Rimljanenđe 11
11
O Devel na odbacinđa ple narodo
1Adalese, pučava: o Devel li odbacinđa ple narodo? Na, nisar! Hem me injum Izraelco, e Avraamesoro potomko taro pleme e Venijaminesoro. 2O Devel na odbacinđa ple narodo, save izabirinđa angleder. Ili na džanen li so phenela o proroko o Ilija ano Sveto lil, kad žalinđa pe e Devlese protiv o Izrael? Phenđa: 3“Gospode, mudarde sa te prorokonen hem peravde sa te žrtvenici. Samo me ačhiljum, a hem man mangena te mudaren.” 4I so o Devel phenđa lese? “Ačhavđum maje efta hiljade manušen kola na pele ko kočija anglo Vaal.” 5Ađahari hem ano akava vreme: o Devel izabirinđa tikori grupa oto manuša pali pli milost. 6Pa te izabirinđa len pali pli milost, onda adava nane zbog olengere delja. Inače, i milost e Devlesiri naka ovel više ine milost.
7So onda? O Izraelci na dobinde okova so rodinde. Adava dobinde okola kolen o Devel izabirinđa maškar olende, a averengere vile ule steđime. 8Sar soi pisime ano Sveto lil:
“O Devel dinđa len duho savo ćerela len zorale te soven,
jaćhencar te na dikhen,
hem kanencar te na šunen,
sa đi ko avdisutno dive.”
9A o David phenela:
“Nek lengiri gozba ovel lenđe zamka hem klopka,
nek peren hem nek oven kaznime.
10Nek koroljoven te na dikhen,
a tu pharipnaja banđar lengere dume zauvek.”
O spasenje avere narodengoro
11A me pučava: On li pele ano greh sar te na ušten više? Na, nisar. Nego, zbog olengoro prestup o spasenje alo hem avere narodenđe hem ćerđa e Jevrejen te oven ljubomorna. 12I, te olengoro prestup značini barvalipe zako sveto, a lengoro periba barvalipe zako avera narodija, kobor više barvalipe ka anel adava kad o pherdo broj oto Jevreja ka prihvatini o spasenje!
13A tumenđe kola na injen Jevreja, phenava: sar apostoli zako avera narodija hvalinava mli služba, 14te šaj nesar ćerav mle narodo te oven ljubomorna hem ađahar te spasinav nesaven olendar. 15Adalese so, kad o Devel odbacinđa len, pomirinđa pe avere narodencar. So, onda, ka značini kad o Devel palem ka prihvatini len te na uštiba taro mule? 16Tei o prvo kotor oto humer posvetime e Devlese, ondai hem sa o humer sveto; tei o koreno sveto, svetai hem o granke.
17I, tei nesave granke phage, a tu sar granka oti divljo maslina injan spojime maškar olende hem akana olencar delineja o koreno hem o sokija oti maslina, 18ma hvalin tut anglo phage granke. A te hvalinđan tut, setin tut da tu na akhareja o koreno, nego o koreno tut. 19Tu ka phene: “O grankei phage sar te šaj me čhivav man olenđe ko than.” 20Čače, oni phage adalese so na verujinde, a tu terđoveja olenđe ko than zbog ti vera. Samo, ma te ove barikano zbog adava, nego te dara. 21Adalese so, te o Devel na poštedinđa o prirodna granke, naka poštedini ni tut.
22Adalese, dikh e Devlesoro šukaripe hem lesiri strogoća. Ovi strogo premalo okola kola otpele, ali šukari premala tute te ačhiljan ano lesoro šukaripe. A te ačhavđan te verujine, hem tu ka ove čhindo. 23A hem on o Izraelci kola na ačhovena ani nevera ka oven palem spojime ko kaš, adalese so o Devel šaj te ćerel adava. 24I te tu, kova pali priroda injan granka oti divljo maslina, injan čhindo oto klo kaš hem injan spojime ko sadime kaš oti maslina, so nane prirodno, kobor po lokhe ka ovel zako prirodna granke te oven spojime ko pumaro kaš.
O Izrael ka ovel spasime
25Phraljalen, mangava te džanen akaja tajna sar te na mislinen da sa džanen. Nesave Izraelci ule šerale hem ka ačhoven ađahar sa đikote o pherdo broj oto avera narodija na đerdini ano narodo e Devlesoro. 26I ađahar ka spasini pe sa o Izrael, sar soi pisime ano Sveto lil:
“O Spasitelji ka avel taro Sion;
ka cidel svako bezbožnost e Jakovesere potomkonendar.
27Hem akavai mlo savez olencar
kad ka cidav lengere grehija.”
28Adalese so o Jevreja odbinde o evanđelje, ule neprijatelja e Devlesere zbog tumari korist, ali palem o Devel volini len adalese so izabirinđa lengere pradaden. 29Adalese so, o Devel na menjini pli odluka kad dela darija hem pozivija.
30Sar so tumen nekad injenle neposlušna e Devlese, a akana zbog olengiri neposlušnost priminđen milosrđe e Devlestar, 31ađahar hem on akana, ule neposlušna e Devlese zbog tumende, te šaj hem on te priminen milosrđe e Devlestar. 32Adalese so o Devel sa e manušen phandlja ani neposlušnost te šaj sarijenđe mothoj plo milosrđe.
Slava e Devlese
33O, kobori baro e Devlesoro barvalipe, i mudrost hem o džandipe! Lesere odluke niko našti te objasnini hem lesere droma niko našti te haljol!
34Adalese so, ko pendžari i godi e Devlesiri?
Ili ko inele lesoro savetniko?
35Ili ko dinđa le nešto,
i ov onda te dugujini lese?
36Adalese so, sa avela olestar, hem sai ćerdo prekalo leste hem zako olese. Olese nek ovel slava zauvek! Amen.
Currently Selected:
Rimljanenđe 11: RAB
Highlight
Share
Copy
Want to have your highlights saved across all your devices? Sign up or sign in
