Maleko 4
4
Ko te Talafakatuha o te Tino Lūlūhaito.
(Mat 13.1-9; Luk 8.4-8)
1Kua toe kāmata foki oi akoako atu e Iehu ia tagata i tafa o te Vaitūloto ko Kalilaia. Ona ko te tokalahi o te kaifenua na fakapotopoto fakatakamilo mai ki ona tafa, na hopo ai ia ki luga o he vaka, ka ko te kaifenua kua laulaututū ifo i te matāfaga.#Luk 5.1-3 2Na fakaaogā e ia nā talafakatuha ke akoako ai kilātou i nā mea e lahi. Kua lea vē atu ia kia te kilātou:
3“Fakalogo mai! Nae iei he tino na fano oi lūlū ni fatu haito i tona fātoaga. 4I te lūlūga e ia o nā fatu haito, na pakukū ai iētahi fatu haito ki luga o te auala, ma na ōmamai ai nā manulele oi kai uma lele. 5Ko iētahi fatu haito na pakukū ki luga o he mea fatufatua e tau hēai he kelekele i ei, ma na vave lele oi tutupu ake nā lau ona ko te kelekele nae hē loloto. 6Kae i te fanakega o te lā ki luga, na velahia ai nā tamā lākau ma e hēki mataloa kae kua kāmata oi magumagu, auā ko nā aka e hēki ola lahi ki lalo. 7Ko iētahi fatu haito na pakukū ki te mea nae ola ai nā vao mātuituia, ma kua ola ake nā vao mātuituia kua taomia ai nā tamā lākau, ma na hēki fua mai ai ni fua. 8Ka ko iētahi fatu haito na pakukū ki luga o te kelekele lelei oi na fua mai ai nā fuāhaito, kua tuputupu ma taufuifui: ko iētahi na fua mai e taki tau tolu hefulu, ko iētahi e taki tau ono hefulu ma iētahi e taki tau helau.”
9Kua fakauma ia akoakoga a Iehu oi na lea vē atu ai, “Kāfai e iei ni outou taliga, fakalogo mai la!”
Ko te Pogai e Fai ai nā Talafakatuha
(Mat 13.10-17; Luk 8.9-10)
10Mulimuli ake, ko Iehu nae nofo tautahi kae kua ōmamai kia te ia na tino nae iei i te faiga o ana akoakoga, fakatahi ma ona hoko e toka hefulu lua, kua lea ki ei ke fakamatala ake te uiga o nā talafakatuha. 11Na tali atu ia Iehu kia te kilātou, “Kua uma te fakailoa atu kia te koutou te mealilo e uiga ki te Mālō o te Atua, kae mo iētahi tino, e iloa oioti e kilātou nā mea uma e ala i nā talafakatuha, 12kae ke
‘Kikila ma kikila kilātou,
kae hē kilātou kitea;
ke fakalogo ma fakalogo,
kae hē mālamalama.
Auā kana kilātou kitea
ma mālamalama, ma liliu ki te Atua,
e vēnei ake kua ia fakamāgaloa kilātou.’ ”#Iha 6.9-10 (LXX)
Kua Fakamatala e Iehu te Uiga o te Talafakatuha o te Lūlūhaito
(Mat 13.18-23; Luk 8.11-15)
13Oi na fehili atu ai ia Iehu kia te kilātou, “Ko koutou nei e hē mālamalama i te talafakatuha tēnei? Ka vēhea nei la ona mafai ke mālamalama koutou i nā talafakatuha uma? 14Ko te tino lūlūhaito e lūlū e ia te fekau e uiga ki te mālō o te Atua. 15Ko iētahi tino e fakatuha ki nā fatu haito e pākukū ki luga o te auala; ko te taimi lava e kilātou lagona ai te fekau, oi e hau ai ia Hatani oi toe kave kehe. 16Ko iētahi tino e fakatuha ki nā fatu haito e pakukū ki luga o te kelekele fatufatua. Ko te taimi lava e kilātou lagona ai te fekau, oi talitonu loa ki ei ma te fiafia. 17Kae e hē loloto to lātou talitonu ma e hē tūmau mataloa ai foki. Ko te taimi lava e pa mai ai ia puapuagā ma fakahāuāga ona ko te fekau, e vave lele oi uma to lātou talitonu. 18Ko iētahi tino e fakatuha ki nā fatu haito e pākukū ki te mea e ola ai nā vao mātuituia. Ko nā tino iēnei e kilātou lagona te fekau a te Atua, 19kae ko popōlega o te olaga ma te mānumanu ki koloa o te lalolagi, ma iētahi mea uma e naunau ki ei, kua tumu ai te loto ma taomia ai te fekau ma hē fua mai ai ni fua. 20Ka ko iētahi tino, e vē ko nā fatu haito e lūlū ki luga o te kelekele lelei. E lagona e kilātou te fekau oi talia ai e kilātou ma fua mai ai nā fua: ko iētahi e taki tau tolu hefulu, e taki tau ono hefulu iētahi, ka ko iētahi e taki tau helau.”
He Mōlī i Lalo o he Tānoa
(Luk 8.16-18)
21Na toe lea atu vēnei ia Iehu kia te kilātou, “E iei nei he tino e ia tutua he mōlī ma tuku ai ki lalo o he tānoa, pe ki lalo o he hofa? E hē ia fakatūa nei ki luga o he tūgālāmepa? #Mat 5.15; Luk 11.33 22E hēai he mea e mumuni ka hē toe fakaalia; e hēai foki he mea e tatao ka hē toe kitea. #Mat 10.26; Luk 12.2 23Kāfai e iei ni outou taliga, fakalogo mai la!”
24Na vāgana atu foki ia Iehu kia te kilātou, “Fakalogo lelei ki nā mea e lagona e koutou! Ko nā tūlāfono e fakaaogā e koutou ke fakamahino ai iētahi tino, ka fakaaogā foki e te Atua ke fakamahino ai koutou#4.24 Ko nā tūlāfono… fakamahino ai koutou pe Ko te lahi o te koutou fakalogo, ko te lahi foki ia o te koutou mālamalama—kae ka mamafa lahi atu la mo koutou.#Mat 7.2; Luk 6.38 25Auā ko nā tino kua iei ni mea, ka toe fōki ki ei, ma ko nā tino e hēai ni mea, ka kave kehe mai ia te kilātou ke pa lava ki he tamā mea lele kua ia te kilātou.”#Mat 13.12; 25.29; Luk 19.26
Ko te Talafakatuha o te Fatu Haito e Tuputupu Ake
26Kua toe vāgana atu ia Iehu, “Ko te Mālō o te Atua e fakatuha ki he tino e lūlūa nā fatu haito i tona fātoaga. 27E moe i nā pō kae ala i nā ao oi fai ana fekau. I te taimi tēnā, ko nā fatu haito e ola ma tuputupu ake nā lau. Kae e hē ia iloa pe vēhea ona tupu tēnei mea. 28Ka ko te kelekele lava te ala ai ona ola nā lākau ma fua mai ai nā fua; e muamua hula te lau, hohoko ai te ulu haito, oi hohoko ai loa ma te ulu haito kua tumu i te fuāhaito. 29Kāfai e matua te fātoaga, oi kāmata loa oi tipi ki lalo e te faifātoaga i tana naifi helehele, auā kua pa ki te taimi o te helehelega.”#Iel 3.13
Ko te Talafakatuha o te Fatu Hīnapi
(Mat 13.31-32, 34; Luk 13.18, 19)
30Kua fehili atu ia Iehu, “Heā nei he talafakatuha ke fakamālamalama ai e kitātou te Mālō o te Atua? 31E fakatuha ki he fatu hīnapi e totō e he tino i te kelekele. Ko te fatu lākau ia e pito hili ona taigole i lo fatu lākau uma; 32kae kāfai e totō ma ola ake, e kavea ia ma lākau e pito hili ona lahi i lo nā lākau uma. Ka tutupu ake ona lālā lalahi, ma ōmamai ai nā manulele oi fai o lātou ōfaga i tona paolo.”
33Na fakaaogā te lahi o nā talafakatuha vēnei e Iehu, i te tālaki atuga o tana fekau ki tagata; ko te lahi o nā mea nae lea ai ia Iehu nae fua lava ki te mea na mafai ke mālamalama ai kilātou. 34Na hēki mafai ia Iehu ke akoako atu ki tagata e aunoa ma te fakaaogā e ia o nā talafakatuha, kae kāfai ko ia oioti ma ona hoko, oi fātoā fakamālamalama ai e ia nā mea uma lele kia te kilātou.
Kua Fakamālū e Iehu he Afā
(Mat 8.23-27; Luk 8.22-25)
35I te afiafipō o te aho lava tēnā, na vāgana atu ai ia Iehu ki ona hoko, “Tātou olo ki tētahi itū o te vaitūloto.” 36Oi na olo kehe ai loa kilātou mai te mea nae iei te kaifenua; kua hohopo te kau hoko ki luga o te vaka nae i luga ai ia Iehu, ma na olo fakatahi ai. Nae iei foki iētahi vaka na olo fakatahi ma kilātou. 37Kae nā lava e teki ko he matagi mālohi kua kikini mai, ma kua kāmata oi hopokia te vaka, ma kua tau tumu i te vai. 38Ka ko Iehu nae moe i te mulivaka, e aluga i he aluga. Na fafagu loa ia Iehu e ona hoko ma lea vē atu ki ei, “Te Faiākoga, ko koe nei e hē popole kia te kitātou kua tāli mamate?”
39Na tū ake loa ia Iehu ki luga, ma fakatonu vē atu e ia te matagi, “Tokihi loa!” kua lea vē atu foki ki nā galu, “Totoka loa!” Oi na toku ai loa te matagi ma toka te tai, ma kua tokihi te malino. 40Oi na vāgana atu ai ia Iehu ki ona hoko, “Heā te mātataku ai koutou? Koi hēai nei lava he koutou fakatuatua?”
41Na mātataku lele kilātou ma na lea vē atu ai tētahi ki tētahi, “Ko ai te tagata tēnei? E pa foki lava ki te matagi ma nā galu e uhitaki kia te ia.”
Currently Selected:
Maleko 4: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
