Mi Nɔnɔle 23
23
1Balaam lé Balak lɛ léé: ’I balebanna sɔrafié dɔ an lɛ ’ko, yé ’i dirigɔné sɔrafié valé ’blagɔné sɔrafié ma ’lɛrɛ an lɛ ’ko. 2Wean Balaam a fe, Balak a kɛlɛ, yé Balaam valé Balak dirigɔné do valé ’blagɔné do gyɛ balebanna ta do do. 3Balaam lé Balak lɛ léé: ’I dɔ ilé balebanwi lé wa kyɛ blé, a punma, yé an dan si lɛ ana. Dé Gakelebale é dan bɔra lɛ an vaa? yé wean é dan a gɔɔn lɛ an lɛ, maa dan a zuo fe lɛ i lɛ. Yé é go fɛna nwale do na.
4Bale da Balaam va, yé Balaam lé a lɛ léé: An balebanna sɔrafié dɔ, yé maa dirigɔné do valé ’blagɔné do gyɛ wo ta do do. 5Gakelebale dére pa Balaam ’léé, yé é léé: ’I go Balak va, yé i dére ’ko fe a lɛ.
6É da a va, ’té Balak a é dɔle élé balebanwi lé wa kyɛ blé, a sɔnɔ, yee valé Moab minwiinzannu faa nya.
7Balaam ’élé balelawe fe yé é léé:
Balak a kɛlɛ léé, an si Aram tɛrɛ la,
Moab nwiinzan blɛn a kɛlɛ léé, an si yirinwanazia gɔnu nwiin;
É léé: ’I da, ’i bale pa an lɛ Jakɔb ma.
’I da, ’i bli fli Izraɛlnu ma.
8Mian Bale ’ka bale pa lɛ a ma lo ’naan, an bale paan ’bɛzan ma kaa?
Dé Gakelebale bli ’ka fli lɛ lo ’naan, an bli éé flian kaa?
9Maa Izraɛlnu ye, ’té maa a é dɔle gɔlɛgɔ nwiin,
Yé an yuɛ vɔ wo ta tirilii, ’té maa a gɔ nwiin loru.
Migɔnɔ do lé é ke é nyanale é yɛrama, yee lé,
Yé é ’ka é pale bɛnnu va lo.
10De ɛ bɔa Jakɔb lé nyéné nɔnɔle lɛɛ?
Yé de ɛ bɔa Izraɛl palu do ’léé fele lɛɛ?
’An ga mi tegelenu gabɛ gi ma;
Anzé ’wuo ’é pla bélé wozé zo ma.
11Balak lé Balaam lɛ léé: Mɛ we lé bé kɛlɛ an lɛ bɛɛ? Maa i laa léé, i bale pa an nyanézannu ma an lɛ ’naan, yé i wo drɔɔ voo? 12É a zi pa a lɛ léé: Wean Gakelebale a pa an ’léé ’naan, té maa a fe loo? 13Balak lé a lɛ léé: ’I da an va, ’ko go fɛ bɛna, yé ’bɛna lé i dan wo ye lɛ; i dan wo va palu do ye lɛ; i ’ka dan wo faa tere ye lɛ lo. Yé ’bɛna ’i bale pa wo ma an lɛ. 14É go a nya Sofim lé féi, Pizga gɔ nwiin; é balebanna sɔrafié dɔ, yé é dirigɔné valé ’blagɔné gyɛ wo ta do do. 15Balaam lé Balak lɛ léé: ’I dɔ ’ko ilé balebanwi lé wa kyɛ blé, a sɔnɔ, yé ko go kee lɛ Bale nya. 16Gakelebale da Balaam va, é dére pa a ’léé, yé é léé: ’I go Balak va, yé ’i dére ’ko fe a lɛ.
17É da a va, ’té Balak a é dɔle élé balebanwi lé wa kyɛ blé, a sɔnɔ, yee valé Moab minwiinzannu nya. Balak lé a lɛ léé: Mɛ we lé Gakelebale a fe i lɛɛ?
18Balaam élé balelawe fe, yé é léé:
Balak, ’i nwa, ’i tɔné dɔ.
Sipɔɔ be, ’i an ban i tɔné nya.
19Bale ’ka mi nya yé é vié wo lo.
É ’ka blami be nya yé a bli éé nɔlaan lo.
É wean fe ’naan, é ’ka dan a kɛlɛ lɛ loo?
É wean lɛ kini ’naan, é ’ka dan a lɛ sɔɔ lɛ loo?
20Bé ye, é léé, ’an wo drɔɔ vo.
É wo drɔɔ vo; maa ’ka ’bɛ sɛra lo.
21É ’ka weple yé Jakɔb gi monomono lo,
Wean é ’ka tegele lo, é ’ka a yé Izraɛl gi monomono lo.
Gakelebale, alé Bale a a va,
É a a nwiinzan blɛn nya,
Bale a Izraɛl ginanamazan nya.
22Bale wo si Éjipiti tɛrɛ la,
É plɛplɛ nɔ wo lɛ bélé du zé zo.
23Yokɛlɛle Jakɔb ma ’ka we do kɛla a lɛ lo,
Izraɛl ma ’monédɔle ’ka we do kɛla wo lɛ lo;
Yian wa dɔ, wo dan a fe lɛ Jakɔb valé Izraɛl ma a yi la léé:
Bale lé nyanama lé ke bɛ.
24Migɔnɔ ’ko woo nwaan bélé golizra tina zo.
Woo dɔa loru bélé golizra zo;
É ’ka yi gya lo fɔɔ yé wi lé é a gyɛ, é a ble,
Yé é a nyɛ flan.
25Balak lé Balaam lɛ léé: Dé i ’ka bale pana wo ma lo, té i wo drɔɔ vo lo. 26Balaam a zi pa Balak lɛ léé: Maa ’ka a fe lɛ i lɛ yi la léé, we faa lé Gakelebale a fe an lɛ, yee lé maa a fé loo? 27Balak lé Balaam lɛ léé: ’I da do. An dan go lɛ i nya fɛ bɛna; dé é dan sɔ lɛ Bale lɛ léé, i bale pa migɔnɔ ’ko ma ’bɛnaa? 28Balak go Balaam nya Péɔɔ gɔ nwiin, ’té bwi a wo wuo. 29Balaam lé Balak lɛ léé: ’I balebanna sɔrafié dɔ an lɛ ’ko, yé i dirigɔné sɔrafié valé ’blagɔné sɔrafié ma’lɛrɛ an lɛ ’ko. 30We lé Balaam a fe, Balak a kɛlɛ, yé é dirigɔné valé ’blagɔné gyɛ balebannanu ta do do.
Currently Selected:
Mi Nɔnɔle 23: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
