Mi Nɔnɔle 22
22
Balaam valé Balak lé we
(2 BDWS 23:3, 4; Joz 24:8–10)
1Izraɛlnu go, yé wo ’wolé sɔkɔnnu dɔ Moab lé fɛna pɛblɛɛna, Juudɛn yuu zi, Jériko yarazia.
2We faa lé Izraɛlnu a kɛlɛ Amorénu lɛ, Sipɔɔ be Balak a ye. 3Moabnu a ye aan wo léé, wa di minini, di kini wo gi é baba, yoyo zén wo gi Izraɛlnu lé we ma. 4Moab lé Madian lé mi segelenu lɛ léé: Mi gu blɛn ’ko, é dan fɛnu faa ble lɛ ko zi, fɛan zo lé diri éé lu blé féi, a zo. ’Bɛ bléyi va, Sipɔɔ be Balak ɛ ke Moabnu nwiinzan blɛn nya. 5É munu nwunvɔ Béɔɔ be Balaam va, Pétɔɔ lé ke yuu ma, ana, alé munu lé tɛrɛ la, léé, ’wa fe a lɛ léé: Bé ye, migɔnɔ do lé wo si Éjipiti tɛrɛ la, wo tɛrɛ faa ta sɔɔla, yé wa é nyanale an yara. 6Ilé zanté, ’i da, ’i bale pa munu ’ko ma an lɛ, naa, wo plɛplɛ mini an lɛ; dé ’bɛna lé an bɔa wo gyɛle lɛ, yé maa wo bin anlé tɛrɛ la, naa, maa gi dɔɔ léé, dé i mian drɔɔ vo, a drɔɔ é voo; yé dé i bale pa mian ma, éé ’bɛzan kunwo.
7Moab lé mi segelenu valé Madian lé mi segelenu go, ’té blɛnu lé wo dan a kɛlɛ lɛ ’monédɔzan lɛ, ’té ’bɛ a wo lee. Wo bɔ Balaam va, yé wo Balak dére fe a lɛ. 8Balaam lé wo lɛ léé: ’Ka yii, yé we lé Gakelebale é dan a fe lɛ an lɛ, maa dan a fe lɛ ka lɛ. Yé Moab nwiinzannu vo Balaam va.
9Bale da Balaam va, yé é lé a lɛ léé: Munu lé ke i va bɛ, denu léé? 10Balaam a zi pa Bale lɛ léé: Moab nwiinzan blɛn Sipɔɔ be Balak wo nwunvɔ an va yé wo léé: Bé ye, 11migɔnɔ do si Éjipiti tɛrɛ la, yé wo sɔɔla fɛfaana; ’i da bale pa wo ma; dé ’bɛna lé an bɔa wo gyɛle lɛ yé an wo biin? 12Bale lé Balaam lɛ léé: Té i go wo va pelo; té i bale pa munu ’ko ma monomono lo; naa, wo drɔɔ a é vole. 13Balaam nwa bladi, yé é lé Balak lé mi segelenu lɛ léé: ’Ka go kalé tɛrɛ la; naa, Gakelebale an gole ka va yi ga. 14Yé Moab mi segelenu nwa, yé wo go Balak va é ziin yé wo léé: Balaam ’ka a nyi si lɛ léé, é da ko va lo.
15Balak mi segelenu nwunvɔ é ziin, ’té wa kiɛre é mini a vininzannu lé é wo nwunvɔ, wo ta, yé wa tɔ blɛnzannu nya é mini wo ta. 16Wo bɔ Balaam va, yé wo lé a lɛ léé: Sipɔɔ be Balak léma: Té ’wo i dale an va yi ga lo, 17naa, maa dan i tɔ nwa lɛ blɛɛn, yé we faa lé i dan a fe lɛ an lɛ, maa dan a kɛlɛ lɛ. Ilé zanté, ’i da, ’i bale pa migɔnɔ ’ko ma an lɛ. 18Balaam a zi pa Balak lé nwunvɔmunu lɛ léé: Dé Balak lé kɔn a é fanle gɔɔlifu valé kyan nya, dé é a nɔ an lɛ, dé é a we blɛn nyaoo, dé é a we kiéné nyaoo, an ’ka bɔa we do kpen kɛlɛle lɛ Gakelebale, anlé Bale dére yigale we nya lo. 19Sin, kalé zanté, ’ka yii ’ko, yé we lé Gakelebale é dan a fe lɛ an lɛ é ziin, yé maa gi dɔɔ. 20Bale da Balaam va é béli, yé é lé a lɛ léé: Fɛan zo lé munu ’ko da i laa lɛ, ’i nwa, ’ka go wo nya, naa, we lé maa dan a fe lɛ i lɛ, ’i yee ɛ kɛlɛ. 21Balaam nwa bladi, é nyanatafɛ pla élé sokofale tina punu yé é vɔ a la yé wo go Moab lé mi segelenu nya.
22Bale bli fli a gole ma, yé Gakelebale lanje do dɔ a ’lɛ, zi dɔle a lee we ma. ’Té Balaam a é nyanale élé sokofale tina ta, ’té a wuomi fié a a va. 23Gakelebale lé lanje lé é ke é dɔle zia, gwɔun soile do nya é lee bɛ, sokofale tina a ye, yé é si zia yé é gyɛ a nya féi gi. Balaam sokofale tina bla, gole a nya é ziin zi ta we ma. 24Gakelebale lé lanje dɔ zi ’lɛzia dɔrɔféinu méléna, ’té gɔrɔ a é bole a bɛ fiénu la. 25Sokofale tina Gakelebale lé lanje ye tɔɔn, é si zia yé é tɛn gɔrɔ ma, yé é Balaam gane pa gɔrɔ ma. Balaam a bla é ziin. 26Gakelebale lé lanje gié wo ’lɛzia é ziin, yé é dɔ fɛna fɔnɔle na. 27Sokofale tina Gakelebale lé lanje ye, yé é yia Balaam wuo. Balaam bli fli a ma, yé é sokofale tina bla yili nya.
28Gakelebale sokofale tina ’léé lɛ so, yé é lé Balaam lɛ léé: Mɛ lé maa a kɛlɛ i lɛ yé i an bla tan gɔnɔ yaa? 29Balaam a zi pa sokofale tina lɛ léé: I an ma we nana, azama. Dé é vo lé gwɔun a an lee, ’té maa i gyɛ é nya do. 30Sokofale tina lé Balaam lɛ léé: Ilé sokofale tina lé i vɔa yifaama a ta, maa kaan loo? A zo lé maa kɛla turu i lɛɛ? Yé é léé: Gba.
31Gakelebale Balaam yuɛ lɛ so, yé Balaam Gakelebale lé lanje ye é dɔle zia, ’té gwɔun soile do a a lee, yé é zun yé é dia é bli la. 32Gakelebale lé lanje lé a lɛ léé: Mɛmalé ilé sokofale tina bla tan gɔnɔ yaa? Bé ye, an da zi dɔle i lee we ma, naa, zi lé i ke gona a ta, i sanna zi lé. 33Sokofale tina an ye, yé é nɔla an lee gɔnɔ yaa; dé é kɛlɛ léé, é ’ka nɔla lɛ an lee lo, ’té maa biiboen gyɛ yé maa yee vo é yuɛma. 34Balaam lé Gakelebale lé lanje lɛ léé: An wenyané kɛlɛ. Maa ’ka a gi dɔɔa léé, bii a é dɔle an ’lɛzia lo, yé sin, dé an gole ’ka sɔ lɛ i lɛ lo, an dan diéra lɛ. 35Gakelebale lé lanje lé Balaam lɛ léé: ’Ka go munu ’konu nya, naa, dérenu lé maa dan a fe lɛ i lɛ, yee saa lé bé fe ’té. Yé Balaam valé Balak lé mi segelenu go.
36Balak a ’ma léé, Balaam bɔ é pu, yé wo go a si lɛ zia fɔɔ Moab lé fla do lé é ke Aanɔn yuu gɔ la, Moab lé tɛrɛ glɛ mun ta, ana. 37Balak lé Balaam lɛ léé: Maa ’ka mi pa lɛ i lɛ zia i laana loo? Mɛmalé i ’ka da lɛ an va loo? An ’ka bɔa i tɔ bɔle lɛ loo? 38Balaam lé Balak lɛ léé: Bé ye, an da i va, dé é a weowean nya, i zi nɔ an lɛ sin léé, maa fee? Dérenu lé Bale é dan a pa lɛ an ’léé, maa dan a fe lɛ.
39Balaam valé Balak go, yé wo bɔ Kiijat‐Usɔt. 40Balak saraka bo dirinu valé ’blanu nya, yé é a ke pa zia Balaam valé mi segelenu lé wo ke a va, wo lɛ.
41’Bɛ é tu kini, Balak Balaam si, yé é go a nya Bamɔt‐Baal. Dé é a ’bɛna, Izraɛl mi lɛgɔnɔ do lé é ke a lɛ é pu, Balaam wo ye.
Currently Selected:
Mi Nɔnɔle 22: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
