Maleko 6
6
Kua Teteke e Tagata o Nahaleta ia Iehu
(Mat 13.53-58; Luk 4.16-30)
1Kua fano kehe ia Iehu mai kinā, kua toe foki ki tona nuku, ma na mulimuli atu ai ma nā hoko o ia, kua olo fakatahi ma ia. 2Kua pa ki te Hāpati oi na kāmata ai kua akoako atu ia Iehu i te hūnako. Nae tokalahi nā tino nae iei; i te kilātou lagonaga o nā akoakoga a Iehu, na taufai ofo uma lele ma fehili vē, “Ko fea nei te na maua mai ai e te tagata tēnei nā mea uma iēnei? He poto vēhea tēnei kua maua e ia? E vēhea nei te faiga o ana vāvega? 3E hē ko ia nei tēnei te kāmuta, te ataliki o Malia, te uho o Iakopo, Iohefa, Iuta ma Himona? E hē ko nā tuafafine uma nei o ia e i kinei ma kitātou?” Ko te mea ia na teteke ai e kilātou ia Iehu.
4Na vāgana atu ai ia Iehu kia te kilātou, “Ko nā pelofeta e mamalu i ho he mea, kae vaganā ai i o lātou lava nuku, ma i o lātou lava tagata, ma i o lātou lava kāiga.”#Ioa 4.44
5Na hēki ia mafaia oi fai he vāvega e fokotahi i kinā, kae vaganā ai te fakaeke atuga o ona lima ki luga o ni nāi tino nae tauale, ma na mālōlō ai kilātou. 6Ma na ofo lele ia Iehu ki te hē fakatuatua o tagata.
Kua Uga e Iehu Ona Hoko e toka Hefululua ke Tālaki
(Mat 10.5-15; Luk 9.1-6)
Oi na fano ai ia Iehu ki nā nuku i te kogāfenua tēnā, ma akoako atu ki tagata. 7Kua fakapotopoto mai e ia ona hoko e toka hefulu lua, oi na uga atu ai e ia kilātou ke olo tau toka lua. Na tuku atu e ia kilātou ke pule i nā agaga kino. 8Kua fakatonu vēnei atu e ia kilātou, “Nahe kavea e koutou he mea e fokotahi i te koutou malaga, vaganā ai he tokotoko—nahe kavea he falaoa, he ato pe ni tupe i outou taga.#Luk 10.4-11 9Fai ni outou hēvae, kae nahe kavea he kofutino fakaleoleo.” 10Oi na toe vē atu ai tana kupu kia te kilātou, “Ko fea lava e talia ai koutou, nonofo i te fale tēnā ke pa ki te taimi e toe olo kehe ai koutou mai te kakai tēnā. 11Kāfai koutou e tau atu ki he kakai e hē talia ai koutou, ma mumuhu ia tagata oi fakalogo atu kia te koutou, olo kehe ma kinā ma lūlū kehe te pefu mai outou vae. Ka kavea tēnā ma fakailoga ke kilātou iloa ai te ikuga ka pa kilātou ki ei.”#Gāl 13.51
12Oi na olo ai loa nā hoko kua tālaki atu ki tagata ke liliu kehe mai a lātou agahala. 13Na kilātou tuli kehea te tokalahi o nā tēmoni, ma uku i te lolo olive nā tauale e tokalahi ma na mālōlō ai kilātou mai o lātou tauale.#Iak 5.14
Ko te Mate o Ioane te Papatiho
(Mat 14.1-12; Luk 9.7-9)
14Kua lagona e te Tupu ko Helota#6.14 Tupu ko Helota Helota Anitipaha te tupu o Kalilaia nā mea iēnei ona kua takutakua lele te igoa o Iehu i ho he nofoaga. Ko iētahi tino nae lea vē, “Ko Ioane te Papatiho tēnei kua toe ola mai; ko te mea ia e ia mafaia ai oi fai nā vāvega.”#Mat 16.14; Mlk 8.28; Luk 9.19
15Ko iētahi nae lea vē, “Ko Elia tēnei.”
Ma iētahi nae lea vē, “He pelofeta tēnei, e vē lava ko nā pelofeta i nā aho kua leva.”
16Kae i te lagonaga e Helota, oi na vēake ai tana kupu, “Ko Ioane te Papatiho na kō fakatonua ke tipi kehe tona ulu, ka kua toe ola mai!” 17Ko Helota lava te na fakatonua ke puke ia Ioane ma noanoa, oi togi ai ki loto o te falepuipui. Na fai e ia te mea tēnei ona ko Helotia te āvaga a tona uho ko Filipo, kua fai ma ana āvaga.#Luk 3.19-20 18Ko Ioane nae viga lava kia Helota, “E fakahā i te Tūlāfono ke nofo koe ki te āvaga a tō uho!”
19Ko te mea ia nae ita ai ia Helotia kia Ioane, ma na fofou ai ke tāmate; kae na hēki mafai ke fai hana mea ki ei ona ko Helota. 20Ko Helota nae mataku ia Ioane, ona na ia iloagia ko he tino āmiotonu ma mālohi tona fakatuatua ki te Atua, ko te mea ia nae ia kikila lelei ai ke nahe iei he mea e tupu ki ei. Nae fiafia lele oi fakalogologo kia Ioane, e ui lava nae ia lagona te popole o tona loto i taimi uma nae ia lagona ai ia Ioane e tautala.
21Kae mulimuli ake, na maua te avanoa o Helotia ke tāmate ai ia Ioane. Kua pa ki te aho fānau o Helota, oi na fai ai e ia he kaiga na fakatahi atu ki ei nā ulu o te mālō, nā takitakikau, ma nā ulu o nofonofoga a tagatānuku o Kalilaia. 22Ma na hau ai te tama teine a Helotia#6.22 tama teine a Helotia ko iētahi tuhituhiga e leamai tama teine a Helota ko Helotia ki loto oi hiva i te kaiga, ma na fai ma mea na fiafia lahi lele ai ia Helota ma te kau valakaulia. Oi na lea atu ai ia Helota ki te tautiti, “Heā te fofou koe ki ei? Ka fōki atu e au kia te koe ho he mea lava e fofou koe ki ei.” 23Ma na fai ai tana tautōga ki te tautiti e vē, “Ko au e tautō atu e kō fōki atua mo koe ho he mea lava e fofou koe ki ei, e tuha lava pe ko te āfa o toku mālō!”
24Oi na fano ai te tautiti ki fafo oi fehili vē atu ki tona mātua, “Heā nei he mea ke lea au ki ei?”
“Lea ki te ulu o Ioane te Papatiho,” kua tali mai tona mātua.
25Na foki fakavave loa te tautiti ki te tupu ma lea vē atu ki ei, “Ko au e fofou ke fōki mai e koe nei lava, te ulu o Ioane te Papatiho i luga o he peleti lahi!”
26Na fakanoanoa lahi lele te tupu i te mea tēnei, kae ona ko tana tautōga na fai i mua o te kau valakaulia, na hēki ia mafaia ai oi teteke ki te mea kua lea ake ai te tautiti. 27Ko te mea ia na ia uga atua ai loa lava he fitafita ma te fakatonuga ke kaumai te ulu o Ioane. Oi na fano ai te fitafita ki te falepuipui kua tipi kehe te ulu o Ioane; 28ma na kaumai ai e ia i luga o he peleti lahi ma fōki ki te tautiti, oi na tuku atu ai e te tautiti ki tona mātua. 29I te lagonaga e nā hoko o Ioane te tala tēnei, oi na ōmamai ai oi kave tona tino oi tanu.
Kua Fafaga e Iehu he Kaifenua Tokalahi
(Mat 14.13-21; Luk 9.10-17; Ioa 6.1-14)
30Kua toe liliu mai te kau apohitolo kia Iehu, oi na taku ai e kilātou kia te ia nā mea uma na fai ma akoako atu e kilātou. 31Ko te tokalahi o nā tino nae ōmamai ma ōatu kia Iehu ma ona hoko, kua hē maua lele ai ho lātou avanoa ke kakai ai. Oi na vāgana atu ai ia Iehu ki ona hoko, “Tātou olo ki hētahi mea nā ko kitātou, kae ke mālōlō tahi foki koutou.” 32Oi na olo ai i he vaka nā ko kilātou, ki he kogāfenua e tūfua.
33Kae e tokalahi nā tino na kilātou kitea ma matea atu kilātou i te ologa; oi na mātuku atu ai loa ia tagata mai nā kakai uma, kua fetutuli kui gāuta, ma na taunuku muamua atu ai kilātou ki te mea na ōatu ki ei ia Iehu ma ona hoko. 34Koi fanake ia Iehu ki gāuta mai te vaka, kae na ia kitea atu te tokalahi o te kaifenua, oi na tumu ai tona loto i te alofa kia te kilātou, auā kua vē kilātou ni māmoe kua hēai ho lātou leoleomāmoe. Ma na kāmata loa oi akoako atu e ia kilātou i nā mea e lahi.#Nūm 27.17; 1 Tup 22.17; 2 NT 18.16; Ehk 34.5; Mat 9.36 35I te fakaafiafi lele, oi na ōmamai ai ona hoko kia te ia ma lea vē mai ki ei, “Ko kinei ko he kogāfenua e tūfua, ma kua pō foki. 36Uga kō nā tino ke olo ki nā fātoaga ma nā nuku e tafapili mai, ke fakatau ai ni a lātou mea ke kai.”
37Kae kua tali atu ia Iehu kia te kilātou, “Fōki ifo e koutou he lātou mea ke kai.”
Kua lea atu kilātou kia te ia, “Ka olo nei la kimātou oi fakatau mai ni falaoa e tuha ma te lua helau tēnali#6.37 tēnali Ko te tēnali e fokotahi e tuha tēnā ma te totogi o te tino galue fātoaga i te aho te tau, ke fafaga ai nā tino?”
38Oi na fehili atu ia Iehu, “E fia autou falaoa? Olo oi kikila pe fia.”
I te kilātou iloaga, oi na ōmamai ai oi lea vē mai kia Iehu, “E lima ia falaoa ma he luagamata ika.”
39Oi na lea ai ia Iehu ki ona hoko ke fakanonofo fai vāega nā tino uma lele i luga o te mutia. 40Kua nonofo ki lalo nā tino i ni vāega e tau toka helau iētahi, kae tau toka lima hefulu iētahi. 41Ma na puke atu ai ia Iehu ki nā falaoa e lima ma nā ika e luagamata, kua kikila ake ki te lagi ma fakafetai ki te Atua. Oi na tavaevae ai e ia nā falaoa ma fōki ki ona hoko ke tufatufa ki nā tino. Na tavaevae foki e ia nā ika e luagamata mo nā tino uma lele. 42Kua kakai ia tagata uma ma kua mākokona. 43Oi na ao ai e te kau hoko nā toegā falaoa ma nā toegā mea ika, ma na tūtumu ai nā polapola e hefulu lua. 44Ko te nūmela o te kau tagata na fafaga e toka lima afe.
Kua Havali ia Iehu i Luga o te Vai
(Mat 14.22-33; Ioa 6.15-21)
45Na fakatonu loa lava e Iehu ona hoko ke olo ki luga o te vaka ma ke muamua ki Petehaita i tētahi itū o te vai, kae kua uga e ia te kaifenua ke olo ki o lātou kāiga. 46Kua mātuku atu ia tagata, oi na fano ai ia Iehu ki luga o he mauga ke tatalo ai. 47Kua pa ki te afiafipō ko te vaka kua i lototonu o te vaitūloto, ka ko Iehu koi nofo tautahi i gāuta. 48Na ia kitea atu ko ona hoko kua fītatā lele i te aloga o to lātou vaka, ona ko te matagi nae hau tonu lava i te muāvaka. I te vā o te tolu ki te ono i te vaveao, na fanaifo ai ia Iehu ki nā hoko o ia, e havali i luga o te kilitai. Na fofou ke ia fakahaoa te vaka,#6.48 ke ia fakahaoa te vaka pe ke hopo ki luga o te vaka 49kae kua kilātou kitea atu ia e havali i luga o te kilitai. “E, te aitu!” na vē ifo kilātou i o lātou māfaufau, ma taukekē. 50Na mātataku uma kilātou i te kilātou kiteaga o ia.
I te taimi lava tēnā na vāgana mai ai ia Iehu kia te kilātou, “Fakamākekeke! Ko au tēnei. Koutou nahe mātataku!” 51Oi na hopo ake ai ia Iehu ki luga o te vaka, ma na toku ai loa foki ma te matagi. Na ofo lahi lele te kau hoko, 52auā ko hēki mālamalama lava kilātou i te uiga moni o te fafagaga o te toka lima afe; na faigatā lele oi mālamalama o lātou māfaufau i te mea tēnei.
Kua Fakamālōlō e Iehu nā Tauale i Kenehaleta
(Mat 14.34-36)
53Kua pa atu kilātou ki tētahi itū o te vaitūloto, ki he fenua e igoa ko Kenehaleta, oi na tau ai i kinā te vaka. 54I te olo kehega o kilātou mai te vaka, na matea vave lele atu e nā tino ia Iehu. 55Oi na tau fetuli ai kilātou i loto o te koga kātoa tēnā, ma tahiki nā tino tauale i luga o nā moega, ki ho he koga lava na kilātou lagona nae iei ia Iehu. 56Ma pe ko fea lava te na fano ki ei ia Iehu, ki nā nuku pe ki nā kakai pe ki nā fātoaga, nae kave e tagata o lātou tino tauale ki nā māketi ma fakatagi atu kia Iehu, ke tau lava ko nā tauale ke paki ake ki te pito o tona kofuloloa. Ma ko nā tino uma foki nā paki ki ei, na fakamālōlōgia.
Currently Selected:
Maleko 6: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
