Mi Nɔnɔle 25
25
Wo yo ban Moab lé fɛna
(Wg 2:14; 2 BDWS 4:3–4; 1 Kor 10:8)
1Izraɛlnu nyana Sitim, yé Izraɛlnu kun wenyané kɛlɛle ma Moab blɛnnu va. 2Wo Izraɛlnu laa léé, ’wo pa ’wo va ’wolé bale banna, yé munu ana fɛ ble yé wo dia wolé balenu ’lɛ. 3Izraɛlnu zén wolé bale lé wa laama Baal‐Péɔɔ, a zuo. Yé Gakelebale bli fli wo ma. 4Gakelebale lé Moizi lɛ léé: ’I munu nwiinzannu faa zén ékeva, yé ’i weanwiinzannu faa dun Gakelebale ’lɛ yili ta, léé, Gakelebale lé bliflile é si Izraɛlnu ma. 5Moizi lé Izraɛlnu lé weblezannu lɛ léé: ’Ka faa do do, kalé munu lé wo zén Baal‐Péɔɔ zuo, ’ka wo gyɛ.
6Yé bé ye, Izraɛlnu va mi do da Madian le do nya é bwenu va, Moizi valé Izraɛlnu yuɛ va, ’té wa wuvɔna zén‐ékevasɔkɔn ’léé. 7Balebanzan Arɔn be Éléazaa be Finé we ’ko ye aan wo, é nwa munu va yé é din do si. 8É go Izraɛl gɔnézan zuo ’bɛlé sɔkɔn gi yé é wo fiénu fɔn ékeva wo bɔn la, din nya. Yé migyɛgyɛ lé é ke Izraɛlnu gyɛna, yé é dɔ. 9Munu lé migyɛgyɛ wo gyɛ, wa mi baa vu ta fié.
10Gakelebale we fe Moizi lɛ yé é léé: 11An bli lé é nwa Izraɛl ma, Balebanzan Arɔn be Éléazaa be Finé a dɔrala. Anlé maawo bli a a gi, azama. Yé an ’ka Izraɛlnu gyɛ lɛ an bliflile nya lo. 12Amalé, bé fe a lɛ léé, maa vole drɔɔ lé gipawe kɛlɛ a va. 13É dan kɛlɛ lɛ gipawe lé a glɛ ’ka lo, a nya, yee valé é kulunu zé nya lɛɛfaama. É ’élé Bale lɛi maawo, azama, yé é Izraɛlnu lé wenyané ’yibo.
14Izraɛl gɔné lé wa gyɛ Madian lezan va, wa laama Salu be Zimri, é a kɔn’léézan nya Siméɔn bɛn gi. 15Madian lezan lé wa gyɛ, wa laama Suu lu Kozbi. Suu a kɔn’léézan nya Madian bɛn gi.
16Gakelebale lé Moizi lɛ léé: 17’Ka Madiannu ye ka nyanézannu nya ma, yé ’ka wo gyɛ. 18Naa, wo ’wobo nagɔɔn ka nyanézannu nya. Wo ka saan wolé dabli kɛlɛle nya Péɔɔ lé we gi, yee valé wo buru Kozbi lé we gi; Madian minwiinzan do lu lé; wa gyɛ migyɛgyɛ nya a yi la bɛ, ’té wa Péɔɔ bɔna.
Currently Selected:
Mi Nɔnɔle 25: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
