Maleko 5
5
Kua Fakamālōlō e Iehu he Tamāloa nae Ulufia e ni Agaga Kino
(Mat 8.28-34; Luk 8.26-39)
1Kua pa atu ia Iehu ma ona hoko ki tētahi itū o te vaitūloto ko Kalilaia, ki te kogāfenua e igoa kia Kelaha. 2Ko te taimi lava na tū ake ai ia Iehu ki gāuta mai te vaka, kae fakafetaui atu kia te ia he tamāloa nae ulufia e he agaga kino; na hau i te mea e iei ai nā tugamau. 3Kua nofo mau lava i nā tugamau ma kua hēai he tino na ia mafaia oi noanoa te tamāloa, e pa lava ki te fakaaogāga o nā filifili; 4e lahi nā taimi nae noanoa ai nā vae ma nā lima, kae nae ia tamotua lava nā filifili ma talepea nā loka ukamea i ona vae. Nae hēai lele he tino na ia mafaia oi tāofiofi te tamāloa tēnei ona nae mākeke lahi. 5Nae eva lava i te mea nae iei nā tugamau ma i luga o nā mauga i te ao ma te pō, ma taukekē ma takohi tona tino i nā fatu.
6Ka koi mamao mālie atu ia Iehu, kae kua kitea atu ia e te tamāloa, oi na vili atu ai te tamāloa kua fakapakū ifo ki ona tulivae i mua o Iehu, 7ma kalaga leo lahi lele vē, “Iehu, te Ataliki o te Atua Hilihilikehe! Heā kō ta koe e fai mai kia te au? Ko au e talohaga atu kia te koe i te igoa o te Atua, nahe kē fakahāuā mai kō kia te au!” 8Na māfua te lea vēnā o te tamāloa ona ko Iehu na lea vē, “Te agaga kino, hau ki fafo mai te tamāloa!”
9Kua fehili atu ia Iehu ki te tamāloa, “Ko ai tō igoa?”
Na tali mai ia, “Ko toku igoa ko ‘Lēkeona’—e tokalahi kimātou!” 10Oi fakatagi atu ai te tamāloa kia Iehu ke nahe uga kehea nā agaga kino mai te kogāfenua tēnā.
11Nae iei he lafu puā lahi nae i kinā, nae kakai i tafa o he mauga. 12Oi na fakatagi atu ai nā agaga kino kia Iehu, kua lea vē atu, “Uga kō kimātou ki nā puā iēnā ma tuku kimātou ke feulu ki loto o kilātou.” 13Ma na fakataga ai kilātou e ia. Oi na olo ai ki fafo nā agaga kino mai te tamāloa ma feulu ki loto o nā puā. Ko te lafu kātoa e tuha e luaafe fakatahi—kua fetutuli ifo ki lalo i te tafatō o te mauga ki loto o te vaitūloto, ma na mālelemu uma ai.
14Ma na fetutuli kehe ai nā tino nae kikilāgia nā puā, ma fakahalalau te tala i te kakai ma i nā kogā nae pili atu ki ei. Oi na holo mai ai nā tino ke kikila ki te mea na tupu, 15ma i te tau atuga o kilātou kia Iehu, na kilātou kitea ai te tamāloa nae māhani oi ulufia e te tokalahi o nā tēmoni, e nofo i kinā ma kua fai ona kofu, ma kua lelei te māfaufau; oi na mātataku uma ai kilātou. 16Ko nā tino na kilātou kiteagia kua fakamatala e kilātou ki nā tino na ōmamai, te mea na tupu ki te tamāloa nae ulufia e nā tēmoni, ma te mea na pa ki ei nā puā.
17Oi na lea ai loa kilātou kia Iehu, ke fano kehe mai to lātou fenua.
18Ka koi tau hopo ake ia Iehu ki te vaka, ka kua fakatagi mai ki ei te tamāloa nae ulufia e nā tēmoni, “Fanatu kō au i tau kau?”
19Na hēki talia e Iehu. Kae na vāgana vē atu kia te ia, “Toe liliu ki te fale ki tō kāiga, ma taku kia te kilātou te lahi o nā mea na fai e te Aliki mo koe, ma te lahi o tona agalelei kia te koe.”
20Oi na fano ai te tamāloa kua kui atu i nā Kakai e Hefulu ma fakailoa atu ki ei nā mea na fai e Iehu mo ia. Na ofo lele ai kilātou uma na fakalogo kia te ia.
Ko te Afafine o Iāilo ma te Fafine na Paki ki te Kofuloloa o Iehu
(Mat 9.18-26; Luk 8.40-56)
21Kua toe foki ia Iehu i te vaka ki tētahi itū o te vaitūloto. I kinā, na tokalahi nā tino na ōmamai oi hiko fakatakamilo ia Iehu i te matāfaga. 22Kua pa atu ki kinā ia Iāilo, ko hētahi o takitaki o te hūnako, ma i te ia kitea atuga o Iehu, oi na fakapakū ai ki tafa o ona vae 23ma na fakatagi vē atu ki ei, “Ko toku afafine tamaiti e tauale tīgāina lahi. Hau kō fakamolemole oi fakaeke nā lima o koe ki ona luga, kae ke toe mālōlō ai ma ola!”
24Oi na fano ai ia Iehu kua olo ma Iāilo. Ko te tokalahi o nā tino nae mulimuli kia Iehu, kua nunu ki nā itū uma o ia.
25Nae iei he fafine kua kātoa te hefulu lua tauhaga nae tauale ai i te punatoto, 26e ui lava na tokalahi nā fōmai nae kilātou togafitia ia. Kua mole ana tupe, kae nae hē gaholo lele e feolōlo, kae nae gaholo lava e tīgāina lahi. 27Na lagona e ia te tala kia Iehu, oi na hau ai i loto o te kaifenua i tua o Iehu, 28kua lea vē ifo kia te ia lava, “Tau lava ko au ke paki atu ki tona kofuloloa, e mālōlō ai au.”
29Kua paki atu te fafine ki te kofuloloa o Iehu, ma ko te taimi foki lava tēnā na uma ai te punatoto; na ia lagona foki ki ona tino, ko ia kua mālōlō i tona tauale. 30Ko te taimi foki lava tēnā, na lagona ai e Iehu te fanatu o tona mana mai ia te ia, oi na liliu atu ai ki ona tua ki te kaifenua ma fehili vē atu, “Ko ai te na paki mai ki toku kofu?”
31Na tali mai nā hoko o ia, “E kē kitea ko tagata kua nunu mai kia te koe, kae fehili vēnā mai koe?”
32Kae na taukikila lava ia Iehu pe ko ai te tino na paki ake kia te ia. 33Na hāfia e te fafine te mea kua tupu, oi na hau ai, e tete i tona mataku, kua tōtuli i tafa o nā vae o Iehu ma taku atu kātoa kia te ia te meamoni. 34Ma na vāgana atu ai ia Iehu ki ei, “Toku afafine, ko tō fakatuatua kua mālōlō ai koe. Fano la, ma ke ia te koe te fīlēmū. Ko koe kua mālōlō i tō tauale.”
35Ka koi tautala vēnei atu ia Iehu, kae taunuku mai ni kavefekau mai te fale o Iāilo, ma kua lea vē mai kilātou kia Iāilo, “Ko te afafine o koe kua oti. Heā la te toe fakalavelave tauānoa ai koe ki te Faiākoga?”
36Na hēki fia tokaga ia Iehu ki#5.36 hēki fia… Iehu ki pe lagona atu e Iehu nā mea na lea ai kilātou, ma na lea vē atu ai kia Iāilo, “Ia koe nā mataku; talitonu oioti.” 37Oi na tāofi ai e Iehu te kaifenua, ma na hēki fakataga e ia he tino e toe mulimuli ake i tana kau ki te fale o Iāilo, vaganā ai ia Petelu, ma Iakopo ma Ioane te uho o Iakopo. 38Kua taunuku atu kilātou ki te fale o Iāilo, ma na kitea ai e Iehu te vevehi, ma na ia lagona foki te faitatagi ma te lauē o tagata. 39Kua ulu atu ia Iehu ki te fale ma na vāgana vē atu ai ki nā tino, “Heā te vevehi ai koutou ma faitatagi? Ko te tamaiti e hēki oti, kae e moe!”
40Ka kua kāmata oi fakatauemu kilātou kia Iehu. Oi na tuli ai e ia kilātou uma ki fafo o te fale, kae kave oioti te tamana ma te mātua o te tamaiti, ma ona hoko e toka tolu, kua olo ma ia ki loto o te potu nae iei ai te tamaiti. 41Kua tago atu ia Iehu ki te lima o te tamaiti ma na vāgana atu ai ki ei, “Tālita, kumi,” ko tona uiga, “Te Tautiti, ko au e lea atu kia te koe, tū ki luga!”
42Oi na tū ake ai loa ki luga te tamaiti i te taimi lava tēnā, ma kāmata oi hāvalivali. (Kua hefulu lua ona tauhaga.) Na ofo lahi lele nā tino ki te mea tēnei. 43Kae na fakatonu mālohi atu kilātou e Iehu, ke nahe takua lele e kilātou ki he tino, ma na vē atu ai tana kupu, “Fōki he mea ma te tamaiti ke kai.”
Currently Selected:
Maleko 5: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
