Kenehe 36
36
Nā Lāpuna o Ehau
(1 NT 1.34-37)
1Ko nā lāpuna iēnei o Ehau, ko tētahi ona igoa ko Etoma. 2Na āvaga ia Ehau ki ni fafine Kanana: Ko Ata, te afafine o Elona o nā tino ha-Hitē; ko Oholipama te afafine o Anaha te ataliki#36.2 Ko iētahi fakaliliuga tuai ataliki Epelu afafine pe makopuna teine o Hīpono o nā tino ha-Hivī; #Ken 26.34 3ma Pahemata te afafine o Ihamaeli, ma ko he tuafafine o Nepaiota.#Ken 28.9 4Ma na fānau e Ata ia Elipaha; na fānau e Pahemata ia Leuelu; 5ma na fānau e Oholipama ia Ieuhu, Ialama, ma Kolaha. Ko nā ataliki uma iēnei o Ehau na fānanau i te fenua ko Kanana.
6Oi na kave ai e Ehau ana āvaga, ona ataliki, ona afafine ma kilātou uma nae nonofo fakatahi ma ia i tona fale, fakatahi ai ma ana lafumanu ma ana meatōtino uma na maua i te fenua ko Kanana, ma kua olo ki he fenua e mamao mai tona uho ko Iakopo. 7Na fano kehe ona ko te fenua nae nonofo ai ma Iakopo kua hē lava mo kilāua; kua lahi lele a lā lafumanu ma kua hē lava te kelekele ke tauhi fakatahi ai. 8Oi na fano ai ia Ehau oi nofo i te koga maugā o Etoma.
9Ko nā lāpuna iēnei o Ehau, te tupuna o nā tino ha-Etomā, i te koga maugā o Etoma. 10-13Na fānau e Ata te āvaga a Ehau he ataliki ko Elipaha, ma e toka lima ia ataliki o Elipaha: ko Temana, Omala, Hefo, Katama, ma Kenaha. Ma mai tētahi ana āvagapō ko Timina, e fokotahi tona ataliki, ko Amaleka.
Na fānau e Pahemata tētahi āvaga a Ehau he ataliki e fokotahi, ko Leuelu, ma e toka fa ia ataliki o Leuelu: ko Nahata, Hēlaha, Hamaha, ma Mihaha.
14Na fānau e Oholipama, te afafine o Anaha te ataliki#36.14 Ko iētahi fakaliliuga tuai ataliki Epelu afafine pe makopuna teine o Hīpono, nā ataliki e toka tolu o Ehau: ko Ieuhu, Ialama, ma Kolaha.
15Ko nā puikāiga iēnei na tupuga mai ia Ehau. Ko te ataliki matua o Ehau ia Elipaha, ko te tupuna ia o nā puikāiga iēnei: Ko Temana, Omala, Hefo, Kenaha, 16Kolaha, Katama, ma Amaleka. Ko kilātou uma iēnei e mai ia Ata te āvaga a Ehau.
17Ko Leuelu te ataliki o Ehau, ko te tupuna ia o nā puikāiga iēnei: Ko Nahata, Hēlaha, Hamaha, ma Mihaha. Ko kilātou uma iēnei e mai ia Pahemata te āvaga a Ehau.
18Ko nā puikāiga iēnei na tupuga mai ia Ehau mai tana āvaga ko Oholipama, te afafine o Anaha: Ko Ieuhu, Ialama, ma Kolaha. 19Ko te lihi tēnā o nā puikāiga uma na tupuga mai ia Ehau.
Nā Lāpuna o Heili
(1 NT 1.38-42)
20-21Ko nā ataliki iēnei o Heili te ha-Holī, nae nonofo i te fenua: ko Lotana, Hopala, Hīpono, Anaha, Tihono, Ehele, ma Tihana; ko nā kaukāiga iēnei o nā tino ha-Holī, nā ataliki o Heili, i te fenua ko Etoma.
22Ko nā ataliki o Lotana ko Holi ma Hemani; ma te tuafafine o Lotana ko Timina.
23Ko nā ataliki iēnei o Hopala: ko Alavana, Manahata, Epale, Hepo, ma Onama.
24Ko nā ataliki iēnei o Hīpono: ko Akaha ma Anaha. (Ko te Anaha tēnei te na ia mauagia na vaipuna vevela i te vao, i te taimi nae kikila ai e ia te lafu āhini a tona tamana.) 25-26Ko nā fānau iēnei a Anaha: ko Tihono ma Oholipama tona afafine. Ko nā ataliki iēnei o Tihono: ko Hemetana, Ehepana, Itilana, ma Kelana.
27Ko nā ataliki iēnei o Ehele: ko Pilihana, Hāvana, ma Akana.
28Ko nā ataliki iēnei o Tihana: ko Uhu ma Alana.
29Ko nā kaukāiga iēnei o nā tino ha-Holī: ko nā kaukāiga o Lotana, Hopala, Hīpono, Anaha, 30Tihono, Ehele, ma Tihana. Ko nā kaukāiga tau toka tahi iēnei o ha-Holī, i te fenua ko Heili.
Nā Tupu o Etoma
(1 NT 1.43-54)
31-39Ka ko hēki iei ai ni tupu o Ihalaelu, ko te fakahologa tēnei o nā tupu nae pūlea te fenua ko Etoma:
Ko Pela te ataliki o Peoa mai Tinihapa
Ko Iopapa te ataliki o Hēlaha mai Pohala
Ko Huhama mai te kogāfenua ko Temana
Ko Hatata te ataliki o Petata mai Aviti (na ia fakatōkilaloa ia Mitiana i te taua na fai i te fenua ko Moapi)
Ko Hamalaha mai Mahaleka
Ko Haulo mai Lehopota i te Eufilate
Ko Paala Hanani te ataliki o Akapola.
Ko Hatata#36.31-39 Hatata Ko iētahi tuhituhiga e leamai Hatala mai Pau (ko tana āvaga ko Mehetapele, te afafine o Matalete, te afafine o Mekahapa.)
40-43Ko Ehau ko te tupuna ia o nā puikāiga iēnei o Etoma: ko Timina, Alavaha, Ieteta, Oholipama, Elaha, Pinono, Kenaha, Temana, Mipiha, Makatieli, ma Ilama. Ko nā koga nae nonofo tau toka tahi ai nā puikāiga iēnei, nae iloa lava i nā igoa o nā puikāiga o kilātou.
Currently Selected:
Kenehe 36: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
