ine potomstvo
o Gospod kovai upreder o vojske,
ka ova ine sar i Sodoma,
hem ka ličina ine upri Gomora.”
I nevera e Izraelesiri
30So onda te phena? Da o manuša taro avera nacije, kola na trudinde pe zaki pravednost, priminde i pravednost – i pravednost savi avela oti vera. 31A o Izraelci, kola edobor trudinde pe zaki pravednost palo ićeriba o Zakoni na uspinde ano adava. 32Sose? Adalese so na trudinde pe te oven pravedna pali vera, nego palo pumare delja. Ađahar zapninde ko bar ko savo o manuša zapninena. 33Sar soi pisime ano Sveto lil:
“Ače, ko Sion čhivava
bar ko savo ka zapninen hem stena savi ka ćerel len te peren.
Ali, okova kova ano leste poverujini, naka lađal.”
Currently Selected:
Rimljanenđe 9: RAB
Highlight
Share
Copy
Want to have your highlights saved across all your devices? Sign up or sign in
