Efɛjɩdara 4
4
Kirisitii ɓãɓãsɔɔ bɩɛl do
1Gɛr gɩ mɩ‐n bɩɛl nɛr, mɛrkɛ dɔnɩ khaɩdaar Kɔ̃tɩnɩ sora, na‐n ɩrɛ ga‐n mɩɛ kha na werɩkɛ Thãgba kɔɔ we nɩnɩ. 2Nɩ jɔ dɩbara, a hana hɛlɛlɛ fɩlɛ, a hanana dakha ha fʋrɛ. Na‐n fɔ kha haar bɩɛlbɩɛl na naʋ.#Kol 3:12–13 3Na‐n gbuoro yʋʋ Thu Phuu bɩɛl do n hale gɩ too anɩ pa, gɩ do lidaakɛ dɔnɩ ha ɩɩkɛ le nɩnɩ dɔ nɔɔ. 4Tomɩ bɩɛl hale, na Thu Phuu bɩɛl, mɔ̃kɛ nũ pɛ bɩɛl hanɩle dakha kɛ Thãgba we narnɩ. 5Kɔ̃tɩ̃ bɩɛl dɩbara haanle, na ha pɛ bɩɛl, na yɔ kpɛɛ bɩɛl, 6na Thãgba bɩɛl, kɛ dɔnɩ tɩbɩla fɛʋʋ Thɩ, ɔr kəəne thɩ̃ɛ fɛʋra, ɔr dɔ ʋrɛ pɛnɩ paar fɛʋ, a har dakha sɛrɛ fɛʋʋ bɩnɔ.
7Sɛrɛ fɛʋ bɩɛlbɩɛl ˈlɛr bɔ jɩ khaardaa dɩɩ do asɩda, mɔ̃kɛ Kirisiti n ˈlaanɩ jɔɔ dɩ ha sɩ. 8Gɛr dɔ gɩrɛ Thãgbaa sɛbɛ sonɩ ayɩ:
“Mɔ̃ a‐n kɔɔ jʋʋnnɩ ƴũ,
a khɩɩrɛ dea a jʋʋnna,
a har tɩbɩla dakha khaardaa.”#Khɩ 68:18
9A jʋʋnɛɛ kɩr dʋɔn mɔ̃? Mee gɩ nɩnanɛ a kɔɔ gbune a dã thɩ thɛrɛɛ ɓo. 10Ʋrɛɛkɛ kɔɔ gbunoni ɔr thɛthɛra jʋnɛ a kəə thãgbara ƴũ fɛʋ, dɩ mɛ̃ ga do ɔr he thɩɩkɛra a gbana ƴũ koo. 11Ɔr pɩɛr ɩkhasɔ wɩ dɔ thɔ̃thɔna, ɩkhasɔ n do Thãgba tukɩr tidara, ɩkhasɔ n do tutugo bʋɔɔ thɩmɩɩ mɩɩdara, ɩkhasɔ n do khɛkhɛ na dɩɩrdara, 12gɩ do nɔɔ tɩɩ phuusɔ n gbɛbɩrɩ wɩ ˈli wa‐n jɩɩ cʋʋ ɔɔ thɔ̃, gɩ cʋʋ dakha Kirisitii tomɩ gɩ khɔ̃ ga‐n pɛr, 13phaphapha sɛrɛ fɛʋ n do bɩɛl ha pɛdaara, na Thãgbaa Bikuuni jɩra, sɩ khɔ̃ sɩ bɩ̃, sɩ mãkhana Kirisitiikɛ dananɩ thu; 14dɩ mɛ̃ sa do bɩsana ˈlo, dɩ dɩɩrɛɛkɛ n phʋnanɩ jɛ khaa na cʋʋ sɩ sa‐n kpaar baba ga; dɩɩrɛɛle tɩɩ fɩɩl tɩbɩlaa pa gɩ the, kɛ n gbaannɩ fɩɩlɛ dɩ wɩ cʋʋna tɩbɩla wɩ lona hʋ puurə. 15Sɩ sobɔ mɩɩrɛ na naʋ sa ka na khɔnɔ thɩ̃ɛ fɛʋra ʋrɛraakɛ dɔnɩ yʋʋ, a thɩɛna gaa Kirisiti gɩ. 16Ɔr dɔ nɔɔ dɩ tomɩ ɓaanʋsɔ dɩɩdɩɩ n coor kha a do bɩɛl dɩɩ the ƴɔɔpasɔraalera tomɩrra n hananɩ, mɛ̃ gɩ ɔbɔɔkɛ tomɩ ɓaanʋ dɩɩdɩɩlera n donɩ awɩ thɔ̃ mɔ̃kɛ gɩ teenanɩ, tomɩrra koo n khʋɔn dɩ ga‐n pɛr na naʋ.#Kol 2:19
Yi pha hananɛ na ɔɔ fɩl
17Gɛr gɩ gɩrɛ mɩ‐n sonɩ dɩ ɩ̃ bo dɩ ma‐n kpãkpaanɔ mɔ̃ mɩ donɩ Kɔ̃tɩnɩda dʋɔn wɔɔ: Na‐n hana fɩlɛ ˈlo a ho thɩldaraakɛ hananɩ mɔlɔ kpɩɛraˈ. 18Awɩ kpɩɛr pa gɩ birəre, wa hana Thãgbaa yiikɛ a‐n ˈlaanaˈ, dɩ gele awɩ kpɩɛr ˈleeraakɛ wɩ hananɩ na awɩ ha dibirə gɩ the. 19Awɩ puu cʋʋ na‐n thʋ wɩ haar fɩɩʋrakaˈ; wɩ gbaar dɩbara a faa dakhaba cʋʋrɛra, dɩ wa‐n cʋʋna thɔ̃ bisesɔ fɛʋʋkɛ n kɔ wɩnɩ thue.
20Sɩ nɛrɛ, ga do thale gɩ dɩɩr nɩ Kirisitii pa ga. 21Sɩ mee mɩ pɛrɛ haar nɩ nɩɛrɛ bɔɔbɔɔ mɔ̃ ɔɔda mɩɩnɩ, dɩ wɩ dɩɩr nɛr sobɔrɩkɛ hanɩ Jejura, 22gɛr dʋɔn a thɩɛna gaa dɔ nɩ faa cʋʋ pa tɩ̃ɩkɛ nɩ kɔɔ hananɩ mamara, kɛ dɔnɩ tɩɩ tɩ̃ dʋʋrɩkɛ hananɩ thɩ̃ ƴaal kpãkpãa kheuukɛ na‐n hiennəˈ, dɩɩ tʋɔ dɩ ga‐n jalna kʋɛ paar.#Kol 3:9 23Dɔ nɩ debi nɩ do daphaa haarra na kpɩɛrɛra. 24Nɩ tɔ tɩɩ pha dʋʋrɩkɛ Thãgba tini da‐n hʋʋ fɩl sarrɛra na phurrəəkɛ thɛnɩ sobɔrra.#Jən 1:26; Kol 3:10
25Gɛr gɩ dɔ nɩ faa sõsor sɩ nɛrɛ fɛʋ bɩɛlbɩɛl na‐n mɩɩ gɩrɛ dɔnɩ sobɔr ˈwalãkha tibillə, gɩdonɩ tomɩ ɓãasɔ sɩ do a dona tomɩ bɩɛl.#Jak 8:16 26A nĩkhii fʋ nɩ na‐n cʋʋ sopugoəˈ; na‐n do wire n lõ sɩ nĩkhii n cɩ naraˈ,#Khɩ 4:4 27dɩ na‐n faa Satã a yɩ lõ paaraˈ. 28Ʋrɛɛkɛ dʋɔnnɩ yudaar a na‐n yu bã, sɩ a ka na dɔ thɔ̃ bʋɔ na ɔɔ nyɛ̃ a hanana dakha gɩrɛ a na‐n ˈlaanɩ wɩrɛraakɛ thɩ̃ɛ n ɓɔrnɩ. 29Na‐n do thɩmɩɩ puu bɩɛllakɛ na‐n the anɩ nɔaˈ, sɩ na‐n mɩa thɩmɩɩ bʋɔ tɩbɩlala mɔ̃ thɩ̃ɛ ha warnɩ gɩ cʋʋ wɩ wɩ khɔ̃ wa‐n pɛr, gɩ dɔ thɩmɩaakɛ na bʋɔnɔnɩ wɩrɛraakɛ n nɩɛnɛnɩ. 30Na‐n cʋʋ haar ga‐n hel Thãgbaa Thu Phuəˈ; ɔr dɔ ʋrɛ dɔnɩ jɩɩn Thãgba dʋ narnɩ dɩɩ nɩna dɩ taarɛ na ˈlɛr dɩphã waa vʋ̃ʋ, wireekɛ na ɩnanɩ. 31Nɩ dɔna bɩ̃ gbur fɛʋ a faa, na nĩkhii, na nĩkhi khɩɩ, na so kɩɩr, na tibil i kʋɛrɛ, na bɩ̃ kpallɛsɔ fɛʋ. 32Sɩ nɩ ka na bɔ khasɔ a na jɛ kha bʋɔra, a faa sopugosɔ na hana kha mɔ̃kɛ Kirisiti donɩ nɔɔ dɩ Thãgba kɔɔ faarɔ anɩ sopugosɔ a ha nɩ.#Kol 3:13
Currently Selected:
Efɛjɩdara 4: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
