Levitika 22
22
Ko te Paia o nā Tāulaga.
1Na vāgana te Aliki kia Mohe, 2“Lea kia Alona ma ona ataliki ke fakaetēte lele i nā meālofa paia e ofo mai e tagata Ihalaelu mo oku, kae ke nahe takuvalea ai e kilātou toku igoa paia. Ko au ko te Aliki.
3“Lea vēnei kia te kilātou, ‘Ho he tamāloa o nā lāpuna o koutou i augā tupulaga uma e fakatafapili ki nā meālofa paia e ofo atu e tagata Ihalaelu ki te Aliki, ka koi iei he mea e hē mamā ai ia i nā tu tau tāpuakiga, ko ia tēnā e hē toe hau lele ki te mea e iei au. Ko au ko te Aliki.
4“ ‘E hēai he lāpuna o Alona e iei hona tauale kino o te kili, pe hau he hua i tona tino e mafai ke kai ki nā meālofa paia, vāganā kua uma te fakamamāgia. Ka hē mamā foki ia kāfai e paki atu ki he mea e hē mamā, e vē ko he tinooti, pe he tamāloa kua hau ki fafo te hua tamāloa ia te ia lava, 5pe kāfai foki ia e paki atu ki he meaola totolo pe ki he tino e hē mamā ai ia. 6Ho he ohitāulaga e paki atu ki ho he mea vēnei, ka hē mamā ia ke pa ki te afiafipō, ma ka hē kai ki nā meālofa paia heiloga kua tākele tona tino i ni vai. 7Kāfai te lā e goto, oi ka mamā ai ia, ma mafai ai ke kai ki nā meālofa paia, auā ko ana meakai lava iēnā. 8E hē tatau ke kai ia ki te kanofi o he manuvaefa na mate lava ia, pe na tāmate e he manu fekai, auā e hē mamā ai ia. Ko au ko te Aliki.
9“ ‘Ko nā ohitāulaga uma e tatau ke tauhi lelei ki nā fakahinoga kua kō tuku atua mo kilātou. Kāfai e hē tauhi kilātou ki ei, ka pakū lava ki luga o kilātou a lātou agahala, ma ka tāmate kilātou ona kua hē fakaaloalo kilātou ki nā fakahinoga paia. Ko au ko te Aliki, tē e fakapaiagia kilātou.
10“ ‘E hēai he tino i fafo o te kāiga ohitāulaga e mafai ke kai ki nā meālofa paia, e pa ki he tino e nofo i te fale o te ohitāulaga, pe he tino faigāluega a ia. 11Kae kāfai e fakatau e he ohitāulaga he pologa i ana lava tupe, pe ko nā pologa na fānanau i loto o tona kāiga, e mafai la kilātou ke kakai ki ana meakai. 12Kāfai he afafine o he ohitāulaga e fakaipoipo ki he tino e hē ko he ohitāulaga, e hē tatau la ia ke kai ki he mea o nā meālofa paia. 13Kae kāfai he afafine o he ohitāulaga kua oti tana tāne pe kua tatala tana āvaga, ma e hēai hana fānau, ma e toe liliu ki te fale o tona tamana, e vē ko nā aho o tona talavou, e mafai la ia ke kai ki nā meakai a tona tamana; kae e hēai he tino i fafo o te kāiga ohitāulaga e mafai ke kai ki ei.
14“ ‘Kāfai he tamāloa e hē mai te kāiga ohitāulaga e kai ki he mea o nā tāulaga paia ma tona hē iloa, e tatau ke totogi e ia ki te ohitāulaga te tau kātoa ma fakaopōpo ki ei he lua hefulu pahene. 15E hē tatau nā ohitāulaga ke kilātou faia he mea ke hē mamā ai nā meālofa paia a tagata Ihalaelu e ofo atu ki te Aliki, 16i te kua fakataga e kilātou o he tino e hē iei he fakatagaga, ke kai ki nā meālofa paia. Ko te mea ia ka nofohala ai te tino tēnā ma fakahalagia. Ko au ko te Aliki, tē e fakapaiagia nā mea iēnei.’ ”
17Na vāgana te Aliki kia Mohe, 18“Tautala kia Alona ma ona ataliki, ma ki nā tino uma o Ihalaelu, ma lea vē atu ki ei, ‘Kāfai he tino Ihalaelu pe he tino nukukehe e nofo i Ihalaelu, e kaumai hana tāulaga, pe he tāulaga e fakatino ai he tautōga, pe ko he tāulaga o te lotomalie e ofo atu ki te Aliki ma tāulaga mū, ko te manuvaefa e tatau ke hēai he māila i tona tino. 19E tatau ko he poa e hēai he māila i te tino, ke mafai ai ke talia ke fai ma tāulaga. 20#Teu 17.1Kāfai e ofo mai e koutou he manuvaefa e iei he māila i te tino, ka hē talia e te Aliki. 21Ma kāfai e kaumai e he tino hana tāulaga mo te māfuta fakatahi ki te Aliki, ke fakatino ai he tautōga pe ke fai ma tāulaga o te lotomalie, ko te manuvaefa e tatau ke hēai he māila i te tino, kae ke mafai ai ke talia ke fai ai te tāulaga. 22Nahe ofo atua ki te Aliki he manuvaefa e tāuaho, pe ketuketu, pe lavea, pe hau ai ki fafo he hua mai tona tino, pe ni papala pe he pou e hau ai he alou. Nahe kaumaia ni manuvaefa vēnei ki te fata faitāulaga ke fai ma tāulaga meakai ki te Aliki 23Kae ko he pōvi poa pe punuāmāmoe e iei hona vae e loa ātili pe pukupuku ātili, e mafai ke ofo ma tāulaga o te lotomalie, kae e hē talia ke fakatino ai he tautōga. 24Nahe ofo atua ki te Aliki he manuvaefa ko ona fuāpolo e toto ulia, pe kua pāpā pe lavea, pe kua launiu foki. E hē fakatagā te mea tēnei i te fenua o koutou. 25Nahe ofo atua e koutou ma meālofa meakai ho he manuvaefa mai he tino nukukehe. Ko nā manuvaefa vēnei e hē taliagia ona e kikila vē ki ei, e iei nā mea e fakahētonu ma hē lelei i nā tino o kilātou.’ ”
26Ma na vāgana te Aliki kia Mohe, 27“Kāfai e fānau mai he punuāpōvi, he punuāmāmoe, pe he punuāoti, nahe fakateka kehea ma tona mātua ke kātoa nā aho e fitu; ma e kāmata atu i te valu o aho ka mafai ai ke talia ma meālofa meakai i te afi mo te Aliki. 28Kae e hē tatau ke koutou tāmatea fakatahi he pōvi ma tana punua, pe he māmoe ma tana punua, pe he oti ma tana punua, i he aho e fokotahi.
29“Ma kāfai e ofo atu e koe he tāulaga o te fakafetai ki te Aliki, mulimuli ki nā fakahinoga kae ke talia ai koe. 30E tatau ke kai uma lele te tāulaga i te aho lava tēnā, ma hē fakatotoea ni mea ke pa ki tētahi tāeao: Ko au ko te Aliki.
31“Ko te mea la ia, koutou ke tauhi ki aku fakatonuga ma mulimuli ki ei. Ko au ko te Aliki. 32Nahe koutou faia he mea e hē mamā ai toku igoa, auā ko au e tatau ke paia i te kikila a tagata Ihalaelu. Ko au ko te Aliki, tē e fakapaiagia koutou, 33ma na kaumaia koutou mai Aikupito ke fai au ma outou Atua. Ko au ko te Aliki.”
Currently Selected:
Levitika 22: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
