Maleko 7
7
Ko Akoakoga a nā Tupuna
(Mat 15.1-9)
1Ko iētahi o te kau Falehaio fakatahi ai ma ni faiākoga o te Tūlāfono na ōmamai mai Ieluhalema, kua fakapotopoto ki tafa o Iehu. 2Na kilātou kitea atu iētahi hoko nae kakai ma o lātou lima nae hē mamā#7.2 I nā tu tau tāpuakiga—ko tona uiga e hēki fafanoa o lātou lima e vē ko te fakahinoga a te kau Falehaio ki tagata ke mulimuli ki ei.
3(Auā ko te kau Falehaio ma tagata Iutaia uma, nae tauhihi lava ki nā akoakoga na kilātou maua mai i o lātou tupuna; nae hē mafai ke kakai heiloga e mua fafano o lātou lima, e vē ko nā tu tau tāpuakiga kua māhani ai. 4Nae hē mafai foki ke kakai kilātou ki ho he mea mai te māketi heiloga kua fufulu muamua.#7.4 ho he mea… kua fufulu muamua pe ho he mea kāfai e liliu mai i te māketi, heiloga kua fakamamā muamua kilātou Nae mulimuli foki ki te lahi o iētahi tūlāfono, e vē ko te faiga tonu nae fufulu ai nā ipuinu, nā ulo, nā ipu apamemea ma nā moega.#7.4 ma nā moega ko iētahi tuhituhiga e hē i loto ai te fakakupuga tēnei)
5Kua fehili atu te kau Falehaio ma nā faiākoga o te Tūlāfono kia Iehu, “Heā te hē mulimuli ai nā hoko o koe ki nā akoakoga na tuku mai e o tātou tupuna, kae kakai vē lava ma o lātou lima e hē mamā?”
6Na tali mai ia Iehu, “Te hako lele o Ihaia i tana vāloaga na fai e uiga kia te koutou! Ko koutou ni tagata āmio pepelo, e vē ona tūhia e ia:
‘Ko nā tino iēnei e viviki mai kia te au
ia lātou kupu,
ka ko o lātou loto e mamao lele ma au.#Iha 29.13 (LXX)
7E hē aogā ke tāpuaki mai kilātou kia te au,
auā e akoako e kilātou ia tūlāfono a tagata,
e vēia ni tūlāfono e a aku!’
8“Kua tuku kehe e koutou nā fakatonuga a te Atua, kae uhitaki ki nā akoakoga a tagata.”
9Na toe vāgana atu ia Iehu, “Kua teteke e koutou te tūlāfono a te Atua kae ke mulimuli ai pea koutou ki autou akoakoga. 10Auā na fakatonu mai e Mohe ke, ‘Āva ki tō tamana ma tō mātua,’ ma, ‘Ko ai lava e faia ni kupu kino ki tona tamana pe ki tona mātua, e tatau ke tāmate.’ #Eho 20.12; 21.17; Lev 20.9; Teu 5.16 11Kae e akoako e koutou kāfai ni tino e iei ni a lātou mea e ono mafai ke fehoahoani ai ki o lātou tamana pe ki o lātou mātua, kae kua lea koutou, ‘Ko te mea tēnei kua Kopana’ (ko tona uiga, e mo te Atua), 12kua fakahā e koutou ke fehoahoani ki nā tamana pe ki nā mātua o kilātou. 13Kua fai autou akoakoga iēnei ki nā tino, ma mea kua fakahēaogā ai e koutou te kupu a te Atua. E lahi foki iētahi mea vēnei e fai e koutou.”
Ko nā Mea e hē Mamā ai he Tino
(Mat 15.10-20)
14Oi na kalaga atu ai ia Iehu ki te kaifenua ke toe ōake tahi kia te ia, ma na vāgana atu ai ki ei, “Fakalogo mai koutou uma kia te au, ke mālamalama koutou. 15E hēai he mea i fafo e fano ki loto o he tino, e hē mamā ai i nā tu tau tāpuakiga. Kae ko te mea e hau ki fafo mai te tino te hē mamā ai.” 16#7.16 Ko iētahi tuhituhiga e fakaopōpo ki ei te fuaikupu 16: Fakalogo mai la, kāfai e iei ni outou taliga! (Kikila ki te 4.23)
17I te fano kehega o Iehu mai te kaifenua ma kua ulu atu ki loto o te fale, oi na lea ai ona hoko ki ei ke fakamālamalama ake kia te kilātou te talafakatuha tēnei. 18Na vāgana atu ia Iehu kia te kilātou, “Kua tutuha lava te koutou hē mālamalama ma iētahi tino. Ko koutou e hē mālamalama? E hēai he mea i fafo e fano ki loto o he tino kui atu i te gutu, e hē mamā tauānoa ai i te tūlāfono, 19auā e hē fano ki tona loto kae fano ki loto o tona manava oi fano ai ki fafo o tona tino.” (I tana tautalaga tēnei, na fakailoa ai e Iehu ko nā meakai uma lele e lelei ke kakai ki ei.)
20Ma na toe vēnei atu te kupu a Iehu, “Ko te mea e hau ki fafo mai te loto o he tino te hē mamā ai ia. 21Auā ko te loto o te tagata e puna mai ai nā manatu kino ma tataki ai ke fai nā āmioga kino, te kaihohoa, te tāmate tino, 22te mulilua, te manako lahi, ma te fai o nā itūkāiga āmio kino uma, te talapepelo, te faiāmio, te lotokino, te faitala fakakino, te fāfia ma te āmio valea. 23Ko nā mea kino uma iēnei e puna mai i te loto o he tino ma fai ma mea e hē mamā ai ia.”
Ko te Fakatuatua o he Fafine
(Mat 15.21-28)
24Kua fano kehe ia Iehu mai kinā ma kua fano ki te kogāfenua e pili ki te kakai ko Tulo.#7.24 Ko iētahi tuhituhiga e fakaopōpo ki ei ma Haitonu Kua ulu atu ia ki loto o he fale ma na hēki fofou ke iloa e he tino ko ia ei kinā, kae na iloa lava. 25Nae iei he fafine na ulufia tana tama teine e he agaga kino. Na lagona lava e ia te fakamatalaga e uiga kia Iehu, oi na fano ai ki ei i te taimi lava tēnā, kua tōtuli i mua o Iehu. 26Ko te fafine ko he tino Eleni, na fānau i Foenihia i Hulia. Kua fakatagi kia Iehu ke tuli kehe te tēmoni nae ulufia ai tana tama teine. 27Kae na tali atu ia Iehu ki ei, “Ke fafaga muamua ia tamaiti, auā e hē ko he mea tatau ke kave te meakai a tamaiti oi togi ki nā maile.”
28Kae na tali mai te fafine, “Io e hako te Aliki, kae e pa foki lava ki nā maile i lalo o te laulau, e kakai ki nā matutuga a tamaiti e malili ki lalo!”
29Oi na vāgana atu ai ia Iehu ki te fafine, “Ona ko tau tali tēnā, fano la ki te fale o koe, ko te tēmoni kua fano kehe mai tau tama teine!”
30Na fano loa te fafine ki tona fale, ma na ia maua atu tana tama teine e tautakafili i luga o te moega; ma e hako lava ko te tēmoni kua fano kehe ma ia.
Kua Fakamālōlō e Iehu he Tino Tutuli ma Gūgū.
31Kua fano kehe ia Iehu mai te kogāfenua tēnā o Tulo, ma kua toe foki ki te Vaitūloto ko Kalilaia, kui atu i Haitonu ma nā kogāfenua o nā Kakai e Hefulu. 32Na kaumai ai e ni tino kia te ia he tamāloa nae tutuli ma tau hē mafai ke tautala. Kua fakatagi atu kilātou kia Iehu ke fakaeke ona lima ki luga o te tutuli. 33Oi na tataki kehe ai e Iehu te tutuli mai te kaifenua, kua nā ko kilāua toka lua. Ma na tuku ai nā muamuālima o Iehu ki loto o nā taliga o te tutuli, kua feanu, ma paki atu ai foki ona muamuālima ki te laulaufaiva. 34Oi na kikila ake ai ia Iehu ki te lagi, kua mānava lahi ma lea vē atu ki te tino, “Efata,” ko tona uiga, “Matala loa!”
35Oi na matala ai ona taliga, ma kua kave kehe te mea nae lave ai tana tautala; ma na kāmata ai kua lelei tana tautala. 36Oi na fakatonu ai e Iehu ia tagata ke nahe kilātou takua lele ki he tino te mea kua tupu; ka kua fakaātili ai te kilātou tālakia o te tala. 37Ko nā tino uma na fakalogo ki te tala tēnei, na ofo lahi lele ma lea vē, “Kai te lelei o te faiga o nā gāluega a ia! E pa lava ki nā tutuli ma nā gūgū kua toe taligalogo ma tautatala!”
Currently Selected:
Maleko 7: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
