Maleko 13
13
Kua Vāgana ia Iehu e Uiga ki te Fakakinoga o te Mālumalu
(Mat 24.1-2; Luk 21.5, 6)
1Ka koi fakahao atu ia Iehu ki fafo o te Mālumalu, kae kua lea atu tētahi ona hoko ki ei, “Te Faiākoga, kikila! Kai te mānanaia o nā fatu ma nā fale.”
2Na tali mai ia Iehu, “E kē kitea nā fale lalahi iēnā? Ka hē toe iei he fatu e fokotahi e tū i luga o hētahi fatu; ko nā fatu takitahi uma lele ka togi ki lalo.”
Ko nā Puapuagā ma Fakahāuāga
(Mat 24.3-14; Luk 21.7-19)
3Ko Iehu nae nofo i luga o te Mauga o Olive, e fakafeagai tonu ma te Mālumalu i tētahi itu o te vanu, kae kua ōatu ia Petelu, ko Iakopo, ko Ioane ma Anitelea nā ko kilātou, kua lea vē atu kia te ia, 4“Taku mai ake kia te kimātou pe ko āfea te ka tupu ai te mea tēnei, ma pe ko heā foki he fakailoga ke iloa ai e kimātou kua tāli pa ki te taimi e fakatāunuku ai nā mea iēnei?”
5Na tali atu ai ia Iehu kia te kilātou, “Koutou ke mataala kae ke nahe fakahehēa koutou e he tino. 6E tokalahi nā tino ka ōmamai i toku igoa ma lea vē, ‘Ko au ko te Mehia’ ma ka fakahehē e kilātou te tokalahi o tagata. 7Ma ia koutou nahe mātataku kāfai e lagona e koutou te faitapiha o ni taua e pili mai, ma ki ni fakamatalaga e uiga ki ni taua i nā koga mamao. Ko nā mea iēnei e tatau lava ke tutupu, kae e hē vēake ai la ko te ikuga kua pa mai. 8Ka hiki taua tētahi fenua ki tētahi fenua, ma tētahi mālō ki tētahi mālō. Ka iei nā mafuie i nā koga kehekehe uma, ma ka iei nā oge. Ko nā mea iēnei e vē lava ko nā tīgā muamua o he fafine e fānau.
9“Koutou lava ke kikila lelei. Ko koutou ka puke ma kave ki te fakamahinoga. Ka kini i loto o nā hūnako; ka tutū i mua o nā kōvana ma nā tupu ona ko au, ke fakailoa atu kia te kilātou te Tala Lelei. #Mat 10.17-20; Luk 12.11-12 10Auā ko te Tala Lelei e tatau ke mua tālaki ki mālō uma, ka ko hēki pa mai te ikuga o te lalolagi. 11Ma kāfai koutou e puke ma kave ki te fakamahinoga, koutou nahe popole pe ka vēhea ake hautou tala e fai ki ei; kāfai e pa ki te taimi tēnā, tautatala lava i nā kupu ka fōki atu kia te koutou. Auā ko nā kupu e tautatala ai koutou ka hē a koutou, kae ka hau mai te Agaga Paia. 12Ka tuku atu e te uho tona uho ke tāmate, ka vēnā foki oi fai e tamana kia lātou fānau. Ka fakahaga tau ia fānau ki o lātou mātua ma tuku atu e kilātou ke tāmate, 13ka inohia koutou e tagata uma ona ko au. Kae ko te tino e onohai pea lava ke pa ki te ikuga, ka lāveakia.#Mat 10.22
Ko te Mea Matakutia te Kino ma te Inohia
(Mat 24.15-28; Luk 21.20-24)
14“Ka kitea e koutou ‘Te Mea Matakutia te Kino ma te Inohia’ e tū i te mea e hē tatau ke iei ai.” (Ke mālamalama te tino faitau i te uiga o te mea tēnei!) “Ko koutou la e nonofo i Iutea, e tatau ke hōhola ki luga o nā mauga. #Tan 9.27; 11.31; 12.11 15Ko te tino e i luga o te tuāfale o tona fale, nahe māumau he taimi ke fanaifo ai ki lalo ma toe ulu ki loto o te fale ke kave he mea. #Luk 17.31 16Ko te tino e galue i te fātoaga, nahe toe foki ki tona fale ke kaumai tona kofuloloa. 17Kai te fakaalofa o te mea ka pa ki ei nā fafine e manavakīkī ma nā mātua koi fakahuhu a lātou pepe, kāfai e pa ki nā aho iēnā! 18Tatalo ki te Atua ke nahe tutupu nā mea iēnei i te tau mālūlū! 19Auā ko nā puapuagā ka pa ki ei i nā aho iēnā, ka hili lele atu te kino i lo ni iētahi puapuagā na kua pa ki ei ia tagata, mai te taimi o te foafoaga e te Atua o te lalolagi i te kāmataga, ke pa mai lava ki te taimi nei. Ka hē toe mafai lele foki ke toe tupu he mea vēnei. #Tan 12.1; Fkl 7.14 20Kae kua uma te fakataigole e te Aliki te nūmela o nā aho; moinei ake e hēki ia faia te mea tēnei, e hēai he tino fokotahi na mafai ke ola. Kae ona ko te alofa o te Atua ki ona tagata kua uma te ia filifilia, kua fakataigole ai e ia te nūmela o nā aho iēnā.
21“Kāfai la he tino e lea atu kia te koutou, ‘Kikila, tēnei te Keliho’ pe lea vē, ‘Kikila, tēnā te Keliho!’—koutou nahe talitonu ki ei. 22Auā ka ōmamai nā Keliho pepelo ma nā pelofeta pepelo. Ka kilātou faia ni vāvega ma ni mea ofōfogia ke fakahehē ai ia tagata, ke pa lava ki tagata kua filifilia e te Atua, pe kāfai e mafai. 23Koutou la ke mataala! Kua fakailoa atu e au kia te koutou nā mea uma ka ko hēki pa ki te taimi e tutupu ai.
Ko te Haele mai o te Ataliki o te Tagata
(Mat 24.29-31; Luk 21.25-28)
24“I nā aho kāfai ka uma nā fakahāuāga, ka gaholo loa e pōuli te lā, ka hē toe huhulu te māhina, #Iha 13.10; Ehk 32.7; Ioe 2.10, 31; 3.15; Fkl 6.12 25ka pakukū nā fetū mai te lagi, ma ko nā mālohiaga o te vāteatea ka lūlū kehe mai o lātou alāvaka tūmau. #Iha 34.4; Ioe 2.10; Fkl 6.13 26Oi ka kitea atu ai te Ataliki o te Tagata e haele mai i loto o nā ao, ma te mana, ma te mamalu hilihili kehe. #Tan 7.13; Fkl 1.7 27Ka uga atu e ia nā āgelu ke fakamāopōpo mai nā tino kua uma te ia filifilia mai nā pito e fa o te lalolagi, mai tētahi itūlagi ki tētahi.
Ko te Akoakoga e Kitea i te Mati
(Mat 24.32-35; Luk 21.29-33)
28“Ke kavea te mati ke maua ai he akoakoga mo koutou. E kāmata loa oi lanu meamata ma vavai nā lālā, ma kāmata oi tutupu ake ona lau, e iloa e koutou ko te tau māfanafana kua tāli pa mai. 29E vēnā foki lava kāfai e koutou kitea nā mea iēnei e tutupu, ka koutou iloa ai kua tāli pa mai te taimi, kua hāuni ka kāmata.#13.29 kua tāli pa… hāuni ka kāmata pe kua pili mai ia, kua hāuni ke hau 30E takutino atu e au kia te koutou, ko nā mea uma iēnei e tutupu, ka ko hēki feoti uma nā tino o te tupulaga tēnei. 31E mou kehe atu te lagi ma te lalolagi, ka ko aku kupu e tūmau pea lava.
E hēai he Tino e ia Iloa te Aho pe ko te Itūlā
(Mat 24.36-44)
32“Kae e hēai he tino e ia iloa, pe pa mai āfea te aho tēnā pe ko te itūlā—e hē iloa e nā āgelu i te lagi, e hē iloa foki e te Ataliki, kae nā ko te Tamana oioti te ia iloa. #Mat 24.36 33Koutou la ke mataala, auā e hē koutou iloa pe ko āfea e pa mai ai te taimi. 34Ka vēia ko he tamāloa e tuku e ia tona fale mo hana malaga, ma tuku ai ki ana kaukauna ke kikilāgia ana mea, ka kua uma ai te fakahino e ia o a lātou gāluega tau toka tahi, ma fakatonu te leoleo faitotoka ke taukikila fakalelei. #Luk 12.36-38 35Koutou la ke mataala, auā e hē koutou iloa pe hau āfea te matai e o ia te fale—pe hau i te afiafipō, pe i te tūlua o te pō, pe ko te hēki tafa mai o ata, pe ko te hopo ake o te lā. 36Kāfai e hau fakafuaheki, e hē tatau ke ia maua mai koutou e momoe. 37Ko te mea e lea atu ai au kia te koutou, ko te mea foki ia e lea ai au ki tagata uma: Mataala!”
Currently Selected:
Maleko 13: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
