Kenehe 35
35
Kua Fakamanuia e te Atua ia Iakopo i Peteli
1Mulimuli ake, oi na vāgana ai te Atua kia Iakopo, “Fano nei loa ki Peteli ma nofo i kinā. Fakatū he fata faitāulaga i kinā ke tāpuaki mai ai kia te au, te Atua na fakaali atu kia te koe, i tō hola kehega mai ia Ehau.” #Ken 28.11-17
2Oi na lea atu ai ia Iakopo ki tona kaukāiga ma kilātou uma lele nae iei fakatahi ma ia, “Tīaki nā fakatuha atua kehe e ia te koutou, ma fakamamā outou tino ma fai ni outou kofu mamā. 3Ko kitātou ka olo ki Peteli, ma ko kinā ka fakatū ai e au he fata faitāulaga ki te Atua, tē na fehoahoani mai kia te au i te taimi o toku puapuagā, ma e fakatahi pea ma au i nā mea uma e fano au ki ei.” 4Oi na fōki ai e kilātou kia Iakopo nā fakatuha atua uma nae ia te kilātou, ma nā tautaliga nae i o lātou taliga. Ma na tanu ai e ia nā mea uma iēnei, i lalo o te aoa#35.4 aoa He lākau nae takua foki ko te telepini, nae manatu nā tino Epelu i nā aho kua leva e tapu, ma nae takua ai foki ko te lākau tapu. Nae fai i lalo o tona paolo na tāpuakiga, ma fakatutū i lalo nā fatu fakamanatu, ma tanu tafapili ki ei nā tinooti o kilātou e tafapili ki Hekeme.
5I te kāmataga kua olokehe ia Iakopo ma ona ataliki, na fakatupu e te Atua te mataku lahi ki nā tino i nā kakai e tafapili mai, oi na hēki tuliloa ai e kilātou. 6Kua taunuku atu ia Iakopo ma nā tino uma nae fakatahi ma ia ki Luhu (kua fakaigoa i nā aho nei ko Peteli), i te nuku ko Kanana. 7Na fakatū e ia he fata faitāulaga i kinā ma fakaigoa te koga tēnā ki te Atua o Peteli, ona ko kinā te na fakakitea ai te Atua kia te ia, i te taimi na hola kehe ai ia mai tona uho. 8I te otiga o Tepola, te tauhitama a Lepeka, na tanu i lalo o te aoa i te itū ki haute o Peteli. Ma na fakaigoa ai te mea tēnā ki te “Aoa o te Faitatagi”.
9I te liliu ifoga o Iakopo mai Mehopotamia ki Peteli, na toe fakakitea ki ei te Atua ma fakamanuia kia te ia. 10Ma na vāgana atu te Atua kia te ia, “Ko te igoa o koe ko Iakopo, kae e kāmata atu nei ko koe ka fakaigoa kia Ihalaelu.” Oi na fakaigoa ai ia e te Atua kia Ihalaelu.#Ken 32.28 11Ma na vāgana atu te Atua kia te ia, “Ko au ko te Atua Mālohihilihili.#35.11 Epelu Eli Hatai Ke haga tupu pea ma tokalahi au fānau; ma ka tupuga mai ia te koe ni mālō e lahi, ma ko iētahi o nā lāpuna o koe ka kavea kilātou ma tupu.#Ken 17.4-8 12Ko te fenua na fōki e au kia Apelaamo ma Ihaako, ka kō fōkia atua kia te koe, ma ka toe fōki e au ki nā lāpuna o koe kāfai e uma tō ola.” 13Oi na tukua ai loa ia e te Atua. 14I kinā i te mea na tautala ake ai te Atua kia te ia, na fakatū ai ki luga e Iakopo he fatu fakamanatu, ma liligi ki luga te uaina ma te lolo olive ke fakapaia ai.#Ken 28.18-19 15Na fakaigoa e ia te nofoaga tēnei kia Peteli.
Ko te Fānau maiga o Peniamina ma te Mate o Lahela
16Mulimuli ake, oi na olokehe ai ia Iakopo ma tona kaukāiga mai Peteli, ma ka koi mamao mālie kilātou mai Efalata, kae fakatīgā ia Lahela ka fānau, ma nae tīgāina lele. 17Kua pa ki te taimi kua tahoko ai nā tīgā, oi na lea ai te fakatōhaga kia Lahela, “Koe nahe mataku; ka fānau mai e koe hētahi pepe tama.” 18Kae ko Lahela kua tāli oti lele, ma i te taimi na tō ai tana mānava, na ia fakaigoa ai tana pepe kia Penoni,#35.18 Penoni Ko te uiga o te igoa i te gagana Epelu ko te ataliki o toku fakanoanoa kae kua fakaigoa e Iakopo kia Peniamina.#35.18 Peniamina Ko te uiga o te igoa i te gagana Epelu ko te ataliki o te lima taumatau (ko te lima taumatau nae kikila e vē e hili atu ia (Hal 137.5), e vēnā foki te itū taumatau Hal 110.5)
19I te otiga o Lahela, na tanu ai i tafa o te auala ki Efalata (ko te igoa i nā aho nei ko Peteleema), 20ma na fakatū ai e Iakopo he fatu fakamanatu i kinā, ma koi fakailoga ai lava te tugamau o Lahela ke pa mai ki nā aho nei. 21Na fakaauau te malaga a Iakopo ma tona kaukāiga, ma tau atu ai ki tētahi itū o te olo tautuku o Etele, ma na fakatū ai i kinā te lātou api.
Nā Ataliki o Iakopo
(1 NT 2.1-2)
22Ka koi nofo ia Iakopo i te fenua tēnā, na uhu ai ia Leupena kia Piliha, tētahi o āvagapō a Iakopo. I te iloaga e Iakopo o te mea tēnei, na tīgā lahi lele tona loto.#Ken 49.4
I te taimi tēnā, kua toka hefulu lua ia ataliki o Iakopo. 23Ko nā ataliki iēnei o Leaha: ko Leupena (te ulumatua a Iakopo), Himeona, Levi, Iuta, Ihakala, ma Hepulona. 24Ko nā ataliki mai ia Lahela, ko Iohefa ma Peniamina. 25Ko nā ataliki mai ia Piliha te pologa fafine a Lahela, ko Tanu ma Nafatali. 26Ko nā ataliki mai ia Helepa te pologa fafine a Leaha, ko Kato ma Ahela. Ko nā ataliki uma iēnei o Iakopo, na fānanau i Mehopotamia.
Ko te Mate o Ihaako
27Kua toe pa atu ia Iakopo ki tona tamana ko Ihaako i Mamele, e tafapili ki Kiliata Alapa (pe ko Hepelona), te mea nae nonofo ai muamua ia Apelaamo ma Ihaako.#Ken 13.18 28Na oti ia Ihaako kua matua lele ma kua 180 ona tauhaga, 29ma na tanu e ona ataliki ko Ehau ma Iakopo.
Currently Selected:
Kenehe 35: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
