Rɔmdara 12
12
Fɩlɛɛkɛ n danɩ Thãgba haar
1Dɩ gɛr gɩ mɔ̃kɛ Thãgbaa bɔ jɩ jɔrnɩ ka, mɩ‐n phʋʋr nɛr omɩna dɩ na gba anɩ dɩbara a na ha Thãgba, gɩ do bonɩ ji thɩ̃ɛɛkɛ hananɩ yire, a do daphuu, a da Thãgba haar; gɛr dɔ fʋɔr bʋɔɔkɛ na‐n fʋɔrʋʋnɩ. 2Na‐n hana ga fɩlɩkɛ tɩbɩla fɛʋ thɩɩra hananɩ gɩraˈ, sɩ nɩ dɔ Thãgba n debi anɩ kpɩɛrsɔ koo gɩ do nɔɔ nɩ hana ha phaa, liir na puno dɩphã na‐n jɩ gɩrɛ Thãgba n ƴaalnɩ, kɛ dɔnɩ gɩrɛ bʋɔnɔnɩ dɩɩ daaraa haar, ga hana dakha dɩ paaraˈ.
3Khaardaakɛ Thãgba ha mɩnɩ ɔɔ bɔ jɩra, gɛr dɔ nɔɔ dɩ ma‐n so nɛrɛ fɛʋ bɩɛlbɩɛlla, dɩ na‐n hana dɩbara khəi kpɩɛrɛ gɩ jɔ gɩrɛ mɩɛna nɩnaˈ, sɩ nɩ dɔ gɩ do kpɩɛrɛɛkɛ mɩɛna nɩnɩ, gɩ ha mɔ̃kɛ ha pɛrɛɛkɛ Thãgba ha nɩnɩ bɩɛlbɩɛl hanɩ. 4Gɩdonɩ mɔ̃kɛ sɩ hananɩ tomɩ ɓanasɔ dɩɩdɩɩ tomɩ bɩɛlla, sɩɩ do tomɩ ɓãasɔra na hana thɔ̃ bɩɛlaˈ;#1 Kor 12:12 5mɛ̃ gɩ ha na sɛrɛ, sɩ jɔrnɩɩkɛrakɛ sɩ tomɩ bɩɛl sɩ do dɩɩ the asɩ bɩɛl dora nakha Kirisiti, dɩ sɛrɛ fɛʋ coore kha ʋ do ʋʋ tomɩ ɓã, dɩ ʋ do ʋʋ tomɩ ɓã. 6Sɩ mɔ̃ sɩ hananɩ khaardaasɔ fɛʋ dɩɩdɩɩ mɔ̃kɛ bɔ jɩɩrɩkɛ Thãgba jɩ sɩnɩ hanɩ, ado ntɛɛ khaarda dʋɔn Thãgba tukɩr tir, a na‐n mɩa ga‐n mɩɛna ha pɛrɛɛkɛ a hananɩ.#1 Kor 12:4–11 7Ado bubul thɔma gɩ, ntɛ na‐n jalana gɩ; a tibil dɩɩrɛ gɩ, ntɛ na‐n jalana gɩ; 8ado yɩr thɩmɩɩr ntɛ hana a na‐n jalana gɩ, ʋrɛ n ˈlaanɛnɩ thɩ̃ɛ, a na‐n ˈlaanɛ na bɩ̃ bʋɔ; ʋrɛ ˈlɛnɩ ƴɛ kʋʋlɛ, a na‐n tɛrɔ ɔɔ thɔnana; ʋrɛ hananɩ bɔ jɩɩr, a na‐n jɛ bʋɔrara na daʋ.
9Na‐n do dɩ anɩ naʋ na‐n hana fɩɩlaˈ; na‐n ƴʋɔnɛ thɩ̃ puu sa ma thɩ̃ bʋɔra kɩ̃kɩ̃kɩ̃. 10Ado omi naarra gɩ, na‐n na kha na naʋʋkɛ hanɩ phãphãphã; kɔɔ kʋlɛ ƴɩɛ a na cɔ haan ga‐n hulono. 11Ado thɔ̃ cʋʋrɛra gɩ na‐n hana dokhʋʋraˈ; nɩ hana phãphãphã haarra; na‐n dɔ Kɔ̃tɩnɩ thɔ̃. 12Nɩ dɔ nũ pɛrɛɛkɛ nɩ hananɩ n cʋʋ nɩ na‐n kãka; na‐n fɔ haar bɔ gaarɛra; na‐n yɩra Thãgba bɩɛlɛla; 13ha pɛdaraakɛ thɩ̃ɛ n ɓɔrnɩ na‐n bulo wi; na‐n bãbanɛ na kpakpal teere. 14Na‐n bɔna wɩrɛ n kpoone narnɩ, na‐n bɔna wɩ na‐n yɩ sʋɔn n ˈle waˈ.#Mat 5:44; Lu 6:28 15Na‐n kãkanɛ na wɩrɛ n kãkanɛnɩ, sɩ na‐n bɛ na wɩrɛ n bɩɛnnɩ. 16Na‐n hɩnɛ khasɔ bɩɛlbɩɛl na fɩl bɩɛl. Na‐n ka kʋʋraˈ, sɩ na‐n hana kha na wɩrɛɛkɛ tɩbɩla na‐n thernanaˈ. Na‐n hɩɩn anɩbara mɔ̃ nɩ donɩ tɩɩ kpɛsɛsɔaˈ.#Sokp 3:7
17A tibil cʋʋ nɩ puure na‐n bir cʋgʋʋ puurəˈ. Na‐n ƴaalɛ gɩrɛ bʋɔnɔnɩ tɩbɩla fɛʋʋ ƴɛra. 18A nɩ yɩ hʋɛ, nɩ dɔ bʋɔ na tɔɔ kha na ha ɩɩ na tɩbɩla fɛʋ. 19Nɛrɛɛkɛ mɩ‐n nanɩ na‐n tiir heluaˈ, sɩ nɩ sɛrɔ Thãgbaa nɩ̃khi a tiir. Gɩdonɩ Kɔ̃tɩn sor Thãgbaa sɛbɛra ayɩ: “Hel tiire dɔ ɩnɩda, dɩ ɩnɛr dɔ ʋrɛ na lɩmanɩ tibil gɩrɛ a cʋʋnɩ.”#Dət 32:35 20Sɩ “a kɔmɛr fʋ afɩ lãlaardaar hanaa dɩkor, a yɔlkhaa fʋʋ hanaa nyʋɔn; gɩdonɩ mɔ̃ fɩ‐n cʋʋnɩ thale ga dor nɔɔ, yicuruukɛ hɔnɩ dɔɔ n fʋʋ.”#Sokp 25:21–22 21Fa‐n do puure na‐n puno faˈ, sɩ dɔ fɩ ka fɩ kəə puurera ga‐n the afɩ bɔ cʋʋra.
Currently Selected:
Rɔmdara 12: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
