Levitika 23
23
Ko nā Kaiga Fakamanatu
1Na vāgana te Aliki kia Mohe, 2“Tautala ki nā tino Ihalaelu ma lea vē ki ei: ‘Ko nā kaiga fakamanatu iēnei a te Aliki, iēia e tatau ke fakailoa aloakia e koutou, nā aho paia e māfuta fakatahi ai ia tagata.
Te Hāpati
3 #
Eho 20.8-10; 23.12; 31.15; 34.21; 35.2; Teu 5.12-14 “ ‘E ono ia aho e fai ai autou gāluega, kae ko te fitu o aho ko te Hāpati tēnā, e mālōlō lelei ai koutou. I te aho tēnā, e hēai he tino o koutou e galue ai, kae ko koutou e fakapotopoto ai mo nā tāpuakiga. Ko te Hāpati e o te Aliki, e tuha lava pe ko fea te nonofo ai koutou.
Te Pāheka ma te Falaoa hē Fakafefetea
(Nūm 28.16-25)
4“ ‘Ko nā kaiga fakamanatu iēnei a te Aliki, nā aho paia mo te fakapotopotoga, iēia e tatau ke fakailoa e koutou i te taimi kua fakatonu mo kilātou. 5#Eho 12.1-13; Teu 16.1-2Ko te Pāheka a te Aliki e kāmata i te goto o te lā i te hefulu fa o aho o te māhina muamua. 6#Eho 12.14-20; 23.15; 34.18; Teu 16.3-8 Ma i te hefulu lima o aho e kāmata ai te Kaiga Fakamanatu o te Falaoa hē Fakafefetea; e fitu ia aho ka hē kakai lele ai koutou ki ho he falaoa na fai ki ei he fefete. 7I te aho muamua o nā aho iēnei, e tatau koutou ke potopoto mo nā tāpuakiga, ma e mālōlō ai foki koutou mai autou gāluega māhani. 8Mo nā aho e fitu, e ofo atu e koutou nā meālofa meakai ki te Aliki. Ma i te fitu o aho e toe fakapotopoto ai koutou mo nā tāpuakiga, ma e hē fai ai autou gāluega māhani.’ ”
Te Fuata Muamua
9Na vāgana mai te Aliki kia Mohe, 10“Tautala ki nā tino Ihalaelu ma lea vē ki ei, ‘Kāfai koutou e taunuku atu ki te fenua e kō fōkiatua kia te koutou, ma helehele e koutou te fuata o autou fātoaga, e tatau ke kaumai e koutou ki te ohitāulaga he fuhi kālite o te fuata muamua. 11I te aho e hohoko ki te Hāpati, ka hiki ake ki luga te fuhi kālite e te ohitāulaga i mua o te Aliki kae ke talia ai e ia mo koutou. 12Ma i te aho e hiki ake ai e koutou ki luga te fuhi kālite, e tatau ke ofo atu ai foki e koutou he punuāmāmoe poa kua fokotahi te tauhaga te matua ma e hēai ni māila i tona tino, ke fai ma tāulaga mū ki te Aliki. 13Fakatahi ai ma te tāulaga tēnei, e ofo atu e koutou he lua kilokalama o te falaoa mata kua palu i te lolo olive, ke fai ma tāulaga meakai. Ko te manogi o te tāulaga tēnei e fiafia ai te Aliki. E ofo ai foki e koutou ma he lita o te uaina ke fai ma tāulaga uaina. 14Ko koutou e hē kakai lele ki he falaoa, pe ki ni fatu lākau na hunuhunu pe kai mata foki, heiloga kua pa ki te aho e kaumai ai e koutou te meālofa fakapitoa tēnei ki te koutou Atua. Ko he vāiniuga tēnei ka tauhi pea lava ki ei ia augā tupulaga e hau, pe ko fea lava te nonofo ai koutou.
Te Kaiga Fakamanatu o te Helehelega#23.15 Kaiga Fakamanatu o te Helehelega Ko iētahi igoa e lua e fakaigoa ai ko te Kaiga Fakamanatu o nā Vaiaho ma te Penitekoho i te Feagaiga Fōu. I te gagana Eleni, ko te uiga o te kupu penitekoho ko te 50 o aho. Kikila ki te fuaikupu 16. Ko te Kaiga Fakamanatu tēnei e fai kāfai e kātoa te fitu vaiaho pe ko te lima hefulu o aho talu te kāmata o te helehelega o te kālite i te taimi o te Kaiga Fakamanatu o te Falaoa hē Fakafefetea. E pakū ki te ono o aho o te māhina ko Hivana i te kālena Epelu
(Nūm 28.26-31)
15 #
Eho 23.16; 34.22; Teu 16.9-12 “ ‘Mai te aho e hohoko ki te Hāpati—te aho e kaumai ai e koutou te fuhi kālite ke hiki ake ki luga ma tāulaga fakapitoa—kāmata faitau ke kātoa nā vaiaho e fitu. 16Faitau pea ke pa ki te lima hefulu o aho—te aho e hohoko ki te fitu o Hāpati, oi ofo atu ai he tāulaga o te haito fōu ki te Aliki. 17Pe ko fea lava te nonofo ai koutou, e kaumai e kāiga tau toka tahi ni pāpā falaoa e lua ke hiki ake ki luga i mua o te Aliki ma meālofa fakapitoa. Fai nā pāpā falaoa iēnei e lua i ni kilokalama e fa o te falaoa mata e hili te lelei, ma palu ki ei te fefete. Ka kavea iēnā ma meālofa fakapitoa ki te Aliki mai nā fuata muamua. 18Fakatahi ai ma nā pāpā falaoa, e kaumai e koutou ma ni punuāmāmoe poa e fitu e taki tauhaga te mātutua ma hēai ni māila i nā tino, e fokotahi te pōvi poa, e lua ia māmoe poa ke fai ma tāulaga mū ki te Aliki. Ko nā tāulaga mū iēnei, fakatahi ai ma nā tāulaga haito ma nā tāulaga uaina, ko he meālofa fakapitoa, mo he manogi e fiafia ai te Aliki. 19E ofo atu foki e koutou he oti poa mo he tāulaga mo nā agahala, ma ni punuāmāmoe poa e lua, e taki tauhaga te mātutua, mo he tāulaga mo te māfuta fakatahi. 20Ma ka hiki ake ki luga e te ohitāulaga nā punuāmāmoe e lua ke fai ma meālofa fakapitoa ki te Aliki, fakatahi ma nā pāpā falaoa o nā fuata muamua a koutou. Ko nā tāulaga iēnei e paia ki te Aliki, kae e mo nā ohitāulaga. 21I te aho tēnā, e hē fai ai ni autou gāluega, kae ko koutou e māopōpo ai mo nā tāpuakiga. Ko he vāiniuga tēnei ka tauhi pea lava ki ei ia augā tupulaga e hau, pe ko fea lava te nonofo ai koutou.
22 #
Lev 19.9-10; Teu 24.19-22 “ ‘Kāfai e tau te fuata i nā fenua o koutou, nahe taua nā fua i nā lākau e pito lele ki te tuākoi, pe toe liliu koutou oi ao nā haito e tātitia i luga o te kelekele kāfai e uma te helehelega; tuku nā mea iēnā mo nā tino mātitiva ma nā tino nukukehe e nonofo i te mea e iei koutou. Ko au ko te Aliki te koutou Atua.’ ”
Te Kaiga Fakamanatu o nā Pu Ili.
(Nūm 29.1-6)
23Na vāgana te Aliki kia Mohe, 24“Tautala ki nā tino Ihalaelu ma lea vē ki ei: ‘I te aho muamua o te fitu o māhina, ka fakailoga e koutou ko he aho e matuā mālōlō lelei ai koutou; he aho e fakapotopoto ai koutou mo nā tāpuakiga, ma e fakamanatu e koutou i te ili o nā pu. 25E hēai ni autou gāluega māhani e fai ai, kae e kaumai e koutou he meālofa meakai e ofo atu i te afi ki te Aliki.’ ”
Te Aho o te Fakaleleiga
26Na vāgana te Aliki kia Mohe, 27#Lev 16.29-34“Ko te hefulu o aho o te fitu o māhina, ko te Aho o te Fakaleleiga#23.27 Aho o te Fakaleleiga pe Aho e Fakamāgalo ai nā Agahala. Kikila ki te 16.1 tēnā. Mo koutou, ko he taimi tēnā e māopōpo ai mo nā tāpuakiga, e fakalāina ai ma kaumai ai he meālofa meakai e ofo atu i te afi ki te Aliki. 28E hē faia autou gāluega māhani i te aho tēnā, auā ko te Aho o te Fakaleleiga tēnā, e kave kehe ai nā agahala a koutou i mua o te Aliki te koutou Atua. 29Ho he tino e kai ki he meakai i te aho tēnā, ka hē toe takua ia e o te Atua. 30Ma ko ai lava e fai ni ana gāluega i te aho tēnā, ka fakatāugā e au i te mea e iei ai ia tagata. 31Ko koutou e hē gālulue lele i te aho tēnā. Ko he vāiniuga tēnei e tūmau pea lava mo augā tupulaga uma, pe ko fea lava te nonofo ai koutou. 32Ko he aho Hāpati tēnei e mālōlō ma fakalāina ai koutou. Mai te afiafipō o te iva o aho o te māhina, ke pa ki te afiafipō o te aho e hohoko mai, ka fakamamalu ai e koutou te Hāpati.”
Te Aho Fakamanatu o nā Fakamalumalu
(Nūm 29.12-40)
33 #
Teu 19.13-15
Na vāgana te Aliki kia Mohe, 34“Lea ki nā tino Ihalaelu: ‘I te hefulu lima o aho o te fitu o māhina, e kāmata ai te Kaiga Fakamanatu o nā Fakamalumalu. Ko te aho fakamanatu tēnei mo te Aliki e fitu ia aho e fakatino ai. 35Ko te aho muamua ka fakapotopoto ai mo he tāpuakiga, ma e hēai ni gāluega e fai ai. 36I nā aho takitahi e fitu, e kaumai ai e koutou he meālofa meakai ke ofo atu i te afi ki te Aliki. I te valu o aho e toe fakapotopoto ai koutou mo he tāpuakiga, ma kaumai ai e koutou he meālofa meakai ki te Aliki. Ko he aho e tāpuaki ai, ma e hēai ni gāluega e fai ai.
37(“ ‘Ko nā aho fakamanatu iēnei a te Aliki, e tatau ke fakailoa e koutou i nā taimi e māopōpo ai mo nā tāpuakiga, ma kavatu ai ki te Aliki autou meālofa meakai e ofo atu i te afi—nā tāulaga mū, nā tāulaga haito, nā tāulaga, ma nā tāulaga uaina, e vē oi tatau ai mo nā aho takitahi. 38Ko nā aho fakamanatu iēnei e tatau foki ke fakamamalu e vē ko nā Hāpati māhani o te Aliki; ma ko nā tāulaga iēnei e kehe ai ma autou meālofa māhani, nā tāulaga mo te fakatinoga o nā tautōga, vēnā ma autou tāulaga o te lotomalie e ofo atu ki te Aliki.)
39“ ‘Kāfai kua uma te tau o nā fua o autou fātoaga, fakatino te aho fakamanatu tēnei i nā aho e fitu e kāmata atu i te aho hefulu lima o te māhina e fitu, ma i te valu o aho e matuā mālōlō lelei ai koutou. 40I te aho muamua, e kave e koe ni lālā mai nā lākau e lau olaola—nā pāma, nā alapa e ola i tafa o nā ālia—ma kāmata nā fakafiafiaga i mua o te Aliki te koutou Atua, mo ni aho e fitu. 41Tauhi ki te aho fakamanatu tēnei ki te Aliki i nā aho e fitu, i tauhaga takitahi. Ko he vāiniuga tēnei e tūmau pea lava mo augā tupulaga uma, e fakamanatu i te fitu o māhina. 42Ko koutou ka nonofo i ni fakamalumalu mo ni aho e fitu; koutou uma tagatā nuku o Ihalaelu, ka nonofo i nā fakamalumalu, 43kae ke iloa ai e autou fānau ko tagata o Ihalaelu na fakanonofo e te Aliki i ni fakamalumalu, i te takitakiga e ia o kilātou ki fafo o te fenua ko Aikupito. Ko au ko te Aliki te koutou Atua.’ ”
44Oi na fakailoa ai e Mohe ki nā tino Ihalaelu nā kaiga fakamanatu a te Aliki.
Currently Selected:
Levitika 23: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
