Levitika 21
21
Nā Fakahinoga mo nā Ohitāulaga.
1Na vāgana mai te Aliki kia Mohe, “Tautala ki nā ohitāulaga, nā ataliki o Alona, ma lea vē ki ei, ‘E hēai he ohitāulaga e ia faia he mea ke hē mamā ai ia i nā tu tau tāpuakiga, ona kua paki atu ia ki te tinooti o he tino o tona kāiga, 2vāganā ai nā kāiga pili lele o ia, e vē ko tona mātua, tona tamana, tona ataliki, tona afafine, tona uho, 3pe ko hona tuafafine e nonofo ma ia i tona fale ona ko hēki nofo tāne. 4E hē tatau ke ia faia he mea ke hē mamā ai ia, ona kua paki atu ki te tinooti o he tino e tau ia ki ei, e ala i tana āvaga.#21.4 Ko te fuaikupu 4 i te tuhituhiga Epelu e hē manino
5 #
Lev 19.27-28; Teu 14.1 “ ‘Ko nā ohitāulaga e hē tatau ke tafi o lātou ulu, pe hele pupuku nā ava, pe tatipitipi o lātou tino ke fakailoa ai ko kilātou e fakanoanoa. 6E tatau kilātou ke paia ki to lātou Atua, ma hē kilātou faia he mea e takuvalea ai te igoa o to lātou Atua. Ona e kilātou ofo atua nā meālofa meakai i te afi ki te Aliki, nā meakai a to lātou Atua, e tatau ai kilātou ke paia.
7“ ‘E hē tatau kilātou ke fakaipoipo ki ni fafine e hē mamā i nā tu tau tāpuakiga ona e talitāne, pe ki ni fafine kua tēteka ma a lātou tāne, auā ko nā ohitāulaga e paia ki to lātou Atua. 8Ko koutou e tatau ke kikila ki nā ohitāulaga ni tino e paia, auā e ofo atu e kilātou nā tāulaga meakai ki te koutou Atua; e paia la kilātou kia te koutou, auā ko au te Aliki e paia, ma e fakapaia e au koutou.
9“ ‘Kāfai he afafine o he ohitāulaga e hē mamā ona kua kavea ia ma fafine talitāne, kua takuvalea e ia te igoa o tona tamana, ma e tatau ke huhunu ke mate.
10“ ‘Ko te Ulu Ohitāulaga te maualuga atu tona tūlaga i nā ohitāulaga uma. Na liligi ki luga o tona ulu te lolo fakauku, ma kua fakapaia ke kofu i nā lākei ohitāulaga. E hē tatau la ke hē helua tona ulu, pe hae ona kofu ke fakailoa ai tona fakanoanoa. 11E hē tatau ia ke fano ki te mea e i ei ai he tinooti. E hē tatau ke fai e ia te mea tēnei e hē mamā ai ia, e tuha lava pe ko tona tamana pe ko tona mātua te kua mate. 12E hē tatau foki ia ke fano ki fafo o te nofoaga paia o tona Atua, pe ia faia he mea e hē mamā ai ona kua ia tukua kae fano ki te mea e iei ai he tinooti, auā ko ia kua fakapaiagia i te lolo fakauku o tona Atua. Ko au ko te Aliki.
13“ ‘Ko te Ulu Ohitāulaga e tatau ke fakaipoipo oioti ki he fafine e hēki momoe lele ma he tamāloa. 14E hē tatau ia ke fakaipoipo ki he fafine kua oti tana tāne, he fafine kua tēteka ma tana tāne, pe ki he fafine kua hē mamā i nā tu tau tāpuakiga ona nae talitāne. Kae e tatau ke fakaipoipo ki he tāupou e hau mai tona lava kaukāiga, 15kae ke nahe hē mamā ai tana fānau ia te ia. Ko au ko te Aliki, tē e fakapaiagia ia.’ ”
16Na vāgana te Aliki kia Mohe, 17“Lea vēnei kia Alona: ‘I augā tupulaga uma e hau, e hēai he lāpuna o koe e iei he mea e fakahētonu i tona tino, e fakataga ke ia ofoa he tāulaga meakai ki tona Atua. 18E hēai he tamāloa e i ei ho he mea e fakahētonu i tona tino e fakataga ke ofo maia he tāulaga: e hēai he tamāloa e tāuaho pe pipili, pe hē kātoatoa ona fōliga pe ko tona tino; 19e hēai he tamāloa vaepiko pe limapiko, 20pe tuapiko pe āvivilu, pe tauale nā mata, pe iei he kili mageho pe kua pāpā nā fuāpolo. 21E hēai he lāpuna o Alona te ohitāulaga e i ei ho he mea e fakahētonu i tona tino, e mafai ke fakatafapili mai ke ia ofoa he meālofa meakai i te afi, ki tona Atua. 22Ko he tamāloa vēnā e mafai ke kai ki nā meakai a tona Atua, nā meālofa meakai e paia ma nā meālofa meakai e hili te paia; 23kae e hē tatau ia ke hau ki tafa o te kiepupuni pe ke fakatafapili ki te fata faitāulaga, auā ka hē mamā ai toku nofoaga paia. Ko au ko te Aliki, tē e fakapaiagia kilātou.’ ”
24Oi na tautala ai ia Mohe kia Alona ma ona ataliki, ma ki tagata uma o Ihalaelu.
Currently Selected:
Levitika 21: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
