Efɛjɩdara 3
3
Polɩ Thãgba thɔ̃ ca kpalaa thɩ̃thɩɩn
1Gɛrra dɔ nɔɔ dɩ mɛr Polɩkɛ dɔnɩ khaɩdaar Jeju Kirisitii sora dɩɩ do nɛr ca kpala dɔ nɔɔ, n bɩɛl Thãgba dɩ ma‐n pɛ nar. 2Mɩ pɛrɛ haar nɩ nɩɛrɛ bɔɔbɔɔ mɔ̃kɛ Thãgba pɛ marnɩ thɔma dɩ ma‐n cʋʋ nɛrɛra, dɩɩ do ɔɔ bɔ jɩra gɩ the. 3Thãgba kɔɔ nɛ mar thɩ̃ɛ a cʋʋ mɩ dɩ ɩ̃ jɩ thɩ̃ gbulikɛ keranɩ, gɛr ha gɩrɛ mɩ kherenɩ a cʋɩ nar gbe; 4dɩ mɔ̃ nɩ‐n hɩɩnnɩ sɛbɛɛkɛ na punone na jɩ dɩ mɩ jɩɛ jɩ Kirisitii thɩ̃ gbulilera.#Kol 1:26–27 5Bɔɔkɛ kɔɔ kanɩ mamara tɩbɩla na kɔɔ jɩ thɩ̃ gbulikɛ mɔ̃kɛ Thu Phuu nɩna gɩnɩ gɩrɛ Thãgbaa thɔ̃thɔ̃daar phusɔra na ɔɔ tukɩr tidarara ga. 6Gɛr dɔ mɔ̃ ca kpala na bulni kha na Juifisɔ gɩrɛ wɩ hananɩ, a na debi dakha a na do tomɩ bɩɛlɩ ɓãɓã na wɛr, a na bulnə kha Thãgbaa ʋlfɛɛkɛ tibil na ˈlɛnɩ Jeju Kirisitira gɩ do tutugo bʋɔra gɩ the, 7kɛ mɩ doronɩ gɩrɛ thɔ̃thɔn dɩɩ ha mɔ̃kɛ khaardaakɛ Thãgba ha mɩnɩ ɔɔ fãgara hanɩ, sɩ dɩɩ do ɔɔ bɔ jɩra gɩ the. 8Mɛrkɛ dɔnɩ dabuu a jɔ tɩɩ phuusɔ fɛʋ, sɩ Thãgba kɔɔ jɩ mɛr bʋɔra a pɛ mar ma‐n mɩa ca kpala tutugo bʋɔɔkɛ dɔnɩ Kirisitii thɩ̃ ɓɔ̃ɔkɛ na hanɩ mɩɛrɛra ga, 9ɩ̃ cʋɛ tɩbɩla fɛʋ wɩ jɩɩ yɩ mɔ̃ thɩ̃ gbullə yɩrnɩ, gɩrɛ Thãgbaakɛ dɔnɩ thɩ̃ɛ fɛʋʋ Tidaar kɔɔ maanɩ kerre kɛkɛkɛ. 10Mɛ̃ dɩphã we gbɛbɩdara na cʋʋ fãgadara na punodara Thãgbaa dʋɔ dɩ wa jɩ Thãgbaa kpɛsɛɛkɛ jʋɔnɔnɩ. 11Thãgba cʋʋrɛ mɛ̃ dɩɩ nɩna ɔɔ kpɩɛrɩkɛ dɔnɩ khorrdaakɛ yɩranɩ dɩɩ do asɩ Kɔ̃tɩ̃ Jeju Kirisitira gɩ the, 12kɛ sɩ yɩrɔnɩ hʋɛ na ha pɛrɛɛkɛ sɩ hananaanɩ a na ba wɔrɔna Thãgba na ˈlar. 13Mɛ̃ gɩ mɩ‐n bɩɛl nɛr na‐n do nyɛ̃ɛ n khiir ni bɔ gaarɛraakɛ mɩ‐n yɩnɩ anɩ sora ga, anɩ dabɔ ga kɛr na do.
Polɩ Thãgba bɩɛl
14Gɛr dɔ kɩrʋ dɩ ma‐n gulẽga Thɩrɛɛ ƴɛra, 15kɛ fɛʋʋkɛ hanɩ thɩɩra na ƴũ n ˈlɛrnɩ ire, 16dɩ a na gba ɔɔ nɔ kpaa thɩ̃ ɓɔ̃ a cʋʋna nɩ nɩ ˈlɛ fãga gɩ jɔr anɩ hara, gɩ do ɔɔ Thu Phuurə gɩ the; 17Kirisiti n tɔɔ dakha anɩ hara gɩ the ha pɛrɛra, nɩ puno nɩ gɔ nɛɛ gɩ hulõ naʋra; 18nɩ puno na‐n jɩ na tɩɩ phuusɔ fɛʋ mɔ̃ Kirisitii naʋ pɛrnɩ, a gbaanna, a hulona, a gbaanna dakha ƴũ; 19nɩ jɩɩ jɩna ɔɔ naʋʋkɛ kanɩ jɩɩr fɛʋ, nɩ puno nɩ hi phi na Thãgbaa hi fɛʋ.
20Ʋrɛɛkɛ hananɩ punone dɩ cʋʋna thɩ̃ɛ, dɩɩ do ɔɔ fãgaakɛ n dɔnɩ thɔma asɩ hara gɩ‐n the, a‐n cʋʋrɛ dɩɩ jɔ gɩrɛ fɛʋ sɩ‐n bɩɛlnɩ na sɩ‐n kpɩɛrnɩ; 21ɔɔ i n dʋbarɔ we gbɛbɩdaraa thɩ̃thɩɩn bɔɔ fɛʋ waa khorr vʋ̃ʋ, gɩ do Jeju Kirisitii pa gɩ the. Amɛn.
Currently Selected:
Efɛjɩdara 3: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
