Rɔmdara 11
11
Thãgba na bo Ɩjɩrayɛldara ga
1Dɩ gɛr gɩ mɩ‐n bulele ayɩ: Thãgba bor ɔɔ too yaa? Kpɩɩrakaˈ, gɩdonɩ mɛrɛ dakha Ɩjɩrayɛldaar ha mɩ, Abɩrahamɩ məl mɩ do, a do Bɛ̃jamɛ̃ɛ ca.#Fili 3:5 2Thãgba na bo ɔɔ tookɛ a kɔɔ maanɩ jɩɩraˈ. Na jɩ thɩmɩɩ gɩrɛ kherenenɩ Thãgbaa sɛbɛra, ka Elɩ mɩɩnanɩ Thãgba da‐n pɛ Ɩjɩrayɛldara soraa, ayɩ: 3“Kɔ̃tɩn wɩ kʋʋrɛ afɩ bobonasɔ a tʋɔrna afɩ bonɩ ji pasɔ a kpɛɛ, sɩɩ do mɛr bɩɛl sɛ gɩrɛ ˈlẽˈlẽˈlẽ dɩ wɩ‐n ƴaalɛ dakha ɩ̃ yʋ.”#1 Fãg 19:10, 14 4Sɩ anye Thãgba sʋʋraa? “Mɩ tire kona gbɩlanɩ makonyɔ wɩ dɔ ɩ̃da, kɛ na gulẽganɛnɩ a fʋɔr Baalaˈ.”#1 Fãg 19:18 5Mɛna gɩ ha dakha nɛnɛ̃ bɔɔkɛ, wɛ hale sɛnɩ gbe kɛ Thãgba phiirni ɔɔ bɔ jɩra. 6Dɩ ado bɔ jɩɩrra gɩ, ga the thɔ̃ cʋʋrɛra bã; ado thɔ̃ cʋʋrɛra gɩ the, ga dor bɔ jɩɩr na do bɔ jɩɩr bã.
7Dɩ mɔ̃ ga ha dɩphã? Gɩrɛ Ɩjɩrayɛldara n ƴaalnɩ wa kɔɔ ˈlɛ ga, sɩ wɩrɛ Thãgba phiirni wer kɔɔ ˈlɛ gɛr; sɩ wɩrɛ sɛnɩ awɩ ha dibire. 8Dɩ gɩ har mɔ̃kɛ gɩ kherenɩ Thãgbaa sɛbɛra ayɩ: “Thãgba kɔɔ hana wɩ haar thirfirii, na yinəəkɛ na dɔnɩ ga yɩraˈ, na nũukɛ na dɔnɩ ga nɩraˈ, a dana nɩ̃kɛ.”#Dət 29:4; Eja 29:10 9Dɩ Davɩdɩ sor ayɩ:
“Awɩ dɩko kho pa n dɔ war waya na pheru,
na ji paar, na so heeneekɛ na teana wɩnɩ.#Khɩ 69:22–23
10Awɩ yi n hana thũu wa yaˈ,
dɩ cʋɛ wɩ wa‐n gũguun wire koo.”
Wɩrɛ na dɔnɩ Juifisɔaa taa ˈlɛ
11Dɩ gɛr gɩ dɩ ɩ̃ bule ayɩ: Nɔɔra Juifisɔ benɩ a ji, khorr wɩ ba ji yaa? Kpɩɩaˈ. Awɩ jirə dɔ nɔɔ dɩ ca kpala ˈlɛ taarɛ gɩ cʋʋ gbugi gɩ fʋ wɛr Juifisɔ awɩdara. 12Dɩ ado awɩ ji dor tɩbɩla fɛʋ thɩɩraa bɔna ˈlɛ pa, dɩ ado awɩ dɩ pa dor ca kpalaa bɔna ˈlɛ pa, mɔ̃ awɩ nɔ dã na thʋ̃ na ha?
13Sɩ nɛr ca kpala mɩ‐n so gɩrɛ: Gɩdonɩ mɩ dor thɔ̃thɔn ca kpalala, mɩ‐n gbɛ̃gbɛrɛnɛ ɩ̃ thɔna, 14anaa ma yɩrɔrɛ fʋ paar ɩ̃ cʋʋ ɩ̃ ca gbugi n fʋ wɩ, ɩkhasɔ wɛrra n puno wɩ ˈlɛ taarɛ. 15Gɩdonɩ ado borɩkɛ Thãgba bo wɩnɩ dor tɩbɩla fɛʋʋ bir kũu kha na Thãgba, mɔ̃ awɩ bir gba na cʋʋ thɩ̃ɛ na pɔna, ga dor khe birə a ˈlɛ yirəə? 16A wɩ ha Thãgba caca mɩ̃ bolookɛ wɩ khenɩ, koo dɔ daphuu, dɩ a thɩr nɛɛ do daphuu mɛ̃ jɛ̃ɛ na ha dakha. 17Sɩ ado Thãgba kɔɔ kurre ɩkhaa olɩvɩ thɩr jɛ̃sɔ a faa sɩɩ do fɛrkɛ dɔnɩ hɔ̃ olɩvɩ thɩrʋ a gba fɛr a cooro, dɩɩ do ɔɔ nɛ na ɔɔ ƴɔ̃ fɩ bullo, 18fa‐n məbi jɛɛnaalaˈ; sɩ ado fa məbi jɛ gɩ do ga do fɛr fʋɔn nɛaˈ, sɩ nɛɛ fɔ fɩ jɩɩlna. 19Sɩ fa sor nayɩ: Mee, jɛ̃ɛle kurre a faa sɩ ɩ̃ fi ɩ̃ cooro. 20Sobɔr gɩ wer, gɩ kɔɔ kuurre a faa gɩdonɩ ga hana ha pɛraˈ, sɩ fɛrɛ ha pɛrɛɛkɛ fɩ hananɩ gɛr dʋɔn afɩ too. Fa‐n ti gunəˈ, sɩ dɔ maar n ka fʋ fɩ. 21Gɩdonɩ ado Thãgba na kɔɔ sɩ thɩr thernaa jɛna ga, a na sɩ far dakha ga. 22Yɛ mɔ̃ Thãgba bɔrnɩ na wo mɔ̃ ɔɔda na‐n wurnəˈ: Wɩrɛraakɛ jenɩ a‐n nɩna wɛr mɔ̃ ɔɔda na‐n wurnəˈ, sɩ fɛrɛra wer a‐n nɩna fɛr mɔ̃ a bɔrnɩ adora fɩ jɩɛ too bɔɔbɔɔ ga bɔ caraalera, agado mɛ̃ ga fɛrɛ dakha a na kur fer na faa. 23Wɛr Juifisɔ dakha wer, ado wa bo too awɩ baalla ga, Thãgba na coor wer kãkɛ wɩ kɔɔ hanɩ, gɩdonɩ Thãgba hananɛ punone a na cʋʋna thɩ̃ɛ thale. 24Ado nɛr ca kpalaakɛ dɔnɩ hɔ̃ olɩvɩ thɩr jɛ̃ɛ, kɛ Thãgba kɔɔ kurni a coor olɩvɩ thɩr thernanɛna sɩɩ dorakɛ ga teena gɩ hana mãˈ, mɔ̃ ga fʋ sɩɩ do Juifisɔɔkɛ gbonɩ do olɩvɩ thɩr thernanɛ Thãgba na coor wɩ awɩ thɛthɛɛ olɩvɩ thɩrra ga?
Ɩjɩrayɛldaraa ha debi
25Gɩdonɩ ma‐n ƴaal nɩ omɩna na‐n jɩ thɩ̃ gbulikaa ga, gɩ do nɔɔ na‐n kpɩɛr waa gɩ ho thɩ̃ jɩna hanaˈ; a thɩɛna gaa ga do Ɩjɩrayɛldaraa yaarra ƴɛrr ga jalaˈ, sɩ bɔɔkɛ ca kpala fɛʋ lonɩ na pɩ, dɩ nʋɔ dã, gɛr ga khuro; 26mɛ̃ Ɩjɩrayɛl ɓibi na ˈlɛ taarɛ, gɩ ha mɔ̃kɛ gɩ kherenɩ Thãgbaa sɛbɛra ayɩ:
“Sɩyɔna Taadaar na the,
a na tire Jakɔbɩɩ thɩ̃thɩɩn thɩ̃ gõgolõ;#Eja 59:20
27gɛr na dɔ ɩ̃ nɔ bɩɛl ʋlfɛ na wɛr,
ɔbɔɔkɛ ma faanɩ awɩ sopugosɔ.”#Jer 31:33–34
28Ado tutugo bʋɔɔ thɩmɩɩra gɩ, sobɔr gɩ wer, Juifisɔ dor lãlara na Thãgba, sɩ dɩ nɩ fi a ka yɩrɔ bɔɔ; sɩ ado phiirera gɩ, Thãgba na wɛr dɩɩ do awɩ mama thɩ kɔ̃tɩ̃sɔ dɔ nɔɔ. 29Gɩdonɩ Thãgba na do dadebinaa ɔɔ khaarda ˈlaara na ɔɔ wera ga. 30Mamara nɩ kɔɔ nʋʋrɛ nũu Thãgbara, sɩ nɛnɛ̃ Thãgba jɩ nɛr bʋɔra dɩɩ do Juifisɔɔ nũ nʋʋr dɔ nɔɔ. 31Mɛna dakha Juifisɔ nʋʋr nũu nɛnɛ̃ gɩ do nɔɔ bʋɔraakɛ Thãgba jɩ nɩnɩ wɩ ˈlɛrɔ dakha bɔ jɩɩr wer. 32Gɩdonɩ Thãgba tor tɩbɩla fɛʋ nũ nʋʋrɛra gɩ do nɔɔ a jɩ wɩ fɛʋ bʋɔra.
33Nɩ hɩnɛ mɔ̃ Thãgbaa dakpɛ do hanɩ, na mɔ̃ ɔɔ kpɛsɛ na ɔɔ jɩ huloni ɓoɓo. Ɔɔ kpɩɛr na ha ˈlʋʋrra ga; ɔɔ fɩlɩkɛ a‐n cʋʋnanɩ thɩ̃ɛ na ha jɩɩrra ga, mɔ̃kɛ gɩ kherenɩ Thãgbaa sɛbɛra ayɩ:#Eja 55:8
34“Amɛ hale a jɩ Kɔ̃tɩnɩ kpɩɛr?
Dɩ amɛ dɔ ɔɔ fɩl dɩɩrdaar?#Eja 40:13
35Amɛ dɔ cacadaar a kɔɔ ha Thãgba thɩ̃ɛ,
dɩ na ˈlar sɩ na bir na lɩmʋʋ?”#Jɔ 41:11
36Gɩdonɩ ɔr kɔɔ te thɩ̃ɛ fɛʋ, ɔr fʋɔn thɩ̃ɛ fɛʋ jɩɩlna, dɩ ɔr dɔ nɔɔ dɩ thɩ̃ɛ fɛʋ hale gɩrɛ. Ɔɔ i n dʋbarɔ na jala waa khorr. Amɛn.#1 Kor 8:6
Currently Selected:
Rɔmdara 11: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
