Rɔmdara 13
13
Nũ nɩɩr fãgadarara
1Dɔ tɩbɩla fɛʋ na‐n nɩ nũu wɩrɛraakɛ dɔ warnɩ fãgadara, gɩdonɩ wɩrɛ dɔnɩ yʋʋ na hale saagado Thãgba pɛ waraa ga, dɩ fãgadaraakɛ hanɩkɛ nɛnɛ̃kɛ Thãgba pɛ war. 2Dɩ gɛr gɩ ʋrɛɛkɛ n lananɩ wɩrɛraakɛ dɔnɩ yʋʋ, jɔfʋʋkɛ Thãgba pɛrnɩ a‐n laan, dɩ wɩrɛ n lananɩ wa gbaar sor na heen dɩbara. 3Gɩdonɩ wɩrɛ n cʋɛnɩ bɔɔ fãga hɩ̃dara na‐n kʋ wɩ maaraˈ, sɩ wɩrɛ n cʋɛnɩ puure, wɛr wɩ‐n kʋ maar. A fa ƴaal wɩrɛ dɔ farnɩ yʋʋ na‐n kɔ fɩ maaraˈ, na cʋɛ bɔɔ fa yɩ gɛr dɩ wa khɩɩ fɩ. 4Gɩdonɩ Thãgbaa thɔ̃daar a do thɩ̃ɛ na‐n bɔ far; sɩ ado fa cʋʋ puure wer, dɔ maar na‐n fʋ fɩ gɩdonɩ ga do mɔlɔ a‐n fʋrɔ bajɩna ga, sɩ Thãgbaa thɔ̃daar a do hel tiirera, a na‐n nɩnana puu cʋʋdara ɔɔ nĩkhi. 5Dɩ gɛr gɩ gɩ teenanɛ fa‐n nɩ nũu, ga do nĩkhiirəəle dɔ nɔɔ dɩbara ga, sɩ gɩdonɩ fɩ yɩ gɛr le haarra dɩɩ do gɛr bʋɔnɔ.
6Gelela dɔ nɔɔ dakha dɩ na‐n lɩmɩnɔ lãpho, gɩdonɩ Thãgbaa thɔ̃dara fãgadara do, kɛ n dɔnɩ ga thɔ̃ caalera bɔɔbɔɔ.#Mat 22:21; Mar 12:17; Lu 20:25 7Na‐n hana tɩbɩla fɛʋ gɩrɛ ntɛ teenanɩ: Ʋrɛ n gbaannɩ lãpho, na‐n lɩmaa ɔɔ lãpho; gɩrɛ dʋɔnyɛ̃ n buleni, na‐n lɩma; ʋrɛ teananɩ maar na‐n maanɛɛ; ʋrɛ teananɩ cʋʋr na‐n cʋɔnɛɛ.
Fɩl ʋrɛ sɩ teenanɩ sɩ hanana kha
8Na‐n hana tibil bɩɛl heluaˈ; heluukɛ dɩbara teananɩ nɩ hanana dʋɔn naʋʋkɛ na‐n nanɩ kha; gɩdonɩ ʋrɛ naannɩ ɔɔ ˈwalãkha tibil, a cʋʋrɛ gɩrɛ fɛʋ jɔfʋ n ƴaalnɩ ga‐n cʋɛ. 9Gɩdonɩ jɔfʋʋkɛ sɔnɩ ayɩ: “Fa‐n hana khɛ kpɩɩ ƴaalaˈ, fa‐n hana kũu kpɩɩ ƴaalaˈ, fa‐n kʋ tibiləˈ, fa‐n yuəˈ, fa‐n pɩɛr hara ga”, na gɩ̃ jɔfʋ kpɩɩ fɛʋ, thɩmɩɩ nɔ bɩɛlla gɩ gbɛbɩ do ayɩ: “Fa‐n na afɩ ˈwalãkha tibil mɔ̃kɛ fɩ‐n nanɩ afɩbara.”#Thɩɩ 20:13–15, 17; Dət 5:17–19, 21; Lev 19:18 10Naʋ na‐n cʋʋ ɔɔ ˈwalãkha tibil puurəˈ, dɩ gɛr gɩ ado naʋ hale ga dor jɔfʋ koo cʋʋrɛ a dã.
11Dɩ mɔna nɩ‐n cʋʋnɩ mɛna, nɩ jɛna gɩ dɩ bɔɔ daan, dɩ bɔɔ gɩɩkɛ teananɩ nɩ jaa daanɔ mɛ̃, gɩdonɩ nɛnɛ̃ taarɛ wɔrɔ̃ sɛr a jɔ ɔbɔɔkɛ sɩ kɔɔ pɛrnɩ haar. 12Dɩɩ tɩnɛ dɩ ga‐n thɔɔ wɩllɛ, dɩɩ do dɩwɩlʋ wɔrɔnɛ mɛ̃; sɩ dɔna dabirəə thɔ̃ a faa, sa tɔ ko ke thɩ̃ɛɛkɛ dɔnɩ dahɩrɛɛda. 13Sa‐n ɩrɛ na fɩl telẽe gɩ ho mɔ̃kɛ tibil na‐n ɩɩrnɩ dɩwɩlʋla. Sa‐n ɩɩrna gbõgolõ dɩko khor na ta laaraˈ, na khɛ laarɛ na kũu laaraˈ, na dakhaba cʋʋraˈ, na‐n ɩɩrna kɩla na gbugəˈ. 14Sɩ nɩ gba Jeju Kirisiti Kɔ̃tɩn a tɔ; na‐n ƴaal nɩ cʋɛ thɩ̃ɛ ga‐n da anɩ tibil do paraakɛ thɩ̃ puu ƴaalɛ n kʋnɩ thueəˈ.
Currently Selected:
Rɔmdara 13: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
