Kenehe 34
34
Kua Fakamālohia e Hekeme ia Tina ke Momoe ma Ia
1I tētahi aho, na fano ai ia Tina te afafine o Iakopo ma Leaha, oi āhiahi ki ni fafine Kanana. 2I te kiteaga o Tina e Hekeme te ataliki o Hamolo o nā tino ha-Hivī, ma ko ia foki te takitaki o te kogāfenua tēnā, oi na fano ai kua toho fakamālohi ia Tina ke momoe ma ia. 3Kae kua ia kitea te kaulelei o te tautiti, oi na fofou lahi lele ai ki ei, ma taumafai ai lava ke fai hana mea ke fofou ake ai ia Tina kia te ia. 4Oi na lea vē atu ai ia Hekeme ki tona tamana ko Hamolo, “Totogi he tupe mo te tautiti tēia ke fai ma aku āvaga.”
5Na iloa e Iakopo ko tona afafine ko Tina kua fai ki ei he mea mātagā; kae ona ko nā ataliki o ia nae i te vao ma nā lafumanu, na onohai ai lava ke papā mai. 6Oi na olo ai ia Hekeme ma tona tamana ko Hamolo, oi faitala kia Iakopo. 7Ka koi faitatala kilātou kae papā mai nā ataliki o Iakopo mai te vao. I te kilātou iloaga o te mea na tupu, na ogohia lele o lātou loto ma fēkakai lahi, ona kua fai e Hekeme he mea mātagā vēnei ki te afafine o Iakopo, ma kua takuvalea ai ia tagata o Ihalaelu. 8Kua lea atu ia Hamolo kia te kilātou, “Ko toku ataliki ko Hekeme kua fofou lele ki tō afafine, ma ko au e talohaga atu ke tuku mai kō tō afafine ke fai ma āvaga a toku ataliki. 9Fai kō he tātou māliliega ke fakataga te āvavaga o nā tino o kimātou ma nā tino o koutou. 10Oi kua mafai ai koutou ke nonofo ma kimātou, ma mafai koutou ke nonofo i ho he koga e fia nonofo ai koutou, ma fai ai autou fefakatauakiga, ma fakatau ni outou fenua.”
11Oi na lea atu ai ia Hekeme ki te tamana o Tina ma ki ona tuagane, “Fakamalie mai kō au, oi kua fōki atu ai e au ho he mea lava e fofou koutou ki ei. 12Lea mai kia te au pe he meālofa vēhea te fofou koutou ki ei, ma hiki ki luga te totogi mo te teine fakaipoipo ki te maualuga e fofou koutou ki ei; oioti lava te mea, tuku mai kō te tautiti ke fai ma aku āvaga.”
13Na tali mai nā ataliki o Iakopo kia Hekeme ma tona tamana ko Hamolo i he tali fakatogafiti, ona kua fakamātagā e ia to lātou tuafafine ko Tina. 14Kua lea vē mai kilātou, “E hē kimātou mafaia oi tuku to mātou tuafafine ke āvaga ki he tino e hēki pelitomea, auā e takuvalea ai kimātou. 15Oioti lava te mea e mafai ke mālilie ai kimātou, pe kāfai koutou ka vē ko kimātou, ma pelitome uma lele outou tāulelea. 16Oi fātoā mālilie ai kimātou ke āvavaga nā tino o kimātou ma nā tino o koutou. Ka nonofo fakatahi kitātou i te mea e iei koutou, ma kavea kitātou ma tagata e tahi. 17Kae kāfai ka hē koutou taliagia te mea e fofou kimātou ki ei e uiga ki te pelitome, oi ko kimātou la ka olo ma kave to mātou tuafafine.”
18Na fiafia ia Hamolo ma tona ataliki ko Hekeme ki nā fakakupuga iēnei, 19ma na vave lele ona talia e te taumalo, ona ko tona fofou lahi ki te afafine o Iakopo. Ko Hekeme ko te tino ia nae hili te fakaaloalogia i nā tino uma o tona kāiga. 20Oi na olo ai ia Hamolo ma tona ataliki ko Hekeme ki te alapupuni o te kakai, ma lea vē atu ki tāulelea o te kakai: 21“Ko nā tino iēnei ni tino lelei; tuku vē ke nonofo ma kitātou i to tātou fenua, ma ke fai ni a lātou pihinihi. Ko te fenua e lava lele ma totoe mo kitātou fakatahi ma kilātou. Tātou āvavaga ki o lātou afafine ma tuku o tātou afafine ke āvavaga foki ma kilātou. 22Kae ko kilātou iēnei, e mālilie oioti ke nonofo ma kitātou ma kavea ai kilātou ma nuku e fokotahi ma kitātou, pe kāfai kitātou e mālilie ke pelitome uma o tātou tāulelea, e vē ko kilātou kua uma te pelitome. 23Kāfai kitātou e mālilie ki te mea kua leamai ai kilātou, ko a lātou lafumanu, ma a lātou meatōtino uma lele, ka e a kitātou? Ko te mea ia, tātou mālilie ke nonofo fakatahi kitātou i kinei.” 24Ko nā tāulelea uma lele o te nuku na olo ki te faitotoka o te kakai, na mālilie ki te mea kua lea ake ai ia Hamolo ma tona ataliki ko Hekeme; ma na pelitome uma ai kilātou.
25Kua teka atu nā aho e tolu, ma ko te taimi tēnā koi tīgāina lava nā tāulelea mai o lātou tīpiga, na olo ai nā ataliki e toka lua o Iakopo, ko Himeona ma Levi, nā tuagane o Tina, kua kave a lā pelu ma olo ki te kakai e aunoa ma te hāfia e te nuku, ma tāmate uma lele ia tāulelea o te nuku, 26na tāmate ai foki ia Hamolo ma tona ataliki ko Hekeme. Kua kave e kilāua ia Tina mai te fale o Hekeme, oi olokehe ai loa. 27I te tau maiga o iētahi ataliki o Iakopo ki nā tino kua feoti, oi na kave fakamālohi ai e kilātou nā mea uma i te kakai, ke taui ai te faiga mātagā na fai ki to lātou tuafafine. 28Na kave e kilātou nā lafumanu, nā pōvi, nā āhini, ma nā mea uma lele nae i te kakai ma i nā fātoaga. 29Na kave uma lele ho he mea e iei hona aogā, na puke foki ia fafine ma tamaiti ma kave, na vēnā ma nā mea uma lele nae i loto o nā fale.
30Oi na lea atu ai ia Iakopo kia Himeona ma Levi, “Ko te mea kua fai e koulua kua fakapopole lahi ai toku loto; ka feita mai nei kia te au nā tino ha-Kananā, ha-Pelehī, ma iētahi tino uma o te fenua. E hē tokalahi taku kāuga tāulelea; kāfai nei ka kaukau fakatahi kilātou ma ohofaki au e kilātou, ko au ka fakaumatia fakatahi ma toku kaukāiga uma.”
31Kae kua tali mai kilāua, “Ko kimāua e hē fofou ke fai ni faiga a he tino ki to mā tuafafine, e vē ni faiga e fai ki he fafine talitāne.”
Currently Selected:
Kenehe 34: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
