Mi Nɔnɔle 24
24
1Balaam a ye léé, é sɔ Gakelebale lɛ léé, é Izraɛl drɔɔ vo, yé é’ka go lɛ yo kɛlɛ lɛ bélé é vinin zo lo, naa, é yara dɔ bwi la zia. 2Balaam é yara nwa yé é Izraɛl lé sɔkɔnnu ye é dɔle wo bɛn ma do do. Yé Bale Léli a kun.
3Balaam élé balelawe fe, yé é léé:
Béɔɔ be Balaam dére lé ke ’ko:
Mian a yuɛ ke é fuole, a dére lo.
4Mian éé Bale dére maan,
’Té éé Plɛplɛfaazanbale lé yuɛzi yé, a dére lo.
Mi lé é dia é bli la, ’té a yuɛ a é fuole, a dére lo.
5Jakɔb, ilé sɔkɔnnu a é nɔnɔmi ’lɛ.
Izraɛl, i nyananu a é zima.
6Wa é sɔɔlale fɛfaana,
Wa bélé féinu lé wo ke yuu punma, wo zo;
Wa bélé aloɛyili lé Gakelebale a suru, a zo;
Wa bélé sɛdrɛyilinu lé ke ’yi gɔ la, a zo.
7’Yi wolé suonu fan ’té éé yoroan,
Yé alé fɛwɔlɛnu é dan fan lɛ ’yi fanle lé we ma.
A nwiinzan blɛn mini Agaga ta;
Yé alé plale mi nwiin é dan kɛlɛ lɛ plɛplɛ.
8Bale wo si Éjipiti tɛrɛ la,
É a wo lɛ plɛplɛ bélé du lé plɛplɛ zo.
Bɛnnu lé woo nwaan a ma, éé wo gya,
Éé wo wɔlɛnu yélié, yé éé wo fɔn‐o ’élé sawɔlɛnu nya.
9Éé zunwo ’é powuo ta, yé éé yiaan bélé golizra zo, bélé golizra tina zo.
De ɛ dan a nwa lɛɛ?
Dé miomian é i drɔɔ vo, ’bɛzan drɔɔ ’é voo;
Yé dé miomian bale pa i ma, ’wo bale pa ’bɛzan ma.
10Balak bli fli Balaam ma, é bɛ gyɛ, yé é lé Balaam lɛ léé: Maa i laa léé, i bale pa an nyanézannu ma, yé bé ye, i wo drɔɔ vo tan gɔnɔ yaa. 11’I si an va sin; ’i go ka va. Maa a fe léé, maa dan i tɔ kɛlɛ lɛ blɛn, naa, Gakelebale ilé tɔ yele yi ga. 12Balaam a zi pa Balak lɛ léé: Ii! munu lé i wo nwunvɔ an va, maa ’ka a fe lɛ wo lɛ loo? 13Dé Balak lé kɔn a é fanle gɔɔlifu valé kyan nya, dé é a nɔ an lɛoo, an ’ka bɔaléé, an Gakelebale dére ta buu, yé dé wenyané léé, dé wezin léé, yé maa a kɛlɛ lo; we lé Gakelebale a fé, yee lé maa fé. 14Yé bé ye, sin, maa dan go lɛ anlé munu va. ’I da, yé wean migɔnɔ ’ko é dan a kɛlɛ lɛ ilé munu lɛ é voéla, maa a zuo fe i lɛ.
15Balaam élé balelawe fe, yé é léé:
Béɔɔ be Balaam dére lé ke ’ko:
Mian a yuɛ ke é fuole, a dére lo.
16Mian éé Bale dére maan,
’Té é Loruzan bɔn‐in wenu dɔɔ,
’Té éé Plɛplɛfaazan Bale lé yuɛzi yé, a dére lo.
Mian éé diaan é bli la ’té a yuɛ a é fuole, a dére lo.
17Maa a yé, naa lao kaan lo,
An yuɛ vɔ a ta, naa, é ’ka é pu lo;
Monéné si Jakɔb va,
Plaminwiinyili nwa Izraɛl va,
É dan Moab munu fɔn lɛ ’wo san gi;
Yé é dan Sɛt lé nénu faa gyɛ lɛ.
18É dan pla lɛ Édom munu nwiin,
É dan pla lɛ é nyanézannu Séiinu nwiin,
Izraɛl é dan élé plɛplɛ nagɔɔn lɛ.
19Mi do é dan nwa lɛ Jakɔb gɔnɔ gi minwiinzan nya,
Yé munu lé wo vo fla, é dan wo gyɛ lɛ za ma.
20Balaam Amalɛk ye. É balelawe fe, yé é léé:
Amalɛk a bɛn vininzan nya,
Naa, é voéla a kulu é dan ga lɛ.
21Balaam Kéninu ye. É balelawe fe, yé é léé:
I dan mɔn lɛ i nyanana,
Ilé kɔn a é dɔle gɔlɛ ta.
22Naa, dé Asirinu go i nya luu gi bléyian va,
Wo dan Kéninu bin lɛ.
23Balaam balelawe fe yé é léé:
Yiba! dé Bale we ’ko kɛlɛ, de ɛ dan vo lɛ é yuɛmaa?
24Naa, ’yitagoronu é dan si lɛ Kitim,
Yé é dan yaa lɛ Asirinu nwiin, é valé Ébrunu nya,
Naa, wo dan yee kulu ga lɛ é ziin.
25Balaam nwa yé é go ’é va. Balak go élé fɛna.
Currently Selected:
Mi Nɔnɔle 24: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
