Efɛjɩdara 5
5
1Gɛr gɩ mɔ̃kɛ nɩ donɩ Thãgbaa bɩsãsɔɔkɛ a‐n nanɩ, na‐n dɔ ɔɔ phɛldara. 2Na‐n ɩrɛ naʋra mɔ̃kɛ Kirisiti kɔɔ na sɩnɩ a faa ɔɔbara asɩ sora, a do khaardaa na bonɩ jir Thãgbara, kɛ hɔnɩ thɩ̃ɛɛkɛ n hʋnaanɩ daʋ.#Thɩɩ 29:18; Khɩ 40:6
Ɩɩrɛ dahɩrɛra
3Sɩ ado bɔdɛl cʋʋrɛ gɩ, na thɩ̃ bise cʋʋrɛ, na ha pɩɛrɛ, na‐n dorakɛ thɩmɩɩ ca gele n too nɩ nɔɔ fɩɩʋrakaˈ, gele na teena tɩɩ phuusɔaˈ; 4mɛna gɩ dakha na yicur thɩmɩa, na folo folo mɩɩrɛ, agɩbo na nɔ jɩ thɩmɩaakɛ dɔnɩ thɩmɩɩ bise, sɩ dɔ nɩ ka na‐n mɩɩ Thãgbaa khɩɩ thɩmɩa. 5Gɩdonɩ nɩ jɩɛ jɩ dɩ bɔdɛl cʋʋdaar, na thɩ̃ bise cʋʋdaar, na ha pɩɛrdaarɩkɛ mãkhananɩ thɩl jir, na hana dɩkha Kirisiti na Thãgba fãgadaarɩ dʋɔaˈ.
6Na‐n do tibil n gba mɔlɔ thɩmɩa a na‐n fɩɩlna naˈ, gɩdonɩ gele n dɔ nɔɔ dɩ Thãgba n ɩɩrna nĩkhii nũ nʋʋrdarara. 7Gɛr gɩ na‐n bɔ kha fɩɩʋrakɛ na wele hanɩ thalaˈ. 8Mamara dabirə nɩ kɔɔ do, sɩ nɛnɛ̃kɛ mɔ̃ nɩ donɩ Kɔ̃tɩnɩda dahɩrɛ nɩ do. Na‐n hana fɩlɛɛkɛ dahɩrɛdara n hananɩ, 9gɩdonɩ ka dahɩrɛ hanɩ liir bɔ cʋʋrɛ dɩɩdɩɩ, na fɩl sarʋ, na sobɔr n ha. 10Nɩ mɩɛnɛ na hɩnɛ a jɛ gɩrɛ n danɩ Kɔ̃tɩn haar; 11sɩ na‐n bɔ kha fɩɩʋrakɛ na dabirəə thɔ̃aˈ, gɩdonɩ thɩ̃ bʋɔ na‐n the laˈ, sɩ nɩ ka tɔ gɩ thɛna na pɛ dahɩrɛra. 12Gɩdonɩ gɩrɛ tɩbɩlaale n cʋʋnɩ wolonena, gɩ‐n kʋrɛrakɛ yicuru mɩɩrɛra. 13Sɩ a ga thɩ̃ fɛʋʋle the dahɩrɛra pɩ gɩ‐n yɩrrɛ mɛ̃ gbelẽ gbelẽ, 14gɩdonɩ gɩrɛ dahɩrɛ n caranɩ gɩ‐n hɩrɛrɛ. Gɛr dɔ kɩrʋ dɩ gɩ so ayɩwɔɔ:
“Fɛrkɛ n daarɛnɩ, jaga,
ɩrɛ kherə a thɛ,
Kirisiti na carã fɛr.”
15Gɛr gɩ na‐n jɩɛ dʋ bʋrɛ anɩ ɩɩr para, na‐n ɩɩr də̃bəəl khaa ga, sɩ na‐n ɩrɛ dakpɛsɛ khaa. 16Ƴɩɛɛkɛ nɩ yɩnɩ na‐n faa gɩ ka fɩɩʋrakaˈ, gɩdonɩ bɔɔra nɛnɛ̃ waa ga bɔraˈ.#Kol 4:5 17Gɛr gɩ na‐n do jɩ ˈleedara ga, sɩ na‐n jɛ gɩrɛ dɔnɩ Kɔ̃tɩnɩ tuur.
18Na‐n do taan na‐n kʋ naˈ, dakhaba thɔma yɛ, sɩ nɩ ka dɔ Thu Phuu n hi ni. 19Nɩ gba Thãgbaa khɩkhɩɩ nɩ, na fɔfʋɔr nɩɛ, na Thu Phuu nɩɛsɔ a na khʋɛana khasɔ. Na‐n khɩna na anɩ ha fɛʋ na wireekɛ na danɩ Kɔ̃tɩn haar.#Kol 3:16–17 20Wire fɛʋ na‐n fʋɔrɛ Thãgba Thɩrɛ thɩ̃ɛ fɛʋra, gɩ do asɩ Kɔ̃tɩ̃ Jeju Kirisitii irə gɩ the. 21Kirisitii cʋ dɔ kɩrʋ nɩ wuro khasɔ bɩɛlbɩɛl na jɔ.
Khɛr na kuuni ˈli kha
22Khɛra, na‐n jɔ anɩbara anɩ kora mɔ̃ nɩ‐n jonɩ anɩbara Kɔ̃tɩnna.#Kol 3:18; 1 Pɩ 3:1 23Gɩdonɩ kuun dʋɔn yʋʋ khɛrra, mɔ̃kɛ Kirisiti donɩ yʋʋ we gbɛbɩdararaakɛ dɔnɩ ɔɔ tomɩ, kɛ a doronɩ gɩrɛ Taadaar. 24Mɔ̃kɛ we gbɛbɩdara n jonɩ dɩbara Kirisitira, khɛra teenanɛ wɩ jɔ dɩbara ɔmɛ̃ awɩ kosɔra thĩɛ fɛʋra.
25Kona, na‐n na anɩ thɛthɛɛ khɛr mɔ̃kɛ Kirisiti kɔɔ nanɩ we gbɛbɩdara a faa ɔɔbara awɩ sora,#Kol 3:19; 1 Pɩ 3:7 26dɩ mɛ̃ a na lee wɩ kpɩɩ mɔ̃ a cɔcɔɔ wɩnɩ na nyʋɔn na ɔɔ thɩmɩɩ, 27gɩ do nɔɔ a cʋʋ we gbɛbɩdaraalera ɓɔnanɩ wɩ jɩɩlʋʋ ƴɛ thɩ̃thɩɩn, wa hana jiine na tɔtɔɔ paar dɩ dɩkhaa thɩ̃ ga, sɩ wa phure a na ˈlee dɩ paar. 28Mɛ̃ gɩ kona teenanɛ wa‐n na awɩ thɛthɛɛ khɛr mɔ̃kɛ wɩ‐n nanɩ awɩ thɛthɛɛ tomɩ. Ʋrɛ naannɩ ɔɔ thɛthɛɛ khɛr, dɩbara a na. 29Gɩdonɩ tibil bɩɛl na hale n laarɛnɩ ɔɔ tomaˈ, sɩ a‐n haan gɛr da‐n jɩɩ tɛbɩrɩ gɩ, mɔ̃kɛ Kirisiti n cʋʋnɩ gɩrɛ we gbɛbɩdara, 30gɩdonɩ sɛr dɔ ɔɔ tomɩ ɓã. 31“Gɛr gɩ dɩ kuun na lee kha na ɔɔ thɩ na ɔɔ nɩ sɩ a ɓã kha na ɔɔ khɛr, wɛr yenyɔ n gbɛbɩ wɩ do tibil bɩɛl”, thale gɩ khere Thãgbaa sɛbɛra.#Jən 2:24 32Sobɔ kɔ̃tɩ̃ɩ gɩɩkɛ huloneni dɩ mɔ̃ mɩ yɩɛnɩ, thale Kirisiti ha gɩrɛ na ɔɔ we gbɛbɩdara. 33Sɩ ado nɛrɛ fɛʋ bɩɛlbɩɛl gɩ, kuun na‐n na ɔɔ thɛthɛɛ khɛr mɔ̃kɛ a‐n nanɩ ɔɔbara, sɩ khɛr na‐n cɔ ɔɔ ko.
Currently Selected:
Efɛjɩdara 5: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
